¹ Nwíísí núnnə bé yé né cə́bal mɔ́. Lyiisibá yə̀-bya ju nwə̃́ə̃́, Dəvyidi nwə̃́ə̃́. ² Ǎ Yi, vwǎrh nɛ ! Bə̀ nyǐ nàná bɛ́ n’ê pyà à myə̌l vǔr. ³ À mɔ́rh bɔ̀bɔ̀rɔ̀ wẽ́, à wàr à la à nèrh yó zhǔ yé ; À tu gɔ́rɔ́ nánlyilyùmú wẽ́, nɛ̃̌ mɔ́ mɔ́lɛ́ nɛ. ⁴ À búbwéé búbwéé a lyɛ̀ɛ̀, à byã mə́gɔ̀lɔ́ w kùl kókó, à Yi, à nyǐ nyǐ ǹ kwã nɛ́ à yírhə́ n’ê jí myǐn. ⁵ Bə̀ já nánjə̀jòlò du ywẽ́sé à yó w mó, lyì bí byɛ̀bɛ́ n’ê súl ne, bə̀ n’ê pyà à gu mú jàn rɛ́ du ni, à zwə̀ bé bə bùrì zhe yé. Bə̀ n’ê ce à cèrhè kɔn tɛ̀bɛ́ à yə̀ ŋwɔ̀l mɔ́. ⁶ Ǎ Yi, ǹ yě à nyə̀nyààrɛ́ yò, à dwə́ə́ré yə̀ ǹ yé né shèè gaga yé. ⁷ Cǐnnə, Bə-zhɔ-zhe mɔ̀bɔ́ ǹ cǐ jàn cìnə́ gakó mó ! ǹ bə̀ká ń yẽ̌ lyì bí byɛ̀bɛ́ bə̀ n’ê dɛ̃̀ kɔn ǹ sono mó né, bə̀ bùlə̀ né gùlí dwã nɛ à yil yé, Esərayɛl Yi ! ǹ bə̀ká yẽ̌ cìzhìl jí lyì bí byɛ̀bɛ́ bə̀ zhe ǹ zhə̀n mɔ́ à yil yé. ⁸ Bə̀ wɔ́ ǹmyɛ́ yil à shɛ̀nɛ́ tùùrhí, bə̀ wɔ́ ǹmyɛ́ yil cìzhìl pyi à yé ne, ⁹ ce à jǐrh zhə-bal à da-dyǎ bɛ́ yilə, lò mɔ̀bɔ́ à ná-byǎ bɛ́ k’ê yə̀l ń pár yé. ¹⁰ Ǹ jì y sónó w à zhe mó n’ê jí ni myǐn, kɔn súlí myɛ, lyì bí byɛ̀bɛ́ bə̀ n’ê tùrh mó mó tùùrhí n’ê jòm à yó wə. ¹¹ À n’â kúrh à yə́-nàná n’ê lwé tɛ̃́, à n’â lyẽ à nyí, e jà wɔ́ rə̀myɛ́ gaga rə̀ n’ê vwɛ̃ tùùrhí rə̀ pɛ nɛ ; ¹² à zɛ̃̀ a kwè yóló a yə̀ gàmmə-zwǐ a zù, bə j’a zə nɛ bə yə̀ səswalá, bə̀ n’ê səswal bə̀ byili. ¹³ Lyì bí byɛ̀bɛ́ bə̀ jě tɛ̃́ cɔ w bwə̀rə̀ y nyí ni mú n’ê zɔ̀m à yò, a jǐrh lyì byɛ̀bɛ́ bə̀ n’ê nywɛ̀ sə̀-kùlù w mú nwə̃́ə̃́ bə̀ n’ê núnə. ¹⁴ Ǎ Bə-zhɔ-zhe ! nyǐ wɔ́ ǹmyɛ́ nɛ à n’â lwə̀l à yi-co w wẽ́ ! Ǎ Yi, ǹ sónó yi gə yú à yilə, sə́ tə̀ ǹ wu-bɔ̀nɔ̀ w nánfɔ̀lɔ̀ w yilə ! sə lyár nɛ, a lwar zhə̀n ga bə̀ ǹ nə́ ǹ sɛ̃ à kúrhí ! ¹⁵ Vǔr ne bɔ̀bɔ̀rɔ̀ w wa, à bə̀k’a k’a mɔ́rh ò wẽ́ yé ! mùnì ga a lú à zwə̀ bé yé né, sə a du gɔ́rɔ́ w nánlyilyùmú w wẽ́ ! ¹⁶ Sə nə̀-zha y bə̀k’a k’e yɛ nɛ yé, à bə̀k’a mɔ́lɛ́ gɔ́rɔ́ w nánlyilyùmú w wẽ́ yé, gɔ́rɔ́ w bək’a pyi à nyí ni yé. ¹⁷ Bə-zhɔ-zhe ! zwẽ à lwə̌l mó, bə̀ ǹ wu-bɔ̀nɔ̀ w já. Tə̀ ǹ nɔ̀nɔ̀-dǔr mó yilə, sə́ pyìrhí ǹ yé