¹ À dwí, cili à còrhò mó ! pyèrhè ǹ zhɛ̃̌ ń cili zɔ̀mà nɛ́ à n’â púr à nyú w mú ! ² à la à nyí púr a ji səswalsɛ, a bwə̀l shãã ga surhə zɔ̀mà a byili. ³ Nyǐ kɔn rɛ́ dɛ̀bɛ́ nə́ nyɛ̀ɛ̀, nə́ yě re mó, kɔn rɛ́ tɛ̀bɛ́ nə́ dabá cĩ́ nə́ba mɔ́, ⁴ nə́ t’á la rɛ bə̀ nɛ̀mɛ́ nɛ́ yé né shòò yé, nə́ m’ǎ byili Bə-zhɔ-zhe còrhó w ǹdə́ ń ŋwɔ̀nɔ́ w ǹdə́ ń tũ̀-fwààlɛ́ ń wɛ̀rhɛ́ mɔ́, bə̀ nɛ̀mɛ́ nɛ́ nə̀ bàn mɔ́ myɛ nɛ nə lwar. ⁵ Ń pɔ yə̀-bya kɔn Zhakɔbɛ nɛ, n cĩ́ nyə́ tɛ̃́ Esərayɛl nɛ́, n zɛ̃̀ n pə nyí nə́ dabá nɛ́, bə̀ bə̀ cèrhè re bə̀ byǎ bɛ́ nɛ, ⁶ mùnì ga bə̀ byǎ bɛ́ byɛ̀bɛ́ bə̀ bàn mɔ́ myɛ lwar nɛ, mùnì ga bə̀ byǎ bɛ́ bə̀ la lúl mó gə tú bə̀ byìlə̀, sə bə zɔ̀m nə̀ yò bə byili bə̀myɛ byǎ bɛ́ nɛ, ⁷ mùnì ga bə zə Bə-zhɔ-zhe zhə̀nà, bə̀ bə̀k’a swě Yi tũ̀-fwààlɛ́ yó yé, sə bə wɛ̀rhɛ́ ǹdə ń nyə́ né gə́ n’ê byili ní, ⁸ mùnì ga bə̀ bə̀k’a wɛ̀rhɛ́ ǹdə bə̀ dabá ta yé, dwí tɛ̀bɛ́ rə̀ yàl yó-kùlù cìnə́, rə̀ yə̀ nyí ni shɛ̀nɛ́, dwí tɛ̀bɛ́ rə̀ wu yə̀ jàà èdù zhì, rə̀ yə̀ zhə̀n sɔ́má yó zhì ǹdə́ Yi mú. ⁹ Nyǐ Efərəyim byǎ bɛ́, bə̀ n’ê tɛ twesé mó, búlə́ né dɛ̃ rɛ́ yù w bə̀ kwɛ̃̀ bə dùr. ¹⁰ Bə̀ yə̀ Yi dɔbrɛ zhə̀n zal gaga, rə̀myɛ́ ce bə̀ yə̀ zhə̀l ǹdə nyə́ né gə́ n’ê byili ní yé. ¹¹ Bə̀ swě Yi tũ̀-fwààlɛ́, ǹdə́ rə̀ màyaarhɛ́ rə̀ y’à wɛ̀rhɛ́ bə̀ yírhə́ nə rɛ mɔ́ yò. ¹² Yi y’à wɛ̀rhɛ́ màmyɔ Swanɛ nyí rí wə, Ezhibti tənà y wə, bə̀ nàmbala bɛ́ yírhə́ na. ¹³ Rə bɔ̀n nə̀-fɔ̀lɔ̀ w dwã w rə pə bɛ bə lyɛ̃, rə ce nàná bɛ́ mɔ dwã nɛ ǹdə byílí ta. ¹⁴ È gə wɔ́ Nə̀nyɛ́nɛ́ nɛ, wɔ́ ébɔ̃ Yi y’a ce o zhèlè