¹ Asaafɛ nwə̃́ə̃́. Zhə̀nà, Yi n’ê wɛ̀rhɛ́ cɛ̀nɛ̀ Esərayɛl yilə, rə̀ n’ê wɛ̀rhɛ́ lyì bí byɛ̀bɛ́ bə̀ wɔ́ wu-põ̀ cìnə́ mó cɛ̀nɛ̀. ² Ǹdə́ rə̀myɛ́ ga à y’à la à nà mǎ, à nà y’à dǎl námpɔ́lɛ́ y s’e swə̌r ; ³ bə̀ à y’à n’â dùr bə̀-surhə-zhe cìnə́ bwɛ̃̌, à gə́ n’â nyǐ lyì-bəlwə̌lsɛ́ gə́ só sə̀ cìn mú yilə. ⁴ Sə̀ n’ê jí sə̀ swí nə nù, sə̀ yala nɛ́ só nə̀ cìnə̀, kaka t’â zhìlì sə̀ wu ni kɔn m’e la sə̀ cù ; ⁵ nɔ̀nɔ̀ w kɔ̀bɔ́ ò n’ô zal numbyínsí mú òdù ga t’â zal yé, sə̀ t’â nɛ còrhò-tum ǹdə lyì bí dwã bɛ́ ta yé. ⁶ Rə̀myɛ́ ce sə y’a zɛ̃̀ sə ce cìn-byilu sə byã nɛ́ ǹdə dɛ̀mɛ̀ ta, sə zù jàn wɔ̀rhɔ́ tumə ǹdə kàmə̀zwǐ ta ; ⁷ Lwɛlɛ n’ê shí sə̀ wẽ́ rə̀ dwi, sə̀ wun bùlə̀ né n’ê dwi pwẽ̀ ne. ⁸ Sə̀ n’ê mɔ̀n lyì bí, sə̀ m’ê zɔ̀m wu-bárhɛ́ zɔ̀mà bə̀ sə̀ la lyì bí nɔ̀nɔ̀ ; sə zɛ̃̀ sə̀ n’ê zɔ̀m cìn-byulu zɔ̀mà. ⁹ Sə zhẽ̌ sə̀ nyə́ sə ce nə vò gaga dɛ̃̌ yi wə, sə̀ mə̀jə̀ə̀lé zɛ̃̀ rə wɔ cɛ yó rə̀ n’ê zhə̀l rə̀ m’ê byɛ́lɛ́ ya. ¹⁰ Wɔ́ rə̀myɛ́ yilə, ń dwí rí k’a pyìrhí rə̀ yě rə zǎ mə̀jə̀ə̀lé səta, ń dwí rí la pyà nɛ̃̌ nánzhəzhɔ̌ rə nyɔ̀. ¹¹ Ń dwí rí zɛ̃̀ rə̀ n’ê zɔ̀m rə̀ zhe : wɔ́ etər Yi la tó né rə lwar ? wɔ́ etər Dɛ̃̌Dɛ̃̌ cə́bal mɔ́ la tó n lwar. ¹² Wɔ́ èta, kɔn wɔ́ nɛ́ ǹdə́ lyì-bəlwǎlsɛ́ : Sə̀ só sə̀ cìn twéé twéé, sə̀ jɛ̃̀-kɔn rɛ́ j’â n'ê pùlə̀. ¹³ È nə gə wɔ́ èta, sə́ nyǐ wɔ́ nánfò yil à pyà s’a yə̀ wu-põ̀ cə́bal, sə́ nyǐ wɔ́ nánfò yil à sàm à jɛ̀sɛ́ a zù bə dóó zhe cìnə́ bé wẽ́ : ¹⁴ Dɛ̃ gakó à n’â nɛ zwini, cɛ gə lɔ́ gakó à còrhò-tum j’â ŋwɛ́nɛ́. ¹⁵ À gə zɛ̃̀ à wə̀lə̀ : à m’a zɔ̀m ǹdə bə̀ ta, sə́ nyǐ à m’a myìnì ǹ dwí rí byǎ bɛ́. ¹⁶ À gə tɛ́rɛ́ rə̀ yò, mùnì ga a sú rə̀ kùrə̀, e jǐrh zwini nánfɔ̀lɔ̀ à yírhə́ wə, ¹⁷ a vò a m’a zù Yi còrhó-jì y wə ; mùnì a zhìlì à yala nɛ a lwar lyì-bəlwǎlsɛ́ yó-gúrə́ y gə́ la nɛ́ yál. ¹⁸ Zhə̀nà, ǹ cĩ́ si sɔ́msɛ shɛ̀bɛ́ sə̀ n’ê swə̌r yó, ǹ la ń ce sə tu tɛ̃́ ń zhìlì sə̀ yò. ¹⁹ Nyǐ wɔ́ kùr yó, twər rə̀dù sá, bə̀ m’a púrí sə̀ cɔ̀ ! bə̀ vùr se, sə̀ jé tɛ̃́, sə̀ yó-gurə́ y jàr jàr e yí ! ²⁰ Cǐnnə, ǹ gə shí ǹ jan w ǹ nə́ ǹ zɛ̃̀, ǹdə́ ǹ ce sə jé tɛ̃́ bə̀ swě sə̀ gə́ y’à nyɛ̌ nɛ́ ǹdə wɔ́ dàrhà lò dàrh n zɛ̃̀ jan w n swě nə̀ yò ta. ²¹ À wu w gə́ y’à zɛ̃̀ ò n’ô zhizhiri yó né, à pwírí kɔn n’ê zwè ne à wẽ́, ²² à y’à jǐrh námməyuru, surhə k’ê tɛ̀nɛ́ yé, a zɛ̃̀ jǐrh ǹdə vwàmá ta ǹ yé né. ²³ Ǹdə́ rə̀myɛ́ ga yírh wə, à y’à gwẽ̌ ŋwɛ́nɛ́ ǹdə́ mɔ́ twéé twéé, ǹ zɔ à jə̀-jĩ́ ni ; ²⁴ ǹ mà ń zə nɛ a vò ǹdə ǹ còrhò mó gə́ n’ê byili ní, ń zɛ̃̀ ń zwẽ ne ǹ zùwə́ y wẽ́. ²⁵ Mɔ̌ lò dõ à zhe dɛ̃̌ Arəzana w ǹdə́ è gə də̀ ǹmyɛ́ ! Cɛ yó cìcì myɛ, wɔ́ ǹmyɛ́ yó w à n’â nyǐ ní. ²⁶ À yala nɛ́ ǹdə́ à wu n'ê jí myǐn : Sə Yi m’a yə̀ à pàtá nə́kulu à wu w yilə, ǹdə́ à cəl kɔn twéé twéé gakó. ²⁷ Nyǐ lyì bí byɛ̀bɛ́ bə̀ n’ê zhǐr ǹ nyí ni bə̀ zhə̀l kwã nɛ́ gaga mɔ́, cìnə́ nábá bɛ́ n’ê cì ; byɛ̀bɛ́ bə̀ bə ǹ zhə̀n zhe mó cìnə́ nábá n’ê jé tɛ̃́ cɛ yó. ²⁸ Sə è gə wɔ́ àmyɛ́ yilə, wɔ́ ǹmyɛ́ nyí ni à bwəlse ne, bə̀ ǹ wɔ́ à cɛ̀nɛ̀ rɛ́ : Cǐnnə, Bə-zhɔ-zhe wɔ́ ǹmyɛ́ sono à cĩ́ à shòò jàà y nɛ́, mùnì ga a bwə̀l ǹ tũ̀-fwààlɛ́ yò a byili.