¹ Nwíísí yé né cə́bal mɔ́. Ń nún ǹdə́ jitiiti yə́. Asafɛ nwə̃́ə̃́. ² Fǔ-nə ǹdə́ wu-nyɔ̃̀ á pə nə́ Jàn cə́bal mɔ́ nɛ ! Búbwéé-nə ǹdə́ wu-nyɔ̃̀ á ce Zhakɔbɛ Yi rí ni ! ³ Ji-nə nwíísi, dú-nə gùlú ǹdə́ bɔ̀rɔ́ ò cəl nã́nyə̀nyɛ̀lɛ́ y ǹdə́ zɔ̃̀ ! ⁴ Wúl-nə càn-dùlí y pɔ́lá yá, nə́ címsí dɛ̃ rɛ́, cã̀-pwã̀ nɛ mɔ́ ! ⁵ Bə̀ rə̀myɛ́ wɔ́ nyí rə̀ pɔ Esərayɛl nɛ, Zhakɔbɛ Yi rí nyí. ⁶ Wɔ́ nyí Yi vùr rə cĩ́ Zozɛfu yilə, ǹdə́ ń zɛ̃̀ ń la bú ǹdə́ Ezhipti tənà y yi ni mú. Ń zɔ̀m n wɔ̀ ; à nyɛ̀ɛ̀ cəl rə̀dù à yə̀l rə̀ pár rə̀ zɔ̀m ǹdə́ nɛ rə wɔ̀ : ⁷ À zul zhĩĩ rí ń pyə́pyəla w mɔ́, sə ń jɛ̀sɛ́ dwĩ̀ tù-kwə̀lə̀ y nɛ. ⁸ Ǹ zhẽ̌ ǹ cəl ń bubwéé ń ce ne ǹdə́ zwini zhe mó, sə à tú a vwǎrh mɔ́ ; dwà bya, cɛ n’ê zhízhǐ, sə à tú a vùr mó cɛ y zhízhǔ mú wẽ́ ; a zwẽ mó Məriba nàná bɛ́ wẽ́. ⁹ À dwí, cili, à la mɔ́ jə̀-fɔ́lɛ́ lyəlƴɔ ; Sə Esərayɛl, ǹ nə wɔ̌ ǹ m’ǎ cili à zɔ̀mà nɛ́ ! ¹⁰ Ǹ bə̀ká ń kə́ ń shɛ̀nɛ́ zhə-bal yò ǹ sono yé ! Ǹ bə̀ká wùlì zhələ bé yə né yé né yé ! ¹¹ Lwar bə̀ Àmyɛ́ wɔ́ Bə-zhɔ-zhe, ǹ Yi rí, àmyɛ́ à ce ń du Ezhipti tənà y wa ; a púr ǹ nyí rí, a ce rə sú. ¹² Sə ǹdə́ rə̀myɛ́ ga, à dwí rí yə̀ à zɔ̀mɛ̀ nɛ́ cili yé, Esərayɛl yə̀ wɛ̀rhɛ́ ǹdə à gə́ byili ní yé. ¹³ Wɔ́ rə̀myɛ́ è ce a yẽ̌ be kɔn rɛ́ tɛ̀bɛ́ bə̀ wun ní n’ê yǎl mɔ́ wẽ́, bə tó bə̀ cìcì wun ní bùlə̀ né gə́ n’ê yǎl nɛ́. ¹⁴ Zhə̀n zhə̀nà ! À dwí rí gə y’à n’ê cili à zɔ̀mà nɛ́, Esərayɛl gə y’à n’ê zhə̀l à sɔ́má y yó ! ¹⁵ À y’à m’a ce bə̀ zwə̀ bé cìzhìl èlǎsɛ̃́ lǎsɛ̃ kùr yó, à y’à m’a zhẽ̌ à jɛ̃̀ a bú ǹdə́ bə̀ zwə̀ bé ; ¹⁶ Lyì bí byɛ̀bɛ́ bə̀ n’ê súl Bə-zhɔ-zhe mó, cinə́ nábá m’a n’ê myìnì mu, sə Esərayɛl m’a yə̀ wu-nyɔ̃̀ cí byinə nə̀ bə zhɔ̌ zhe yilə ; À zə bə̀lé kɛ̀bɛ́ è càn du mú a m’a kɔ̃̀ Esərayɛl, a ce n jí pàtá nə́kulu tùr ń sú.