¹ Nwíísí yé né cə́bal mɔ́. Dəvyidi nwə̃́ə̃́. ² Yi shí tɛ̃́ rə zhɛ̃̀, rə̀ zwə̀ bé làà tɛ̃́, byɛ̀bɛ́ bə̀ n’ê bwí ǹdə́ rɛ mɔ́ dùr rə̀ yé né. ³ Ǹ jì bì bə̀ jé tɛ̃́ ǹdə nyɛ̀rh gə́ y’a jé tɛ̃́ nɛ́ ta ; bə̀ jé tɛ̃́ ǹdə wɔ́ tù-mɔ ò yə̌l myǐn w mú ní ta, lyì-bəlwǎlsɛ́ n’ê dùr sə̀ jé tɛ̃́ Yi né né. ⁴ Sə wu-cángá cìnə́ n’ê fùù ǹdə́ wu-nyɔ̀ Yi né né, bə̀ Yi n’ê ce bə̀ jí bɛlɛ rə̀ yé né. Bə̀ n’ê zhə̀l dɛ̃̌ ǹdə́ bə̀ n’ê fùù, ⁵ Nún-nə Yi, cèrhé-nə rə̀ yil ré ! Vǔr-na sɔ́má á pə lò mó mɔ̀bɔ́ ń tó vɔlɔ w ń nə́ ń zhə̀l ń bàn mɔ́ nɛ ! Wɔ́ Bə-zhɔ-zhe è wɔ́ ń yil ré : Fǔ-nə ǹdə́ wu-nyɔ̃̀ ń yé né ! ⁶ Bə̀tǎlsɛ́ da mɔ́, ejə̀nə̀ nyí ni zwẽnə mó, wɔ́ èta Yi wɔ́ nɛ́ rə̀ jì y wə. ⁷ Yi n’ê pɛ dwí lyì byɛ̀bɛ́ bə̀ yǎrh tɛ̃́ mɔ́ nɛ, rə̀ n’ê vwǎrh yómə́, rə ce bə swéné bə̀ cìnə̀ ; sə wɔ́ lyì byɛ̀bɛ́ bə̀ bə shɛ̀ nyí ni zõ yò mó, cìnə́ nábá bə̀ n’ê jòm cə-èpwə̀ə̀le wə. ⁸ Ǎ Yi, ǹ gə́ yà ǹ du ǹ dwí rí yé né, ǹ wɔ rə̀ yé né, ǹ zə rɛ ǹ mə́ ǹ zhə̀l gɔ-elũ èpòlò w yí ní, ⁹ cɛ y y’à n’ê zhízhǐ, dɛ̃̌ yə né n’ê yə̌l yi ní mú, Sənəyi pyɔ̀ w dom Yi né né, Esərayɛl Yi rí yé né. ¹⁰ Ǎ Yi, ǹ ce dwà nyɔ̀ e wɛ̀rhɛ́ cɛ̀nɛ̀, ń pə jàn ǹ cəl kɔn rɛ́ rə̀ y’à lyɛ̀ɛ̀ mɔ́ nɛ́. ¹¹ Ǹ dwí rí cĩ́ rə̀ jòmə̀ jàà tənà y ǹ tə̀ ǹ wu-bɔ̀nɔ̀ yil ǹ yà ǹ tɛnɛ zúzúnú cìnə́ bé yil mó wẽ́. ¹² Cǐnnə mó, pɔ zɔ̀mɛ̀ rə̀dù, ń tùntùnnə̀ bé bə̀ wɔ́ kana shə̀dɛ́ɛ́sɛ́ nánjə̀jóló w bə̀ n’ê bwə̀l yò-ècɔ̀nɔ̀ nyí rí bə̀ byili mú ni, n wɔ̀ : ¹³ Nyǐ pyǎ bɛ́ bə̀ cǐ shə̀dɛ́ɛ́sɛ́ mɔ́ bə̀ n’ê dùrə̀, bə̀ n’ê dùr bə̀ la, sə sə̀ kùkùl ré tɛ̀bɛ́ rə̀ dàl kɛ̀lɛ́ w mɔ́, zɛ̃̀ rə̀ pwà wẽ̀ ré tɛ̀bɛ́ sə̀ dùr sə yẽ̌ mó sə̀ n’ê tə̀lə̀. ¹⁴ Ǹdə́ ámyɛ̌ j’á pyě zulə́ jàà w á n’á shìrhə́, e jà épwèné y vɔ̀mɛ̀ nɛ́ j’a kwɛrhɛ nə zwìrhì ǹdə́ səbyì-kùlì, è kur rí j’â wɔ́ sánəmá námpúlí. ¹⁵ Dɛ̃̌-Jàn cə́bal mɔ́ gə́ jì pyǎ bɛ́ kwã nɛ́ cɛ y j’a jǐrh námpwã̀ ǹdə wɔ́ Təsalɔmɔ pyɔ̀ w nɛ̃̌ mɔ́ gə́ y’à zə dwã nɛ nɛ́ mɔ́ ta. ¹⁶ Yi pyɔ̀, Bashã pyɔ̀, pyɔ̀ ǹdə́ ò kúúrhí nánzhəzhɔ̌, Bashã pyɔ̀, ¹⁷ pyɔ̀ ǹdə́ ò kúúrhí nánzhəzhɔ̌, Bashã pyɔ̀, wɔ́ bə̀kɔ́n yil á n’â dùr pyɔ̀ w Yi yǎl rə cír ò la yə̀ rə̀ jàà rə jòm twéé twéé byinə nə̀ bə zhɔ̌ zhe mó