Kǝ̀kàl-fwɛ̀lɛ̀ 83

1 Nwə̃́ə̃́. Asafɛ Nwə̃́ə̃́. 2 Ǎ Yi, ǹ bə̀ká gu ǹ nyí ń zhì shɛ́ɛ́ yé ! Ǹ bə̀ká gu ǹ nyí yé, sə ǹ bə̀ká shǐrh yé ! 3 Bə̀ nyǐ ǹ zwə̀ bé n’ê dom bə̀ bànà, byɛ̀bɛ́ bə̀ súl mó mó n’ê zhẽ̌ bə̀ yó dɛ̃̌. 4 Bə̀ n’ê ce dwã yó ǹdə́ surhə námməlwɛ̀lɛ́ ǹ dwí rí yilə, bə̀ m’ê bàn bú ǹdə́ lyì bí byɛ̀bɛ́ ǹ nə́ ǹ nyǐ bə̀ yó mó. 5 Bə̀ n’ê wə̀l dwã nɛ bə̀ zhe : bà-nà nə́ gu bi bə jé lũ w tənèsé cəcəl wə, mùnì ga bə̀ k’ê bə̀ Esərayɛl yil ré yò lyǐrh kə́dò yé ! 6 Bə̀ zɔ̀m bə̀ wẽ́ bə wɛ̀rhɛ́ dɔbrɛ́ ǹdə́ nyí rə̀dù, bə̀ la m’e bú ǹdə́ mɔ́ : 7 È wɔ́ Edɔm ǹdə́ Esəməyəə byǎ bɛ́, Mɔwabɛ ǹdə́ Agarənyɛ̃́bá, 8 ǹdə́ Gəbalɛ, Ammɔ, Amalɛkɛbá, Fələsətɛ̃́bá byǎ bɛ́, e súlí Tiiri lyì byǎ bɛ́ ; 9 Asiri lyì bí myɛ tó bə̀ zù bə̀ wẽ́, bə mù dwã nɛ bə pə jàn Lɔtɛ byǎ bɛ́ nɛ. 10 Rə̀myɛ́ ce wɛ̀rhɛ́ bɛ ǹdə ǹ wɛ̀rhɛ́ Mədəyã, ǹdə Səsəra, ǹdə Jabɛ̃ ǹdə kɔn gə́ yàl nɛ́ Kəsɔ̃ bwǐsí wẽ́ mó ta ! 11 Rə̀myɛ́ gakó y’à j’a cɔ̀ Ene-Dore nɛ́, rə jǐrh pùlú ò pyě cɛ y yó. 12 Wɛ̀rhɛ́ bə̀ yò-ciçnə́ bé ǹdə kɔn gə́ yàl nɛ́ Orɛbɛ ǹdə́ Zeebe né mó ta, sə́ wɛ̀rhɛ́ bə̀ pyǎ bɛ́ gakó ǹdə kɔn gə́ yàl nɛ́ Zəbashɛ ǹdə́ Təsəmunə nɛ mɔ́ ta ! 13 Bə̀ bə̀myɛ́ mɔ́ y’à n’ê zɔ̀m bə̀ zhe : Bà-nà nə́ zwẽ Yi jàà y nə́ cìní. 14 À Yi ! Ce bə yə̀ ǹdə kɔ̀lma ta, 15 ǹdə wɔ́ myǐn mə̀ n’ê jí sɔ̀lɔ̀ ta, ǹdə wɔ́ pyàr rə̀ zhe myìn-zhù ta ! 16 Zɛ̃̀ n pú bə̀ kùr ń jì ǹdə́ ǹ zho wə́, sə́ ce ǹ zho w nánfɔ̀lɔ̀ w zə bɛ bə kəkə ! 17 Ǎ Bə-zhɔ-zhe ! ce cìzhìl pú bi, mùnì ga bə zɛ̃̀ bə pyà ǹ yil ré ; 18 Ce bə̀ wun zhizhiri, bə̀ wun zɛ̃̀ twéé twéé, ce bə jí cìzhìlə̀, ce bə cì bə jé tɛ̃́ lũ w wə !