¹ Saləmɔ nwə̃́ə̃́. Ǎ Yi, pə ǹ bùrsí bǔr mó dwí rí pyɔ̌ mɔ́ nɛ, pə ǹ cángá tumə né dwí rí pyɔ̌ mɔ́ byǐ mú ni ! ² N mə n kə́ ǹ dwí rí bùrsí ǹdə́ cángá, sə n kə́ ǹ zúzúnú cìnə́ bé myɛ bùrsí ǹdə kɔn gə́ mə̌ nɛ́. ³ Yə̀-zùlə́ m’a jòm pyàr rɛ́ yó dwí rí yilə, rə̀ m’a jòm pyǎlsɛ́ myɛ yó kɔn tɛ̀bɛ́ rə̀ n’ê wɛ̀rhɛ́ rə̀ mə̌ mɔ́ yilə. ⁴ Ń mà n zwẽ dwí rí zúzúnú cìnə́ bé nyí ni, n vwǎrh zúzúnú cìnə́ bé byǎ bɛ́, n nɔ̀ lò mɔ̀bɔ́ ń nə́ ń nwɛ̀nɛ̀ bɛ mɔ́ tɛ̃́ n bɔbɔlɛ. ⁵ Nə̀nyɛ́nɛ́ y gə́ j’â ŋwɛ́nɛ́ gaga, cànà y gə j’â n’ê dwi gaga, èlãsɛ̃́ lũ w lyì bí ǹdə́ lyì bí byɛ̀bɛ́ bə̀ bàn mɔ́ ga m’a nyɛ̀ mɔ́. ⁶ Pyɔ̌ mɔ́ mà n yə̀ ǹdə wɔ́ dwà kɛ̀bɛ́ è n’ê nywɛ̀ e swẽ́ cɛ y e ce twɛ́nɛ́ cɛsɛ́ wẽ́ mó ta. ⁷ Dwã nɛ́ nə̀myɛ́ mɔ́ wẽ́, wu-cángá cə́bal m’à n pùr pùnə́, n zə wu-nyɔ̃̀ nánfɔ̀lɔ̀ kɔn m’e yí cànà y k’ê t’â la nɛ́ yál yé. ⁸ Ń mà n zhì nə̀fɔ̀lɔ̀ òdù ni n cìní n mə n vò ò dõ ne, n zhì bwǐ èdù ni n cìní n mə n yí lũ cə-yala gakó. ⁹ Gɔ-e-lũ èpòlò w lyì bí m’a bə̀ bə wùlì tɛ̃́ ń yé né, ń zwə̀ bé m’a mù shó. ¹⁰ Tərəshiisi ǹdə́ cɛmɛ nɛ́ nɛ̃̌ mɔ́ kə́kɛ́lɛ́ nɛ mɔ́ pyǎ bɛ́ m’a kwɛ̃̌ mɔ myə̀l-kwǎndɛ, Səba ǹdə́ Saba pyǎ bɛ́ m’a pɔ̃ jɛ̃̀-kɔna. ¹¹ Pyǎ bɛ́ gakó m’a wùlì ń yé né, tənèsé gakó lyì bí m’a twĩ̀ bə pɔ̃. ¹² Bə̀ nyǐ ń mà n vwǎrh nə̀mɔ̀ mɔ̀bɔ́ ń nə́ ń byẽ̀ ń ce mo mó, ń mà n vwǎrh zúzúnú cə́bal mɔ́bɔ́ ń bə sɛ̃ɛ̃́ zhe. ¹³ Ń mà n dùr lò mɔ̀bɔ́ ń bə lò zhe, ǹdə́ zúzúnú cə́bal nɔ̀nɔ̀, ń mà ń zwẽ nə̀mwà myə̌l. ¹⁴ Ń mà n zwẽ be nɔ̀nɔ̀ ǹdə́ jàn wɔ̀rhɔ́ mɔ́ wẽ́, bə̀ bə̀ jal mɔ́ zhe kùr dɛ̃́dɛ̃́ ń yírhə́ wə. ¹⁵ Bə̀ m’a zə myə̌l, bə zwẽ Səba sánə́má mɔ́ bə pɔ̃ ; Bə̀ m’a ce Yi dɛ̃ gakó ń yilə, bə ce Yi nə́bán dɛ̃ gakó ń yilə. ¹⁶ Bəle y m’a byì nánzhəzhɔ̌ pyàr rɛ́ yó tənà y wa, e byì è ywẽ n’ê mà dwã nɛ́ ǹdə Ləbã cèmé ta ; lyì bí m’a mà pùnə́ ǹdə wɔ́ gɔ ta. ¹⁷ Ń yil ré m’a j’â ŋwɛ́nɛ́ twéé twéé, ǹdə nə̀nyɛ́nɛ́ gə́ ŋwɛ́nɛ́ nɛ́ ta, ń yil ré m’a j’â ŋwɛ́nɛ́ nɛ́ gaga ; ń jàn yilə, lyì bí m’a jâ n’ê ce Yi nə̀bán dwã yilə, tənèsé lyì bí gakó m’a wɔ̀ bə̀ ń wɔ́ wu-nyɔ̃̀ cə́bal. ¹⁸ Bə-zhɔ-zhe nə còrhó. Yi, Esərayɛl Yi rí, wɔ́ rə̀myɛ́ dúdú rə̀ n’ê wɛ̀rhɛ́ tũ̀-fwààlɛ ! ¹⁹ Bə̀ rə̀ yil ré rə́ zhe zùwə́ mó nə còrhó byinə nə̀ bə zhɔ̌ zhe yilə ! Amyɛn ! Amɛn ! ²⁰ Wɔ́ Esəyi byǐ Dəvyidi yi-cər ré ga.