¹ Nwíísí yé né cə́bal mɔ́. Kore byǎ bɛ́. Nwə̃́ə̃́. ² Ǎ Bə-zhɔ-zhe ! Ǹ byili bə̀ ǹ só ǹ tənà yá ; Ǹ zɔ Zhakɔbɛ byǎ bɛ́ bə̀ y’à zɔ bə vò yómré mó bə kwɛ̃̀ ; ³ Ǹ pɔ ǹ dwí rí ni rə̀ dwə́ə́ ré sǔbri, ǹ pyìlì bə̀ dwə́ə́ ré ne tɛ̃́ ; ⁴ Ǹ yẽ̌ ǹ lyim rí gakó ne, ń zɔ ǹ lyim ri ni. ⁵ Yi, ǹ nə́ ǹ vwǎrhna ! ká cĩ́ nəba nə́ jàà y wa ! Ce ǹ lyim rí j’a zhɛ̀ èta nə́ yilə ! ⁶ Ǹ mà ń já ń kwè lyim ǹdə́ nə́ba kɔn m’ê la gaga ! Ǹ mà ń já ń yẽ̌ ǹ lyim rí ni nə́ yó w byinə nə̀ zhɔ̌ zhe yilə ? ⁷ Ǹ nə tá ǹ la nə́ba yõ̌ nə́ zə myə̌l, mùnì ga ǹ dwí rí fùù ǹdə́ wu-nyɔ̃̀ ǹ wẽ́ ? ⁸ Bə-zhɔ-zhe ! ce nə́ nə ǹ wu-bɔ̀nɔ̀ wa, sə pə nə́ba ǹ vwǎrh mɔ́ ! ⁹ Èta, à m’a cili kɔn dɛ̀bɛ́ Yi Bə-zhɔ-zhe n’ê zɔ̀m mɔ́ ; Bə̀ nyǐ ǹ nə́ ń zɔ̀m yə̀-zùlə́ zɔ̀mà ń dwí rí ǹdə́ lyì bí byɛ̀bɛ́ bə̀ zhe ń zhə̀n mɔ́ yilə, bə̀myɛ́ wírí bə̀ k’ê bə̀ bə̀ nyə̀nyààrɛ́ tumə né wẽ́ twí yé. ¹⁰ Zhənà, ń vwǎrh mɔ́ ŋwɛ́nɛ́ lyì byɛ̀bɛ́ bə̀ n’ê nyàm mɔ́ mɔ́ nyí ni, mùnì ga zùwə́ y yə̀ nə́ tənà y wa. ¹¹ Wu-bɔ̀nɔ̀ w ǹdə́ zhə̀n rɛ́ n’ê jəl dwã, càngá tumə né ǹdə́ ǹdə́ yə̀-zùlə́ né zɛ̃̀ nə̀ n’ê kwə̀ə̀le dwã. ¹² Zhə̀n rɛ́ n’ê shí cɛ y w rə̀ dwi, cángá tumə né zɛ̃̀ nə̀ n’ê nyǐ dɛ̃̌ yi wə. ¹³ Wɔ́ Bə-zhɔ-zhe cìcì ń nə́ ń pɛ wu-nyɔ̃̀ wá, èta, nə́ cɛsɛ́ wẽ̀ ré m’a byì rə ce byǎ.