bwɛ̃̌ ? Nyǐ Yi tá ń la w yõ̌ o cẽ ń jòmə̀ jàà yál twéé twéé byinə nə̀ bə zhɔ̌ zhe yil yé. ¹⁸ Bə-zhɔ-zhe eshə̃-vwɛ̃tur rí wɔ́ mɔ̀ɔ̀rhɛ shí-èlyè, mɔ̀ɔ̀rhɛ mɔ̀ɔ̀rhɛ ; Cǐnnə mó, ŋwɛ́nɛ́ rə̀ cəcəl wə, Sənəyi pyɔ̀ w ŋwɛ́nɛ́ Yi jì y wẽ́. ¹⁹ Ǹ zɛ̃̀ ń vò dɛ̃̌dɛ̃̌, ń zwẽ yómə́ ń ká ń mə́ ń bà, ń zwẽ numbyínsi sə̀ wɔ́ paánsɛ ; yó-kùùli cìnə́ m’a jòm Yi, Bə-zhɔ-zhe nyí ni. ²⁰ Bə̀ Yi nə còrhó dɛ̃ gakó ! Lyì gə n’ê nwɛ̀nɛ̀ nə́ba, Yi n’ê zwẽ nə́ba. ²¹ Yi wɔ́ Yi tɛ̀bɛ́ rə̀ n’ê vwǎrh nə́myɛ̌. Nə́ myə̌l ré ŋwɛ́nɛ́ Cǐnnə, Bə-zhɔ-zhe jɔ̃̀ wa, ce cu bə nə́ yàlà zhe yé. ²² Zhənà, Yi m’a mà rə̀ zwə̀ bé ywẽ́ rə bɔbɔlɛ, lyì bí byɛ̀bɛ́ yə̀-bəlɔ̀lɔ́ wɔ̀rhɔ́ wɔ́ bə̀ tum mú yə́-pǎlsɛ́ rə bɔbɔlɛ. ²³ Cǐnnə mó wə̀lə̀ : À m’a zə bɛ Bashã nɛ́ a k’a m’a kwɛ̃̀, à m’a vùr be nə̀-fɔ̀lɔ̀ kùr w wẽ́ wẽ́ gaga a k’a m’a bà, ²⁴ mùnì ga ń mɔ́rh ǹ nà jal wẽ́, mùnì ga ǹ zwə̀ bé yə̀ ǹ kǔlsi cəl kùjú sə̀ mə̀jə̀ə̀le yó. ²⁵ Ǎ Yi, bə̀ nɔ mɔ́ ǹ nə́ ǹ zhə̀lə̀, bə̀ nɔ à Yi rí rə̀ n’ê zhə̀lə̀, à pyɔ̌ mɔ́, ń bàn Yi jì y wə. ²⁶ Ǹdə́ núnnə ŋwɛ́nɛ́ yé né bə̀ n’ê núnə́, wò-dúúrí cìnə́ pú, kana-byǎ zɛ̃̀ bə̀ ŋwɛ́nɛ́ bə̀ cəcəl w bə̀ n’ê dwí gǔlsi bə̀ zhe : ²⁷ Esərayɛl nɛ̀mɛ́ ! ce-nə Yi nə̀bán dwã-gùúlí jisí wẽ́, ce-nə Cǐnnə mó nə̀báná ! ²⁸ Nyǐ Bɛ̃zhamɛ, bə̀ nyɛ̃́ mɔ́ námpɔ́lɛ́ y è cǐ bi mú, ǹdə́ Zhidə yó-cìnə́ ǹdə́ bə̀ shə̀dɛ́ɛ́sɛ́, ǹdə́ Zabyəlɔ̃ yó-cìnə́ bé, ǹdə́ Nəfətəlyi yó-cìnə́ bé gakó bə̀ ŋwɛ́nɛ́ gàà mɔ́. ²⁹ Nyǐ ǹ Yi rí pɔ nyí bə̀ ǹ yál jàn cə́bal ; Ǎ Yi, ce kɔn rɛ́ tɛ̀bɛ́ ǹ wɛ̀rhɛ́ nə́ yil mó zhì kẽkẽ ! ³⁰ Ǹ zhǐ ǹ jì y w ǹ nə́ ǹ jí pyɛ̀lɛ̀ Zhərəzalɛm yó ; pyǎ m’a zə nə̀cɛ̀ndɛ bə̀ m’e b’e pɔ̃́. ³¹ Nyáásɛ vwal-gɔ w vwǎm mɔ́ mə̀ n’ê ce ywẽ lò ne mó yó, ǹdə́ nə̀-byesé sə̀ tó dwã nánjə̀jóló mó, ǹdə́ dwə́ né nũ̌-bwə̀lsé, rə̀ n’ê wùlì tɛ̃́ ǹdə́ rə̀ sə̀-byì kùlsí mú ! Jǐ dwə́ né nyɛ̀bɛ́ nə́ só búlə́ né bú mú nə làà dɛ̃̌. ³² Lyì-fwààlɛ shí Ezhibti; Ecopyi lyì dùr bə bə̀ bə zhẽ̌ bə̀ jɛ̀rh bə ce Yi ni. ³³ Lũ pyə̀-tənèrh lyì, nún-nə Yi, zǔl-nə Cǐnnə mó ! ³⁴ Lyì-fwààlɛ shí Ezhibti; Ecopyi lyì dùr bə bə̀ bə zhẽ̌ bə̀ jɛ̀rh bə ce Yi ni. ³⁵ Lũ pyə̀-tənèrh lyì, nún-nə Yi, zǔl-nə Cǐnnə mó !