¹ Nwíísí núnnə bé yé né cə́bal mɔ́. Dəvyidi nwə̃́ə̃́. ² Ǎ Yi, à gə n’â wɔ́wɔ́lɛ́, sə́ cili ! Yìlì à mə̌l ré à zù-bal mɔ́ yé né ! ³ Shèè ne kɔn rɛ́ tɛ̀bɛ́ lyì-bəlwǎlsɛ́ shèè sə zɔ̀m sə cĩ́ sə̀ la nɛ́ wɔ̀rhɔ́ mɔ́ yé né, sə̀ wɔ́ shə̀dɛ́ɛ́sɛ sə̀ zhe ŋwɔ̌ŋwɔ̌, numbyínsi lwɛlɛ cìnə́ ! ⁴ Sə̀ dwèlè sə̀ mə̀jə̀ə̀lé ǹdə búlə́ shù ta, sə̀ n’ê tɛ sə̀ zɔ̀mà nɛ́ cɛ̀ɛ́ mɔ́ ǹdə cama ta, ⁵ sə la shòò sə tə bə dóó zhe cə́bal mɔ́, sə̀ la jàr jàr sə tə mɔ ǹdə́ ń yə̀l yé, ywẽ də́-byǐ myɛ cìcì bə sɛ zhe yé. ⁶ Sə̀ só sə̀ cìn sə̀ wu-bárhɛ́ tumə né wẽ́ : Sə̀ n’ê shèè sə̀ nɛ dwã sə̀ pàm pɔ̌mre, sə̀ zhe : «Wɔ́ mɔ̌ lò ń la rə̀myɛ́ lwar ?» ⁷ Sə̀ gə tɛ́rɛ́ lwɛlɛ tɛ̀bɛ́ sə̀ la wɔ̀rhɔ́ mɔ́ sə zhɛ̀, sə wɔ̀ nɛ : Kɔn rɛ́ tɛ̀bɛ́ nə̀ zɔ̀m nə́ cĩ́ nə̀ la wɔ̀rhɔ́ mɔ́ wɛ̀rhɛ̀ rə zhɛ̀, èlǎsɛ̃́ zhǔ k’ê tɛ̀nɛ́ yé ! Numbyíní wu bùlə̀ né nə̀ shèè è wẽ́ mó, zhə̀nà, lò gakó wu w wɔ́ gɔ́rɔ́ nánlyilyùmú. ⁸ Yi gə́ j’a zə rə̀ cama nɛ́ rə̀ la sɛ tɔ : ǹdə́ cama nɛ́ zɔ sɛ ga wɔ́ rə̀dù. ⁹ Wɔ́ sə̀ mə̀jə̀ə̀lé rə̀ ce sə tu ; lyì bí byɛ̀bɛ́ bə̀ nɔ sɛ mɔ́ gakó zɛ̃̀ bə̀ n’ê zhízhí bə̀ ywẽ. ¹⁰ Ywẽ zɛ̃̀ rə zə lyì bí gakó, bə̀ bwə̀l kɔn rɛ́ tɛ̀bɛ́ rə̀ wɛ̀rhɛ́ mɔ́ bə byili.