bə̀ yé né rə tó o dɛnnɛ rə zə bɛ bə̀ m’ê zhə̀lə̀, è gə wɔ́ cəcɛ̃ nɛ, rə̀ y’a ce myǐn yə̌r bə tó mə̀ dɛnnɛ rə zə bɛ bə̀ m’ê zhə̀lə̀. ¹⁵ Rə̀ y’à n’ê mà nə́kúl-pyàr gɔ-elũ èpòlò w wə, nɛ̃̌ du mə̀ n’ê dùr tɛ̃́ mə bɔrha, rə pə bɛ bə̀ nywɛ̀. ¹⁶ Rə̀ y’à n’ê ce nɛ̃̌ shí nə́kulu w mə du mə̀ n’ê dùr tɛ̃́ ǹdə nə̀-gwààlɛ nɛ̃̌ ta. ¹⁷ Sə ǹdə́ rə̀myɛ́ ga, bə cə̀ə̀le bə cẽ bə̀ n’ê wɛ̀rhɛ́ yə̀-bəlwàálɛ bə̀ gwar Yi, bə̀ n’ê cẽ Dɛ̃̌Dɛ̃̌-cə́bal nyə́ né zõ yò gɔ-elũ èpòlò w wə. ¹⁸ Bə zhẽ̀ Yi bə̀ wun wẽ́, bə̀ n’ê lwə̀l kùjú kɔ̀bɔ́ ò shil zhe be mó bə̀ la jú. ¹⁹ Bə zɛ̃̀ bə̀ n’ê shèè Yi bə̀ zhe : «Yi nə wɔ̌ rə̀ m’a tɛnɛ kùjú gɔ-elũ èpòlò w nyɔ̀nɔ̀ ?» ²⁰ Rə̀myɛ́ yó né, Yi j’a zɛ̃̀ rə mà pàtá yá, nɛ̃̌ j’a du tɛ̃́ mə dùr mə sú tɛ̃́ ; bə k’e wɔ̀ ; Yi nə wɔ̌ kùjú rə̀ m’a pə rə̀ dwí rí ni rə jí, rə pə rɛ nàmá myɛ rə dɔ̃̀ ? ²¹ Bə-zhɔ-zhe gə́ jà n nyɛ̀ɛ̀ rə̀myɛ́ mɔ́ yi ní, ń lyim j’a zɛ̃̀ : Myǐn j’a zɛ̃̀ mə kwɛ̃́ Zhɔkɔbɛ yilə, lyim rí rí j’a zɛ̃̀ Esərayɛl yó, ²² Bə̀ gə́ yə̀ Yi zhə̀n zal mɔ́ yilə, bə̀ gə́ yə̀ nyí zwẽ bə̀ rə̀ m’a vwǎrh bɛ mɔ́ yilə. ²³ Rə̀ pɔ nyí eban nɛ́ dɛ̃̌ yi rí w mú ni, rə pul dɛ̃̌ yi rí bwə̀ə̀lé. ²⁴ Rə ce mannɛ nyɔ̀ ǹdə dwà ta, rə pə bɛ bə jí, rə pə bɛ dɛ̃̌ yi rí bə̀lɛ́ yá. ²⁵ Lò gakó tó n jí Lyì-fwààlɛ́ kùjú wə́. N pə bɛ kùjú bə jí bə sú pyáám. ²⁶ Rə̀ ce yi-púrhí sõ zho w ce o vò yé né, rə zɛ̃̀ rə zə rə̀ jàn rɛ́ rə vwɛ̃ jə̀-jĩ́ sõ zho w o bà. ²⁷ Rə ce nàmá nyɔ̀ bə̀ yó ǹdə́ dwà ta, bə nyɔ̀ nánzəzhɔ̌ ǹdə shó ta, bə nyɔ̀ kúmsi nánzəzhɔ̌ ǹdə nyɔ̀rhɔ́ nə̀-fɔ̀lɔ̀ nyí