¹ Asafɛ nwə̃́ə̃́. Ǎ Yi ! Tənèsé tú sə zwẽ ǹ cəl kɔn rɛ́, sə̀ co ǹ jì y jìmdi, sə̀ ce Zhərəzalɛm jǐrh nə́kul-eywaalɛ. ² Sə̀ kwè ǹ tùntùnnə bé cùù rí sə pə kúmsi ni sə̀ n’ê jí, sə kwè byɛ̀bɛ́ bə̀ zhí mú mú nàmá bɛ́ sə pə gɔ-wẽ̀ ne. ³ Sə̀ ló bə̀ jal mɔ́ tɛ̃́ ǹdə nɛ̃̌ ta, mə kə́kɛ́lɛ́ Zhərəzalɛm, sə lò lò tɛ̀nɛ́ ń la bɛ cǒ n ce yé. ⁴ Nə́ jǐrh cìzhìl kɔn nə́ jè-dwã bɛ́ n’ê nyǐ, nə́ jǐrh mɔ̀n ǹdə́ ywẽ́ zhízhú kɔn lyì bí byɛ̀bɛ́ bə̀ jě bə kə́kɛ́lɛ́ nə́ba mɔ́ yilə. ⁵ Bə-zhɔ̌-zhe, ǹ lyim rí m’a j’â n’ê yì èta gaga kɔn m’e yí dǒ ? ǹ lyim rí m’a j’a kwɛ̃́ cɛ nɛ myǐn èta kɔn m’ê yí dǒ ? ⁶ È gə wɔ́ èta, sə́ ló ǹ lyim rí tənèsé shɛ̀bɛ́ sə̀ yə̀l ǹ pár mɔ́ ǹdə́ pyǎ bɛ́ byɛ̀bɛ́ bə̀ t’â byẽ̀ ǹ yil ré mó yó ! ⁷ Nyǐ bə̀ dɔ̀m Zhakɔbɛ bə zhəzhɛrɛ, bə wǔr ń kɛ̀lɛ́ yá. ⁸ Ǹ bə̀ká ń kə́ ń lyǐrh nə́ dwə́ə́ré nə́ wɛ̀rhɛ́ shãã ga mɔ́ yò w yé ! Ce jàn nɛ́ ń bə̀ là là ń dùr nə́ nɔ̀nɔ̀ ! Nyǐ nə́ wɔ́ zúzúnú cìnə́ zhə̀n zhə̀nà. ⁹ Nə̀ vwǎrh Yi, bə̀ ń sɛ̃ nə́ kúrhí, ǹ yil ré còrhó yilə ! Zwẽ nə́ba, sə́ pə nə́ba nə́ yə̀-bəlwàálɛ́ sǔbri, ǹ yil ré yilə ! ¹⁰ Wɔ́ bə̀kɔ́n yilə, tənèsé lyì bí nə m’a zɛ̃̀ bə̀ la wál : Wɔ́ yẽ̀ bə̀ Yi rí ŋwɛ́nɛ́ nɛ́ ? Zɛ̃̀ ń byili tənèsé lyì bí ni nə́ yírh wə, mùnì ga bə lwar, bə̀ nyǐ wɔ́ ǹmyɛ́ ǹ nə́ ǹ cə̀r ǹ tùntùnnə bé jal mɔ́ tɛ̃́ ló yé ne ! ¹¹ Bə̀ nyǐ ǹ nyɛ̌ ǹ lyì bí bə̀ ŋwɛ́nɛ́ yóm ré jè y né mó zúzúnú cǐl ré ! Bə-zhɔ-zhe, zə ǹ jɛ̃̀ y jàn nánfɔ̀lɔ̀ w ń mə́ zwẽ byɛ̀bɛ́ bə̀ la gu mú ! ¹² Cǐnnə, cǎrh tùùrhì tɛ̀bɛ́ nə́ jè-dwã bɛ́ tùrh mó mó twər tàlpyɛ̀ bə̀ cəcəl wə ! ¹³ Èta, nə̀myɛ̌, ǹ dwí rí, vwàmá nɛ́ ǹ wɔ́ nə̀ vwã̌-ènɔ̀n mɔ́, nə̀ m’ǎ zǔl mó byinə nə̀ bə zhɔ̌ yilə ; nə́ m’ǎ bwə̀l ǹ zùwə́ y yò nə́ byili byinə byinə gakó.