¹ Nwíísí núnnə bé yé né cə́bal mɔ́ nwə̃́ə̃́. Dəvyidi nwə̃́ə̃́. ² Ǎ Yi, wɔ́ bə̀ gə́ zhe ǹ zhə̀n yilə, bə̀ m’a zǔl mó Səyɔ̃ nɛ́, bə pyìrh nyə́ nyɛ̀bɛ́ bə̀ dwĩ̀ ǹ yé né bə̀ bə la mɔ́ pɔ mɔ́. ³ Ǹmyɛ́ mɔ̀bɔ́ ǹ nə́ ǹ cili yi-co mó ! lyì bí gakó m’a bə̀ ǹ sono. ⁴ lwɛlɛ kə́kɛ́lɛ́ nɛ : Ǹ m’a pə nə́ba nə́ dwə́ə́ré sǔbri. ⁵ Wu-nyɔ̀ cə́bal, wɔ́ lò mɔ̀bɔ́ ǹ cír mó, ń zɛ̃̀ ń yẽ̌ mo ń zhǐ ǹ yé né mó, ń la ń jòm ǹ jì y kɔ̀nɔ́ w mɔ́ ! Ǹ kɛ̀lɛ́ y wu-nyɔ̃̀ w m’a sú nə́ wun ní, ǹ jì y myɛ wu-nyɔ̃̀ w m’a sú nə́ wun ní. ⁶ Yi, ǹ wɔ́ nə́ vwǎrhna, wɔ́ màmyaarhɛ dɛnnɛ ǹ nə́ ǹ tó né ǹ vwǎrh nə́ba, ǹ wu-bɔ̀nɔ̀ yilə, wɔ́ ǹmyɛ́ sõ jààsɛ́ shɛ̀bɛ́ gakó sə̀ nyɛ cə-yala gakó wẽ́ mó, ǹdə́ nə̀-fwààlɛ́ w mó n’ê dɛ̃̀ kɔn nɛ́ ! ⁷ Wɔ́ Yi rə̀ ce pyàr rɛ́ zhǐ rə̀ jààsɛ́ w kẽkẽ ǹdə́ rə̀ jàn rɛ́, wɔ́ jàn rɛ́ rə̀ wɔ́ rə̀ cã̌ tɔ̀nɔ̀ ; ⁸ Rə̀ n’ê ce nə̀-fwààlɛ́ sɔ̀ɔ́ dome ré, ǹdə́ nɛ̃̌ mɔ́ wùwùlì rí sɔ̀ w zhì shɛ́ɛ́, rə̀ n’ê ce dwə́ né myɛ ŋwɔ́ŋwɔ̌ mɔ́ zhì shɛ́ɛ́. ⁹ Lyi bí byɛ̀bɛ́ bə̀ jě lũ w jààsɛ́ sə̀ nyɛ mɔ́ wẽ́, ǹ màmyaarhɛ́ m’a zɛ̃̀ bə̀ wun ni ; Ǹmyɛ́ ǹ nə́ ǹ ce yi-púrhí ǹdə́ yi-zùr sõ cìnə́ fùù bə sú. ¹⁰ Ǹ tú ń gwɛ̃ cɛ y nɛ, ń pə y nɛ̃̌ námbɔrhɔ, ń pɛ y nə̀cɛ̀ndɛ rə sú yə ; Yi bwǐsí sú pyáám ǹdə́ nɛ̃̌ ; ǹ nə́ ǹ tɛnɛ bə̀lé yə́, ń zɛ̃̀ ń ce pùlú cɛ y wa : ¹¹ ń bur y ń yẽ̌ nɛ̃̌ pyẽ̀ è wẽ́, ń mà è bo-kwə̌r ré kókó, ń ce dwə̀rh bə̀ sə nyɔ̀ e swẽ́, ń zɛ̃̀ ń cĩ́ bwəl wẽ̀ ré tɛ̀bɛ́ rə̀ n’ê tò mó yó. ¹² Ǹ nə́ ń ce byin rí zhɛ̀ ǹdə́ ǹ nə̀cɛ̀ndɛ́, ǹ gə tó mə̀gã̌ gakó, ǹ nə́ ǹ lwé wẽ̀ tɛ̃́ rə̀ sú cɛ ; ¹³ Gɔ-elũ èpwə̀ə̀lé vwaalɛ́ vwàmá gɔ dɔ́m jààsɛ́ j’a sú ǹdə́ gɔ dúdú, pyǎlsɛ j’a lyẽ wu-nyɔ̀ cã̌-tànrɛ sə̀ zhǐ ;