¹ Asaafɛ nwə̃́ə̃́. Nwĩ́ĩ́sí yé né cə́bal mɔ́. Nwə̃́ə̃́ bə̀ dú dɛ̀lɛ̀ wẽ̀ bə m’ê nún. ² Bə̀ yě Yi pár Zhidə né, rə̀ yil ré du Esərayɛl nɛ́. ³ Rə̀ kòrhó w ŋwɛ́nɛ́ Salɛm nɛ́, rə̀ jòmə̀ y jàà y zɛ̃̀ è ŋwɛ́nɛ́ Səyɔ̃ nɛ́. ⁴ Wɔ́ gàà mɔ́ rə̀ kɔ́ cama nɛ́, ǹdə́ ku w lò mə́ ń cə̀r ń cìn yé ne búlə́ jàa w mɔ́, ǹdə́ búlə́ shù wə́, ǹdə́ búlə́ wẽ̀ ré né. ⁵ Ǹ zhe jàn nánfɔ̀lɔ̀ du kɔn gakó, ǹ nə́ ǹ jə́jɛ̀mɛ́ myɛ du vwǎrhna bɛ́ wẽ̀ ré ǹ bú ń zwẽ rə̀ zhǐ tɛ̃́ púl púl ǹdə pyàr ta mɔ́. ⁶ Bə̀ zɔ búlə́ kã̀dar rɛ́ ǹdə́ wu-jɔ̀ w rə̀ y’à zhe dɛ̃́dɛ̃́ mɔ́ ga bə kɔkɔlɛ bə̀ wẽ̀ ré gakó bə yẽ̌ re, ǹdə́ rə̀ y’à dɛ̃̌ jan bwə́ré ; ce búlə́ kã̀dar rɛ́ rə̀myɛ́ mɔ́ yə̀ ŋwɛ̀nɛ́ rə zwẽ rə̀ cìn yé. ⁷ Zhakɔbɛ Yi ! ń gə́ zɛ̃̀ ń nyáásɛ rə̀ yó yi ní, rə̀myɛ́ ǹdə́ eshə-jòmnə bé ǹdə́ eshəsé ga j’a dɛ̀ɛ̀. ⁸ Zhə̀nà, nyǐ wɔ́ ǹmyɛ́ ǹ nə́ ǹ zhɛ̃̀ wu ni ! Ǹ lyim rí gə́ zhɛ̃̀, wɔ́ mɔ̌ lò ń wɔ̌ ń mà n zhì ǹ yé né ? ⁹ Ǹ zhì dɛ̃̌ yi w ń bwə̀l nyí ń byili, cɛ y zhízhǐ e j’a zhǐ shɛ́ɛ́, ¹⁰ ǹdə́ Yi gə shí tɛ̃́ rə̀ zɛ̃̀ rə̀ la bùrsi bǔr, rə̀ la zúzúnú cìnə́ gakó vwǎrh cɛ yó mó yi ní. ¹¹ Bá numbyíní lyim gə zɛ̃̀ rə̀ n’ê yì myɛ, è n’ê zǔl mó ǹdə́ rə̀ ga, ǹ gə́ nə́ ǹ zal y ǹdə́ lyim rí ga ǹ dɛ̃ ǹ cìn ni mú yilə. ¹² Dwĩ̀-nə nyə́ Bə-zhɔ-zhe, á Yi rí yé né, s’á pyìrh ne ! Ámyɛ̌ byɛ̀bɛ́ gakó á zhǐ á kə́kɛ́lɛ́ rɛ mɔ́, zə-na á paánsɛ́ á bə̀ á pə Yi rí tɛ̀bɛ́ rə̀ n’ê zɛ̃̀ wu ni mú ni !