¹ Nwíísí núnnə bé yé né cə́bal mɔ́. Nwə̃́ə̃́. Lũ lyì, á gakó Zɛ̃̀-na á mà wu-nyɔ̀ búwéése a ce Yi ni, ! ² Nún-nə ń yil ré còrhó zùwə́ yə́, zǔl-nə ń zùwə́ ǹdə́ nwíísi ! ³ Wál-na Yi ni bə̀ : Ǹ tumə né n’ê zɛ̃̀ wu ni ! Wɔ́ ǹ jàn rɛ́ nánfɔ̀lɔ̀ w yil ǹ zwə̀ bé n’ê myìnì mú. ⁴ Cɛ y púlə́púlə́ n’ê wùlì tɛ̃́ ǹ yé né, è nún è pɛ mɔ́ ; è n’ê nún ǹ yil ré. ⁵ bà-nà á nyǐ Yi tũ̀-fwààlɛ́ ! Rə̀ tumə rə̀ zhì dɛ̃̌ rə̀ twĩ̀ numbyínsí yil mú n’ê zɛ̃̀ wu ni. ⁶ Yi n’ê lyə́r nə̀-fɔ̀lɔ̀ o jǐh cə-kùlì, lyì tó gàà mɔ́ bə lyɛ̃ ǹdə́ bə̀ nèrh ; rə̀myɛ́ ce, nə́ zɛ̃̀ nə́ fùù ǹdə́ wu-nyɔ̀ rə̀ jàn rɛ́ yilə. ⁷ Rə̀ n’ê jí pyɛ̀lɛ̀ byinə nə̀ bə zhɔ̌ yilə, rə̀ yírhə́ pyǎ tənèsé yó rə̀ n’ê myə̀lɛ́ sɛ : Bə̀ lyì bí byɛ̀bɛ́ bə̀ t’â zwẽ Yi nyə́ né mó, cìnə́ nábá bə̀k’a zhẽ̌ bə̀ cìn dɛ̃̌ yé ! ⁸ Dwí rí lyì, ce-nə nə́ Yi rí nə̀báná, bwə̌l-nə rə̀ còrhó w yò á ce dɛ̃̌ zhã̌ nyɛ̀ɛ̀ ! ⁹ Wɔ́ rə̀myɛ́ rə̀ yìlì nə̀ myə̌l ré, rə̀ shɛ̀nɛ́ rə yẽ̌ nə́ba nə́ yə̀ nə́ nà mà nə́ tu yé. ¹⁰ Ǎ Yi, ǹ zhẽ̀ nə́ba ǹ la lwar nə́ gə́ wɔ́ nɛ́, ǹdə bə̀ gə́ y’a ce sə̀-byì kùlì myǐn w bə m’e vùr è jìmdi rí ta. ¹¹ Ǹ zɔ nə́ba ń ce pɔ̀mɔ̀ wẽ́, ń cĩ́ zhĩĩ vwə̀lé nə́ cã̌ yó. ¹² Ǹ ce numbyínsi jòm nə́ yə́-pǎlsɛ́ wa ; nə́ zù myǐn ǹdə́ nɛ̃̌ wẽ́. Sə ǹ vùr nə́ba rə̀ wẽ́, ǹ la pə nə́ba kùjú o yí nə́ba o bɔrh. ¹³ À m’a zə vwə̃̀ námpúmə́ cɛ̃́ɛ̃́ a m’a vò ǹ jì y wə, à m’a pyìrh wẽ́ ré tɛ̀bɛ́ à bwəl nyí bə̀ à la mɔ́ pɔ́ mɔ́ : ¹⁴ Wɔ́ wẽ̀ ré rə̀myɛ́ yil à y’à púr à nyí rí, a zɔ̀m ǹdə́ zwini rí zhe ne mó. ¹⁵ À m’a zə pyììsi shɛ̀bɛ́ sə̀ nù sə̀ nwə̃̌ dúdú mú, ǹdə́ nə̀byerh shɛ̀bɛ́ sə̀ nù nwə̃̌ dúdú mú, a m’a zhə́l vwĩ̀ námpúm cɛ̃́ɛ̃́ a pɔ̃́ ; à m’a súlí a zə pyììsi ǹdə́ bə̀cǐlsi a m’a zwə́l vwĩ̀ a pɔ̃́. ¹⁶ Rə̀myɛ́ ce, ámyɛ̌ byɛ̀bɛ́ á n’á nyàm Yi mú, bà-nà, à la ába kɔn tɛ̀bɛ́ ń wɛ̀rhɛ́ à yil mó byulu. ¹⁷ À zɔ à nyí a búbwéé a ce mo, ǹdə́ ń còrhó w ŋwɛ́nɛ́ à mə̀jòlò w yó. ¹⁸ À gə y’à bùl lwɛlɛ wɔ̀rhɔ́ bùlə̀ à wẽ́, Cǐnnə mó gə yə̀ à lwə̌l mó zwẽ yé. ¹⁹ Sə Yi zwẽ à lwə̌l mó, rə̀ pyèrhè rə̀ zwɛ̃̌ rə cili à yi-co wə́. ²⁰ Bə̀ Yi nə còrhó, rə̀ gə́ yə̀ à yi-co w zhɛ̃̀ mɔ́ yilə, rə̀ gə́ yə̀ nɛ rə̀ wu-bɔ̀nɔ̀ w vòm mó yilə !