ni mú ta. ²⁸ Rə̀ y’à j’â n’ê ce sə̀ lwé bə̀ zùlə́ jàà y cəcəl wə, è nyí rí gə́ kə́kɛ́lɛ́ má nyí rí gakó wə. ²⁹ Bə̀ y’a pwà bə̀ dɔ̀m bə sú pyáám : Yi y’a pɔ bɛ kɔn tɛ̀bɛ́ bə̀ y’à n’ê yǎl mɔ́, ³⁰ kùjú w y’à gwẽ̌ ŋwɛ́nɛ́ bə̀ nyú w bə̀ n’ê jí, ò jú shil zhe be gwẽ̌, ³¹ ǹdə́ Yi lyim rí j’a zɛ̃̀ bə̀ yó, rə mà byɛ̀lɛ́ bə̀ wɔ́ nə̀jàl-bala mɔ́ rə gu, rə gu Esərayɛl ébyǎ-dàlá bɛ́ rə súlí. ³² Sə ǹdə́ rə̀myɛ́ ga, bə cẽ bə gwẽ̌ cə̀ə̀le bə̀ n’ê wɛ̀rhɛ́ yə̀-bəlwàálɛ, bə̀ y’à t’â zwẽ ń tũ̀-fwààlɛ́ ń wɛ̀rhɛ́ mɔ́ nyí yé. ³³ Yi tə rə̀myɛ́ yilə, rə ce bə̀ dwã nɛ́ jǐrh dwã nánfwə̀r, rə̀ ce bə̀ byinə né n’ê jàr jàr nə̀ zhɛ̀. ³⁴ Yi gə́ y’à zɛ̃̀ rə̀ n’ê gwi yi ní, bə̀ y’à zɛ̃̀ bə̀ n’ê pyà rɛ, bə̀ n’ê kwɛ̃̀ bə̀ twí rə̀ sono bə̀ pyìrhí bə̀ wun, ³⁵ bə zɛ̃̀ bə̀ n’ê lyìrh bə̀ wɔ́ Yi rə̀ wɔ́ bə̀ pàtá yá, bə̀ wɔ́ Yi, Dɛ̃̌Dɛ̃̌-cə́bal ń wɔ́ bə zwennə mó. ³⁶ Sə wɔ́ myí bə̀ y’à n’ê myìnì mú bə̀ nyú wə, bə̀ n’ê zə bə̀ mə̀jə̀ə̀lé bə̀ gòm kɔma bə̀ pɛ Yi ni. ³⁷ Bə̀ wun y’à bə zhǐ ǹdə́ mɔ́ kẽkẽ mɔ́ yé, bə̀ y’à də̀ zhə̀n cìnə́ ǹdə́ ń dɔbrɛ yé. ³⁸ E jà ǹdə́ rə̀myɛ́ ga, ń nɔ̀nɔ̀ dǔr yil ń pɔ bɛ sǔbri, ń yə̀ bɛ cɔ̀ yé ; ń zɔ ń lyim ni, ń yə̀ ń lyim rí nánfɔ̀lɔ̀ w kwè bə̀ yó yé. ³⁹ Ń lyǐrh bə̀ bə̀ wɔ́ nyumbyínsi, yala nàmá kɔna, shə́shìrhə́ nə̀ n’ê lyɛ̃, nə̀ k’ê t’â kwɛ̃̀ nə̀ twí nə̀ kwã nɛ́ yé. ⁴⁰ Dɛ̃ ŋwɛ́nɛ́ bə̀ y’a zɛ̃̀ gɔ-elũ èpòlò w wə, bə̀ n’ê cẽ ń nyə́ né zõ yò, dɛ̃ ŋwɛ́nɛ́ bə̀ y’a zɛ̃̀ bə̀ n’ê yì ń lyim ní ! ⁴¹ Bə̀ y’a t’â yẽ̌ Yi zhõ̀ ne yé, bə̀ y’à n’ê wɛ̀rhɛ́ kɔn tɛ̀bɛ́ rə̀ n’ê zhìlì