ń ce à sono, ¹⁸ ǹ bə̀ká shèè ǹ cìn ǹ tùntùnnə mó ne yé ! Ce jàn nɛ́ làlà ń zwẽ à lwə̌l mó, nyǐ à ŋwɛ́nɛ́ zwini wẽ́ ! ¹⁹ Twẽ̌ ń bwəlse à ywə́lə́ y ne, ń vwǎrh ya ! Vwǎrh nɛ à zwə̀ bé yilə̣ ! ²⁰ Ǹ yě bə̀ bə̀ n’ê tùrh ne, bə̀ n’ê fuuli ni, bə̀ n’ê ce ne cìzhìlə̀. Lyì bí byɛ̀bɛ́ bə̀ n’ê nwɛ̀nɛ̀ nɛ mɔ́ gakó ŋwɛ́nɛ́ à yé né. ²¹ Fuulu mú ce à shíshùrhú w n’ô mà, rə ce a tu nə̀bwɛ̀nɛ̀. À y’à n’â dɛ̃̀ sə dùr à nɔ̀nɔ̀, sə à dɛ̃̀ dɛ̃ a ga, à dɛ̃̀ lyì byɛ̀bɛ́ bə̀ n’ê zal lò wu ni mú myɛ, sə à yə̀ lò lò nɛ yé. ²² Bə̀ zɛ̃̀ bə̀ k’a kwè cə́m mɔ̀bɔ́ mə̀ n’ê gwi lò mó, bə ce à kùjú wə. Nə̀nyɛ̀lɛ̀ gə zhe ne wɔ́ də̀vɛ̃́ kárɛ́ bə̀ y’a pɛ̃ a nyɔ̀. ²³ Rə̀myɛ́ ce, bə̀ kùjúr rí yál pɔ̀mɔ̀ ǹdə́ gùndwǐ wẽ̀ tɛ̀bɛ́ bə̀ zhe rə̀ zhə̀n mɔ́ bə̀ yilə. ²⁴ Bə̀ cə-byṹ pyi bə̀ yírhə́ né nə̀ k’ê bə̀ nɛ́ nɛ yé, ce bə̀ kó tɛ̃́ bə̀ m’ê zhə̀l twéé twéé gaga ! ²⁵ Ló ǹ lyìm rí bə̀ yó, ce ǹ lyim rí nánfɔ̀lɔ̀ w yí bí ! ²⁶ Cɔ̌ bə̀ jòmə̀ jààsɛ́, mùnì lò lò kə́ ń bə̀ bə̀ kwə̀árhé wẽ́ yàl yé ! ²⁷ Bə̀ gə́ nwɛ̀nɛ̀ lò mó mɔ̀bɔ́ ǹ yà ǹ pɔ còrhò-tum mú yilə, bə̀ gə́ n’ê zɔ̀m lyì bí byɛ̀bɛ́ ǹ nə́ ń cɛ̀mɛ̀ mɔ́ yilə. ²⁸ Súlí lwɛlɛ bə̀ lwɛlɛ rɛ́ nɛ, mùnì ga bə̀ twə́r bə̀k’a yə̀ ǹ nɔ̀nɔ̀-dǔr mó wẽ́ ! ²⁹ pɔ́pɔ̌ bə̀ yilə né nyǔ sɛ́bɛ́ rɛ́ wẽ́, mùnì ga nə̀ bə̀k’a tó wu-cángá cìnə́ ne nə kɛ̃ yé ! ³⁰ Sə àmyɛ́ wɔ́ zúzúnú cə́bal à n’â nwɛ̀nɛ̀ : Ǎ Yi, bə̀ ǹ sɛ̃ɛ̃́ zhẽ̌ à yó dɛ̃̌ ! À m’a zə nwíísi a zǔl Yi yil ré, à m’a zhẽ̌ rə̀ yil dɛ̃̌ ǹdə́ nwíísi. ³¹ Wɔ́ rə̀myɛ́ Bə-zhɔ-zhe só du nə̀-bya ǹdə́ è nyimə ǹdə́ è nə̀-càr. ³² Wɔ́ rə̀myɛ́ Bə-zhɔ-zhe só du nə̀-bya ǹdə́ è nyimə ǹdə́ è nə̀-càr. ³³ Zúzúnú cìnə́ bé gə nɔ rə̀myɛ́ mɔ́, bə zɛ̃̀ bə̀ n’ê fùù bə̀ zhe : Ámyɛ̌ byɛ̀bɛ́ á n'á pyà Yi mú, rə̀ m’a pə ába myə̀-èdɔ̀lɔ̀. ³⁴ Bə̀ Bə-zhɔ-zhe nə́ ń cili nə̀mwà yi-co, ǹ tá ń zhɛ̃̀ ń lyì bí byɛ̀bɛ́ bə̀ yàl yómə mó yé. ³⁵ Bə̀ dɛ̃̌ yə né ǹdə́ cɛ y zǔl Bə-zhɔ-zhe, nə̀-fɔ̀lɔ̀ ǹdə́ wẽ̀ ré tɛ̀bɛ́ rə̀ ŋwɛ́nɛ́ ò wẽ́ mó gakó zǔl Yi. ³⁶ Bə̀ Yi m’a vwǎrh Səyɔ̃, rə k’a ce bə kwɛrhɛ bə lù Zhidə cɛmɛ nɛ́ nə zhì nə̀ jààsɛ́ wa :