¹ Nwĩ́ĩ́sí yé né cə́bal mɔ́. «Bə̀ká cɔ̀ yé» Asaafɛ nwə̃́ə̃́. ² Ǎ Yi, nə́ n’é zǔl mó ! Nə́ n’é zǔl mó ; ǹ yil ré ŋwɛ́nɛ́ nə́ nyú wə ; nə́ n’é bwə̀l ǹ tũ̀-fwààlɛ́ yò nə́ byili. ³ Yi rí tɛ̀bɛ́ ǹ byili bə̀ rə̀ bàn mɔ́ gə yúwə́, à m’a kə́ bùrsí sə tó ǹdə kɔn gə́ mə̌ nɛ́. ⁴ Cɛ y ǹdə́ lyì bí byɛ̀bɛ́ bə̀ ŋwɛ́nɛ́ è yó mó gakó m’a zhízhǐ : Wɔ́ àmyɛ́ à cìì yə né nə̀ kwɛ̃́ cɛ y mɔ́ tɛ̃́. ⁵ À n’â wə̀l cìn-dɛ̃̌-zhõ̌ cìnə́ bé ne : bə̀k’á zhẽ̌ à cìn dɛ̃̌ yé ! a wɔ̀ lyì-bəlwǎlsɛ́ nɛ : á bə̀k’á zhẽ̌ á yó dɛ̃̌ yé ! ⁶ Á bə̀k’á zhẽ̌ á yó o vò dɛ̃̌ dɛ̃̌ gaga yé, á bə̀k’á zɔ̀m cìn-dɛ̃̌-zhõ̌ zɔ̀mà yé ! ⁷ Bə̀ nyǐ è də̀ yi-púrhí sõ ráá yi-zùr sõ ráá gɔ-elũ èpòlò wə, numbyíní yó dɛ̃̌ zhõ̌ mó n’ê shí ní yé. ⁸ Bə̀ nyǐ wɔ́ Yi rə̀ n’ê bùr bùrsí : Rə̀myɛ n’ê lwəl lò mɔ̀ yó tɛ̃́, rə zhẽ̌ ń dõ mɔ̀ yó dɛ̃̌. ⁹ Bə-zhɔ-zhe zhe kǎ-zɔ̌m ń jɔ̃̀ wa, n kwè də̀vɛ̃́ ǹdə́ wẽ̀ rə̀ gùlí dwã nɛ, n ló kǎ-zɔ̌m mɔ́ wẽ́ rə sú pyáám : Lũ w lyì-bəlwǎlsɛ́ gakó m’a nyɔ̀ ya, bə zə kǎ-zɔ̌m kùr ne, bə jə̀l yə. ¹⁰ À m’a bwə̀l ywẽ̀ né nə̀myɛ́ mɔ́ a byili twéé twéé gakó kɔn m’ê la gaga ; À m’a nún a pə Zhakɔbɛ Yi rí ni.