¹ Wɔ́ nwíísi yé né cə́bal mɔ́. È n’ê nún ǹdə́ jitiiti. Kore byǎ bɛ́. Nwə̃́ə̃́. ² Bə-zhɔ-zhe, jàn cìnə́ bé cǐnnə, ǹ jààsɛ́ wɔ́ sónó jààsɛ ! ³ À wɔ́wɔ́lɛ́ a lyɛ̀ɛ̀ Bə-zhɔ-zhe jì y shò-kwã nɛ́, À zɔ à wu w ǹdə́ à yala nɛ́ gakó a búbwéé à ce Yi nã́nyì y ni. ⁴ Wɔ́ ǹmyɛ́ sono kúmí n’ê nɛ è jì ní, éjílí myɛ n’ê nɛ è jǎl nɛ, e m’e cĩ́ è byǎ bɛ́ nɛ́ ; Bə-zhɔ-zhe, jàn cìnə́ bé Cǐnnə ! ǹ wɔ́ à Yi ǹdə́ à pyɔ̌, wɔ́ ǹ vwĩ̀-jùúlí nyí ni, jì y èmyɛ́ ŋwɛ́nɛ́. ⁵ Wu-nyɔ̃̀ ŋwɛ́nɛ́ ǹdə́ lyì bí byɛ̀bɛ́ bə̀ ŋwɛ́nɛ́ ǹ sõ kɛ̀lɛ́ w mɔ́ ! Lyì bí bə̀myɛ́ m’a j’â n’ê zǔl mó twéé twéé. ⁶ Wu-nyɔ̃̀ ŋwɛ́nɛ́ ǹdə́ lyì bí byɛ̀bɛ́ bə̀ zhí ǹmyɛ́ nɛ mɔ́, bə̀ bə̀ n’ê sɔ́msɛ sə̀ gakó kɔ̀rh bə̀ wun ní wẽ́. ⁷ Bə̀ gə tú bə̀ n’ê byɛrhɛ Baka vɔlɔ wá, bə̀ n’ê ce ò jǐrh nə̀-bùlsi dúdú, dwà bə̀ e nyɔ̀ ò yó o sú ǹdə́ Yi bwəl ré. ⁸ Bə̀ gə n’ê zhə̀l ǹdə́ bə̀ jàn n’ê súlí bə̀ la, Bə̀ b’e zhì Yi yé né Sənyɔ̃ yó. ⁹ Bə-zhɔ-zhe, Yi jàn cìnə́ bé Cǐnnə, cili à yi-co wə́ ! Zhakɔbɛ Yi ! Pyèrhè ǹ zhɛ̃̌ ń cili ! ¹⁰ Ǎ Yi, nyìwé, wɔ́ ǹmyɛ́ ǹ wɔ́ ku ò n’ô cə́r à yé né búlə́ jàà wa ! zɛ̃̀ ń nyǐ mɔ̀bɔ́ ǹ cír mó yò ! ¹¹ Bə̀ lò gə wɛ̀rhɛ́ dɛ̃ rə̀dù ǹ jì y kɔ̀ɔ́n rɛ́ wa, cɔ̃̀ ń wɛ̀rhɛ́ dwã mɔ̀rhɔ̀ kwã nɛ́ ; À só s’a zhì à Yi rí jì y étwí-ènyí rí mú cɔ̃̀ à la vò a jòm lwɛlɛ cìnə́ kwə̀ə́rhe wə. ¹² Bə̀ Yi Bə-zhɔ-zhe wɔ́ pwẽ̀ ǹdə́ búlə́ ku ò n’ô cə̀r búlə́ yé né, Bə-zhɔ-zhe nə́ ń pɛ zùwə́ ǹdə́ pɛnɛ́ nánfò, ń tá ń cẽ cɛ̀nɛ̀ wɔ̀rhɔ́ wu-põ̀ cìnə́ ne yé.