Esərayɛl Yi rí rə̀ wɔ́ pwɛ̃́pwɛ̃́ mɔ́ wu ni. ⁴² Bə̀ y’à t’â lyǐrh dɛ̃ rɛ́ tɛ̀bɛ́ rə̀ zə jàn rɛ́ rə̀ m’ê vwǎrh bɛ bə̀ zwə̀ bé jɔ̃̀ w mɔ́ yò yé. ⁴³ Màyaarhɛ́ Yi wɛ̀rhɛ́ Ezhipti ní ǹdə́ wò-jààrɛ́ rə̀ wɛ̀rhɛ́ Təsəwanɛ nɛ́ mɔ́ ; ⁴⁴ Ǹ twĩ̀ zɔ̀rh sə̀ zhe swə̌rh bə̀ sə dɔ̃̀ bɛ sə nyɔ̀ bə̀ jal mɔ́ ; Nyàswəəle gu bi. ⁴⁵ N ce səsɛ̀mɛ̀ jí bə̀ jòró wə́, nə jí bə̀ wẽ̀ ré bə̀ twĩ̀ bə nə mɔ́ . ⁴⁶ rə ce bə̀ bwǐsí nàná bɛ jǐrh jal, bə̀ k’ê yə̀ ŋwɛ̀nɛ́ bə nyɔ̀ bɛ mɔ́ yò yé. ⁴⁷ N ce bədũ̀kwələ y gu bə̀ sɛ̃̌-cèmé né, n ce wàr rə̀ n’ê nywɛ̀ ǹdə dwà ta gu bə̀ shəkəmɔɔrɛbá bá. ⁴⁸ N yẽ̌ bə̀ vwàmá nɛ́ nɛ wàr rɛ́ gu ni, n ce myǐn shí dɛ̃̌ mə b’e gu bə̀ nɛ̃ nɛ́. ⁴⁹ N ce ń lyim rí náncɔ̀lɔ̀ w j’a zɛ̃̀ bə̀ yó, rə̀ wɔ́ kùl-ènyà swà, rə̀ wɔ́ zwini lyim, rə̀ wɔ́ shə̀dɛ́ɛ́sɛ ń nə́ ń twĩ̀ sə̀ wɛ̀rhɛ́ zwini. ⁵⁰ Ń já n yẽ̌ ń lyim rí, ń yə̀ rɛ zal yé. Ń yə̀ bɛ zwẽ cu jɔ̃̀ w yé, n já n yẽ̌ be n ce cu jɔ̃̀ wa. ⁵¹ N mà Ezhipti lyì bí byì-cɛsɛ́ gakó n gu, bə̀myɛ́ byɛ̀bɛ́ bə̀ lùl ǹdə́ bə̀ jàn rɛ́ nã́yéé ré/bwál-kɔn Sham kwə̀ə́rhé w mó. ⁵² N zɛ̃̀ n ce ń dwí rí du ǹdə pyììsi ta, n kál bɛ gɔ-elũ èpòlò w w ǹdə vwàmá ta. ⁵³ Ń kál bɛ wárhgáá, mùnì ga ywẽ bə̀ bɛ zal yé, sə ń ce bə̀ zwə̀ bé mɛ̃ nə̀-fɔ̀lɔ̀ w wẽ́. ⁵⁴ N zə ń lyì bí n mə n yí ń sə̀pwà swɛ̃́ rɛ́ nɛ, pyɔ̀ w kɔ̀bɔ́ ń zɔ ń jɛ̃̀ y jàn rɛ́ n mə n zwẽ mó. ⁵⁵ N jì tənèrh bə̀ yé né, n pə bɛ tənà y bə̀ cəl kɔna, N ce Esərayɛl kwálsɛ́ jòm sə̀ kwə̀ə́rhé wə. ⁵⁶ Sə rə̀myɛ́ yó né, bə̀ zɛ̃̀ bə zhẽ̀ Yi Dɛ̃̌-Dɛ̃̌ cə́bal mɔ́, bə cẽ ń nyí ni shɔ̀nɔ́ yò, bə̀ bə