¹ Nwíísi yé né cə́bal mɔ́. Ń nún LYIQUES. Asafɛ nwə̃́ə̃́. ² Esərayɛl ènɔ̀n, Cili cɛ̀nɛ̀, ǹmyɛ́ mɔ̀bɔ́ ǹ nə́ ǹ kál Zozɛfu ǹdə wɔ́ vwàmá ta mɔ́ ! Ǹmyɛ́ mɔ̀bɔ́ ǹ jě màlɛ́kabá cəcəl w mó, zɛ̃̀ ń zə pwẽ̀ ń jə́jɛ̀mɛ́ ! ³ Efərəyim ǹdə́ Bɛ̃zhamɛ ǹdə́ Manasɛ yé né, zɛ̃̌ dɛ̃̌ ń bə̀ ń sɛ̃ nə́ kúrhí ! ⁴ Ǎ Yi, zhẽ̌ nə́ba dɛ̃̌ ! yə̌r ǹ pwẽ̀ ré ń byili nə́ba ǹ cìnə̀, mùnì ga nə́ nə vwǎrh ! ⁵ Bə-zhɔ̌-zhe, Yi ǹmyɛ̌ mɔ́bɔ́ ǹ cǐ jàn cìnə́ bé mó ! Ǹ mà ń já ń kwè lyim ǹ tá ǹ cili ǹ dwí rí yi-co w kɔn m’e yí dǒ ? ⁶ Ǹ nə́ ǹ kɔ̀n bɛ yə́-nàná wẽ́. Ǹ nə́ ǹ ce bə̀ nywɛ̃̀ yə-nàná kɔn lyɛ̃ cɛ nɛ. ⁷ Ǹ ce nə́ jě-dwã bɛ́ n’ê zɔ̀m nə́ sono, nə́ zwə́ bé n’ê mɔ̀ nə́ba. ⁸ Ǎ Yi, zhẽ̌ nə́ba dɛ̃̌ ! yə̌r ǹ pwẽ̀ ré ń byili nə́ba ǹ cìnə̀, mùnì ga nə́ nə vwǎrh ! ⁹ Ǹ mǔr sɛ̃́-cǒ Ezhipti ni ; ń jì tə̀nèrh, n zɛ̃̀ ń zhele wa. ¹⁰ Ǹ pyà jàà ń pə wa : O tə nèrh o su cɛ yá ; ¹¹ O zə ò ywə́l mó o pyi pyàr rɛ́ nɛ, ò vɔr rɛ́ zɛ̃̀ rə̀ wɔ́ ǹdə Yi sɛ́ɛ́dərɛbá ta ; ¹² o tò ò jɛ̀sɛ́ sə vò sə yí nə̀-fɔ̀lɔ̀ wá, ò jɛ̀sɛ́ shɛ̀bɛ́ sə̀ yə̀ yí mú vò sə yí bwǐsi ni. ¹³ Wɔ́ bə̀kɔ́n yil ǹ wǔr ò sɔ̌n rɛ́, ce lyì bí byɛ̀bɛ́ bə̀ ńê tó sɔ́msɛ́ bə̀ lyɛ̃ mɔ́ zɛ̃̀ bə̀ n’ê búbú w mú ? ¹⁴ Swɛ̀lɛ̀ cɔ̃́ w n’ô jí wə, ce o jǐrh gɔ-vwàmá kùjú nə̀ n’ê dɔ̀mà. ¹⁵ Yi, ǹmyɛ́ mɔ̀bɔ́ ǹ cǐ dɛ̃̌ jàn cìnə́ bé mó, ká ń bà ! Zhǐ dɛ̃̌ yi wə sə́ nyǐ sɛ̃́-cǒ w ń nyìwé ! ¹⁶ Cili kɔn rɛ́ tɛ̀bɛ́ ǹ zə ǹ jə̀-jĩ́ ń zhele mó sono, ǹdə́ byǐ mú mɔ̀bɔ́ ǹ cǐr ǹ cìn yil mó sono ! ¹⁷ Bə̀ ju w myǐn, bə̀ kà wa ! Rə̀ ga já n’ê jé tɛ̃́, ǹ lyi-shùùrí yé né. ¹⁸ Zə lò mó mɔ̀bɔ́ ń ŋwɛ́nɛ́ ǹ jə̀-jĩ́ y w mú, numbyíní byǐ mú ǹ cír ǹ cìn yil mó ǹ jɔ̃̀ wa ! ¹⁹ Èta, nə̀ k’é t’á la kwã nɛ́ ǹ yé né yé. Ce nə́ k’á zə myə̌l, mùnì ga nə́ byẽ̀ ǹ yil ré.