Kǝ̀kàl-fwɛ̀lɛ̀ 71

1 Bə-zhɔ-zhe ! Nyǐ wɔ́ ǹmyɛ́ sono à n’â pyà à shòò jàà nɛ́ : mùnì ga à bə̀k’a jí cìzhìl gaga yé ! 2 zwẽ ne, sə́ vwǎrh nɛ, ǹ cángá tumə né yilə ! Pyèrhè ǹ zhɛ̃̌ ń cili à sono, sə́ sɛ̃ nɛ ! 3 Yál à pàtá nə́kulu kɔ̀bɔ́ à y’a ŋwɛ̀nɛ́ a kwɛ̃̀ a vò a shèè ò yó dɛ̃ gakó mó ! ǹ gu ǹ wẽ́ ǹ la nɛ vwǎrh, bə̀ ǹ wɔ́ à pàtá nə́kulu ǹdə́ à shòò jàà è lú e kə́kɛ́lɛ́ mɔ́. 4 À Yi, zwẽ ne lyì-bəlwɛ̀lɛ́ y jɔ̃̀ wa, lwɛlɛ cə́bal mɔ́ ǹdə́ jàn wɔ̀rhɔ́ cə́bal mɔ́ jɔ̃̀ wa ! 5 Cǐnnə, Bə̀-zhɔ-zhe ! nyǐ wɔ́ ǹmyɛ́ sono à n’â dɛ̃̀ kɔn nɛ́, wɔ́ ǹmyɛ́ jɔ̃̀ à co à cìn ní à bə̀sɔ́nɛ́ yi ní ga. Wɔ́ ǹmyɛ́ nɛ à zhí à ná pǔ w yi ní ga ; 6 wɔ́ ǹmyɛ́ ǹ ce a du à ná pǔ wə ; bə̀ ǹ wɔ́ à zǔl kɔn à n’â zǔl twéé twéé à t’â zhɛ̀ yé. 7 À wɔ́ ǹdə màmyɔ̃ kɔn ta, lyì nánzhəzhɔ̌ yilə, sə ǹmyɛ́ wɔ́ à shòò jàà è zhe jàn. 8 Bə̀ à nyí rí sú ǹdə́ ǹ còrhó wə́, sə rə j’â n’ê cèrhé mó dɛ̃ gakó ! À gə tú à cɛ, sə ǹ bə̀ká zhɛ̃̀ nɛ yé ; 9 à jàn gə tú rə̀ n’ê zhɛ̀, sə ǹ bə̀ká yẽ̌ ne yé ! 10 Bə̀ nyǐ à zwə̀ bé n’ê zɔ̀m à zɔ̀mà, lyì bí byɛ̀bɛ́ bə̀ n’ê jə̌l à myə̌l ré mó, cìnə́ nábá bɛ́ n’ê nɛ dwã à yil 11 bə̀ zhe : Nyǐ Yi yẽ̌ mo ; pú-na ǹ kùr á jì, zə-nə mɔ ; bə̀ lò lò tɛ̀nɛ́ ń la mɔ zõ yé. 12 Ǎ Yi, ǹ bə̀ká vò kwã nɛ́ gaga ń yẽ̌ ne yé ! À Yi, bə̀ làlà ń sɛ̃ nɛ ! 13 Ce bə̀myɛ́ byɛ̀bɛ́ bə̀ n’ê pyà à myə̌l ré vǔr mó, nə cìzhìl bə jé tɛ̃́ cɛ yó ! Ce bə̀myɛ́ byɛ̀bɛ́ bə̀ n’ê pyà à gu mu, cìzhìl pú bi, bə tùrh be ! 14 ! Sə è gə wɔ́ àmyɛ́ yilə, wɔ́ ǹmyɛ́ sono à n’â dɛ̃̀ kɔn nɛ́ twéé twéé, à m’a j’â n’â zǔl mó gaga. 15 Dɛ̃ gakó à má bwə̀l ǹ vwǎrh mɔ́ ǹdə́ ǹ cángá tumə né yò a byili, bə̀ à yə̀l rə̀ yə̀l rə̀ yó à gál à byili yé. 16 Cǐnnə, Bə-zhɔ-zhe ! à m’a zɔ̀m ǹ tũ̀-fwààlɛ́ rə̀ bə dõ zhe mó yò a byili. Wɔ́ ǹmyɛ́ cángá tumə né dúdú yò à la lyǐrh. 17 Ǎ Yi ! ǹ cèrhè ne ǹ nyə́ né à bə̀sɔ́nɛ́ yi ní ga, sə wɔ́ ǹ tũ̀-fwààlɛ́ yò à n’â bwə̀l à byili kɔn m’e yí zà. 18 Ǎ Yi ! bá à gə tú à cɛ à ywə́rh pyìrh myɛ, sə ǹ bə̀ká dwĩ̀ ni tɛ̃́ yé, mùnì ga a bwə̀l ǹ jàn rɛ́ a byili èlǎsɛ̃́ lyì bí ni, sə a bwə̀l ǹ ŋwɔ̀nɔ́ w a byili byɛ̀bɛ́ bə̀ bàn mɔ́ myɛ nɛ ! 19 1Ǎ Yi ! nyǐ ǹ cángá tumə né yú dɛ̃̌ yi rí wə ; ǹ twĩ̀ tumə nánfààlɛ̀ : Ǎ Yi ! wɔ́ mɔ̌ lò ń mà n mɛrhɛ ǹmyɛ́ ? 20 Ǹ ce nə́ nə zúzúnú ǹdə́ zwini ; sə ǹ mà ń k’á pə nə́ba nyǔ, ń ce nə́ k’á shí cɛ y gwáárɛ́ nánlyilyǔmrí wẽ́ nə́ du. 21 Ce à yó k’a kwɛrhɛ o zhẽ̌ dẽ̌, ká ń zə à wu ni kə́dò. 22 À m’a zɛ̃̀ a dú bɔ̀rɔ́ a m’a cèrhé mó, à m’a nún a cèrhé à Yi rí, à m’a dú bɔ̀rɔ́ a m’a cèrhé ǹmyɛ́, Esərayɛl Yi rí ! 23 Èta, à m’a cèrhé mó, wu-nyɔ̃̀ m’a pyǎ à yə́lə́ yó, ǹ gə́ vwǎrh nɛ mɔ́ wu-nyɔ̃̀ wá ; 24 Dɛ̃ gakó à m’a zə à nyí a m’â bwə̀l ǹ cángá tumə né à byili, bə̀ nyǐ cìzhìl ǹdə́ yúyúrú pú lyì bí byɛ̀bɛ́ bə̀ n’ê pyà à yò zhùlù mú ni.