shɛ̀ ń nyə́ né zõ yé. ⁵⁷ Bə yẽ̌ mo, bə̀ yə̀ zhə̀n cìnə́ yàl ǹdə́ mɔ ǹdə bə̀ dabá ta, bə k’a pyìrhí bə̀ kwã bə zǎ mɔ ǹdə wɔ́ twã bə̀ tɔ è cam rɛ́ t’â zhə̀l rə̀ yé ta. ⁵⁸ Kɔn súlí myɛ, bə̀ cèmé né jìsí bə̀ zɛ̃̀ bə lù mú myɛ, j’a zɛ̃̀ Yi lyim ni, rə̀ n’ê yì bi bə̀ cèmé né yilə. ⁵⁹ Yi nyɛ̀ɛ̀, rə̀ lyim j’a zɛ̃̀ ; rə cìrh Esərayɛl rə ce kwã nɛ́, ⁶⁰ rə yẽ̌ rə̀ jì y Silo né mó ne, kòrhó kɔ̀bɔ́ rə̀ y’à jě ò wẽ́ numbyínsí cəcəl w mó mó ne ; ⁶¹ Rə kwè rə̀ còrhó w rə pə yómré jè y wə, rə kwè rə̀ jàn rɛ́ rə ce zù-bal mɔ́ jɔ̃̀ wa. ⁶² Rə̀ lyim rí zɛ̃̀ ǹdə́ rə̀ dwí rí rə̀ wɔ́ rə̀myɛ́ cəl kɔn mɔ́, rə yẽ̌ re rə ce búlə́ shù w jɔ̃̀ wa. ⁶³ Myǐn jí rə̀ ébwá-dàlá bɛ́, còrhó w kɔ̀bɔ́ bə̀ y’à n’ê cèrhé kana-byǎ byɛ̀bɛ́ bə̀ yə̀l bal pár mɔ́ jé tɛ̃́ ; ⁶⁴ Bə gu rə̀ vwĩ̀-zwə́lnə bé ǹdə́ búlə́ shù, e jà ejə̀nə̀ bé t’â kúrh yé. ⁶⁵ Sə Cǐnnə mó já n jàr jàr n zɛ̃̀, ǹdə wɔ́ lò ń yà ń dɛ̌ ta, ǹdə wɔ kã̀dɔ ò y’à nyɔ̀ də̀vɛ̃́ e zù w ta. ⁶⁶ N mà ń zwə̀ bé bə dùr, n ce cìzhìl tɛ̀bɛ́ rə̀ bə zhɔ̌ zhe pú bi. ⁶⁷ Ǹdə́ rə̀myɛ́ ga, n vùr Zozɛfu kɛ̀lɛ́ n ce kwã nɛ́, ń yə̀ Efərəyim kwálá cír yé ; ⁶⁸ N swéné Zhidə kwálá y du, Sənyɔ̃ pyɔ̀ w ń só mó. ⁶⁹ N lù còrhó-jì ǹdə wɔ́ jààsɛ́ sə̀ zhə̀l dɛ̃̌dɛ̃̌ ta, ǹdə wɔ́ cɛ kɛ̀bɛ́ ń cĩ́ è kùr tɛ̃́ byinə nə̀ bə zhɔ̌ zhe yil ta. ⁷⁰ N cír ń tùntùnnə Dəvyidi, n vùr mo ń vwàmá nɛ́ kwã nɛ́, ⁷¹ N zə mɔ ń pyììsí sə̀ y’à n’ê ŋwɔ̀ mɔ́ kwã nɛ́, mùnì n ce n kál Zhakɔbɛ, ń dwí rí, ǹdə́ Esərayɛl ń cəl kɔn rɛ́. ⁷² Dəvyidi kál bɛ ǹdə́ wu-põ̀, n tó bə̀ yé n zə bɛ n vò ǹdə́ lárma.