¹ Asafɛ nwə̃́ə̃́. Ǎ Yi, wɔ́ bə̀kɔ́n yil ǹ já ǹ nə́ yǎrh nə́ba tɛ̃́ twéé twéé gakó mó ? Wɔ́ bə̀kɔ́n yil ǹ lyim zɛ̃̀ rə̀ n’ê yì ǹ gɔ-dɔ́m jàà y vwàmá nɛ́ mɔ́ ? ² Lyǐrh ǹ dwí rí ǹ zwẽ shãã shãã ga ǹ cǐ mú yò, dwí rí ǹ zwẽ rə̀ wɔ́ ǹdə ǹ cəl kwálá ta mɔ́ ! Lyǐrh Səyɔ̃ pyɔ̀ w ò wɔ́ ǹ jòmə̀ jàà y mɔ́ yò ; ³ zɛ̃̀ ń zhẽ̌ ǹ nà ń bə̀ ń nyǐ jààsɛ́ bə̀ n’ê cɔ̀ twéé twéé mó mawé ! Nyǐ zù-bal mɔ́ cɔ̀ wẽ̀ ré ǹ jì y wẽ́ mó gakó. ⁴ Ǹ zwə̀ bé tú bə̀ b’e zhì ǹ jì y wẽ́, bə zhì è cəcəl w bə swər ǹdə bwaarɛ ta ; bə kwè bə̀ sə̀pwà nyaarhɛ wẽ̀ bə cĩ́ è wẽ́. ⁵ Bə̀ nɔ bɛ ǹdə wɔ́ lò ń zə dòló ń ŋwɛ́nɛ́ tú kɔ̀bɔ́ ò zù wẽ́ ń nə́ ń kà ta ; ⁶ è yə̀ jíjírhí yé, bə j’a zə dòló ǹdə́ shèlè bə kà wẽ̀ ré rə̀ sə̀l mó bə yəwɛlɛ. ⁷ Bə ji ǹ jì y myǐn ; bə wǔr jì y ǹ yil ré ŋwɛ́nɛ́ è wẽ́ mó, bə ce y jìmdi. ⁸ Bə zɛ̃̀ bə̀ n’ê zɔ̀m bə̀ wẽ́ bə̀ zhe : Wɛ̀rhɛ́-na nə́ wɛ̀rhɛ́ bɛ ǹdə́ jàn ! bə zɛ̃̀ bə ji vwĩ̀-jùúlí tənà w mɔ́ gakó myǐn. ⁹ Nyǐ èlǎsɛ́, nə̀ k’é bə nə́ nyaarhɛ́ nɛ yé ; Yi nyì-zwẽnnə kə́ ń tɛ̀nɛ́ nɛ́ yé, lò lò myɛ tɛ̀nɛ́ nə́ wẽ́ ń yě dǒ dɛ̃ rə̀myɛ́ la zhɔ̌ yé. ¹⁰ 1Ǎ Yi, lwɛlɛ cə́bal mɔ́ mà n já ń nə́ ń tùrh mó ń la mə n yí dǒ, dǒ dɛ̃ zù-bal mɔ́ mà n yẽ̌ ǹ yil ré fuuli mú ni ? ¹¹ Wɔ́ bə̀kɔ́n yil ǹ kwɛ̃̀ ǹ jɛ̃̀ yá, ǹ jə̀-jĩ́ jɛ̃̀ y ń ce è kwã nɛ́ mɔ́ ? Vǔr ǹ jɛ̃̀ yá ! zhìlì zwə̀ bé yò. ¹² Yi, ǹ wɔ́ à pyɔ̌ kùr-ju yi ní ga, wɔ́ ǹmyɛ́ ǹ nə́ ǹ twĩ̀ bɛlɛ jú tumə né cɛ yó. ¹³ Ǹ zɔ ǹ jàn rɛ́ ń bɔ̀n nə̀fɔ̀lɔ̀ w dwã wa, ń mà bǔ-wẽ̀ ré nánjə́gáárɛ́ ywẽ́ ń ywarh nɛ̃̌ mɔ́ wa ; ¹⁴ ń mà nyù w nánfɔ̀lɔ̀ w yó ń yəywɛlɛ, ń pə gɔ-wẽ̀ ré ne rə dɔ̃̀. ¹⁵ Ǹ ce nɛ̃̌ shí nə̀-bùlsi wẽ́ mə du, ń kù nə̀gwààlɛ, nɛ̃̌ dùr rə̀ wẽ́. Ń zɛ̃̀ ń ce bù-fwàlsɛ shɛ̀bɛ́ sə̀ y’à t’â wĩ gaga mɔ́ wĩ sə̀ pyě nánkùlsi. ¹⁶ Wɔ́ ǹmyɛ́ ǹ cǐ nə̀nyɔ́nɔ́ wá, wɔ́ ǹmyɛ́ ǹ cǐ cəcɛ̃ y myɛ ; ǹmyɛ́ wɛ̀rhɛ́ pwẽ̀ ré ǹdə́ nə̀nyɛ́nɛ́ yá. ¹⁷ Ǹmyɛ́ ǹ cĩ́ cɛ y gə́ zhǐ ní nyí rí gakó rə̀ jàà wa, ǹmyɛ́ ǹ wɛ̀rhɛ́ cə-lumu yi, ǹmyɛ́ ǹ wɛ̀rhɛ́ wàr yi. ¹⁸ Lyǐrh bə̀ zù-bal mɔ́ nə́ ń tùrh Bə-zhɔ-zhe, bə̀ dwí tɛ̀bɛ́ rə̀ bə surhə n’ê fuuli ǹ yil ré ! ¹⁹ Ǹ bə̀ká yẽ̌ ǹ èpwèné ne ń pə gɔ-wẽ̀ ne rə zə yé, ǹ bə̀ká swě ǹ zúzúnú cə́bal mɔ́ myə̌l ré yò ń mɛ̃ nɛ́ yé ! ²⁰ Nyǐ dɔbrɛ́ yò ! bə̀ nyǐ tənà y jààsɛ́ gə́ bɔ̀ mɔ́ ce è lyì bí n’ê pyɛ́nɛ́ dwã è wẽ́, ce jàn wɔ̀rhɔ́ cìnə́ tú bə sú è wẽ́. ²¹ Ǹ bə̀ká yẽ̌ lò mó mɔ̀bɔ́ bə̀ n’ê nɔ̀m tɛ̃́ mɔ́ nɛ n kwɛ̃̀ ǹdə́ cìzhìl yé ! mùnì ga zúzúnú cə́bal ǹdə́ nə̀mɔ̀ mɔ́ ga zǔl ǹ yil ré ! ²² Ǎ Yi, zɛ̃̀ dɛ̃̌, zwẽ ǹ cìn nyí ni ! Lyǐrh ǹ tùùrhí bə surhə zhe cə́bal mɔ́ nə́ ń tùrh mó twéé gakó mó yò ! ²³ Ǹ bə̀ká swě ǹ mɔ̀n jə̀-pwə̀lə́ né ǹ zwə̀ bé n’ê mà, ǹdə́ sɔ̀ w kɔ̀bɔ́ byɛ̀bɛ́ bə̀ zɛ̃̀ bə̀ n’ê bwí ǹdə́ mɔ́ ò də̀ zhɔ̌ kɔn mɔ́ yò yé.