¹ Azaafɛ nwə̃́ə̃́. Nwĩ́ĩ́sí yé né cə́bal mɔ́. È n’ê zɔ̀m Yədətun zɔ̀mà. ² À n’â zhẽ̌ à cəl à búbwéé à ce Yi ni ; à n’â zhẽ̌ à cəl à ce Yi ni, sə rə̀ n’ê m’a cili ni. ³ Zúzúnú gə zhe ne dɛ̃, wɔ́ Bə-zhɔ-zhe à n’â pyà ; cəcɛ̃ nɛ, à y’a j’a zhẽ̌ à jɛ̀sɛ́ a ce dɛ̃̌, a yẽ̌ se sə̀ j’a zhǐ ; à bə̀ shɛ̀ wu ni shíshóró dwí tã̌ tã̌ yò yé. ⁴ À n’â lyǐrh Yi yò, à gə lyǐrh gakó a zɛ̃̀ à n’â wɔ́wɔ́lɛ́ ; à wu w zɛ̃̀ ò n’ô buburi. ⁵ Ǹ ce à yírhə́ j’a kǎl nə̀ zhǐ ; ce à wu w n’ô zhizhiri, à k’â wàr à n’â zɔ̀m yé. ⁶ A zɛ̃̀ à n’â bùl shãã ga dwã nɛ́ ǹdə́ shãã ga byinə né gə́ y’a wɔ́ nɛ́ mɔ́ yò. ⁷ À n’â bùl à nwĩ́ĩ́sí à y’à n’â nún cəcɛ̃ nɛ mɔ́ yò, à m’â tɛ́rɛ́ tɔ́rɔ́ nánzhəzhɔ̌ à wẽ́, à m’â bwə̀rh à cìn à zhe : ⁸ Bə-zhɔ-zhe nə mà n já n zhɛ̃̀ nə́ba gaga nà ? ń kə́ ń tá ń la nə́ba ń sónó byilu nà ? ⁹ Ń wu-bɔ̀nɔ̀ w zhɛ̀ nà ? Ń zɔ̀mɛ̀ rɛ́ jé tɛ̃́ byinə nə̀ bə zhɔ̌ zhe yil nà ? ¹⁰ Yi nə swě bə̀ rə̀ y’à zhe nɔ̀nɔ̀-dǔr mó nà ? rə̀ nə tə̀ rə̀ lyim rí yil rə yẽ̌ rə̀ nɔ̀nɔ̀-dǔr mó ne nà ? ¹¹ À n’â wə̀lə̀ : Nyǐ kɔn tɛ̀bɛ́ rə̀ n’ê pɛ nɛ à jàn rɛ́ mɔ́, wɔ́ Dɛ̃̌Dɛ̃̌ cə́bal mɔ́ jə̀-jĩ́ y gə́ k’ê də̀ ǹdə è gə́ y’à wɔ́ nɛ́ cìcì ta yé… ¹² À m’a lyǐrh Bə-zhɔ-zhe tumə né yò, bə̀ nyǐ à n’â tɛ́rɛ́ ǹ tũ̀-fwààlɛ́ ǹ twĩ̀ shãã ga mɔ́ yò ; ¹³ À m’a zɔ̀m ǹ tumə né gakó yò a byili, à m’a byili ǹ tũ̀-fwààlɛ́. ¹⁴ Ǎ Yi, ǹ sɔ́msɛ́ gakó càn ; wɔ́ yi tɛ̌ rə́ jàn du kɔn gakó ǹdə Yi ta ? ¹⁵ Ǹ wɔ́ Yi tɛ̀bɛ́ rə̀ n’ê wɛ̀rhɛ́ màmyaarhɛ ; ǹ byili ǹ jàn rɛ́ dwə́ né cəcəl wə. ¹⁶ Ǹ zɔ ǹ jɛ̃̀ y ń mə́ vwǎrh ǹ dwí rí, ǹ dwí Zhakɔbɛ byǎ bɛ́ ǹdə́ Zhozefu byǎ bɛ́. ¹⁷ Ǎ Yi ! nàná bɛ́ nɔ mɔ́, nàná bɛ́ nɔ mɔ́ bə didi ; gwáárɛ́ nánlyilyǔmrí kəkə. ¹⁸ Bəban cìr nɛ̃̌ tɛ̃́ mə dùr nə̀gɔ̀lɔ̀, dwà gùlú zhì bəban w o bya, ǹ cama tə nə vò lũ cə-yala nɛ́ gakó wə. ¹⁹ Ǹ dwà gùlú w dom o jə́jɛ̀mɛ́ o yə̌r lũ wə́, cɛ y wu zɛ̃̀ e zhízhǐ. ²⁰ Ń ji sɔ́má nə̀-fɔ̀lɔ̀ w wẽ́, sɔ́má kɛ̀bɛ́ ǹ nə́ ǹ tó ǹ mə́ ǹ zhə̀l nɛ̃̌ nánlyilyùmú w cəcəl wə, ǹ gə lyɛ̃ lò lò kə́ yə̀l ǹ nə̀twéése jàà shò yé.