¹ Dəvyidi nwə̃́ə̃́. Ń nún ǹdə́ ń ŋwɛ́nɛ́ Zhidə gɔ-elũ èpòlò w wə. ² Ǎ Yi, Ǹ wɔ́ À Yi, Ǹ nə̀ nyɛ̀lɛ̀ zhe ne, à n’â pyà mɔ́ ; cə-da kɛ̀bɛ́ è kùl nɛ̃̌ tɛ̀nɛ́ è wẽ́ mó wẽ́. ³ wɔ́ èta myɛ à n’â cèrhé mó né ǹ jì wə, mùnì ga a nə ǹ jàn rɛ́ ǹdə́ ǹ zùwə́ yə́. ⁴ Bə̀ nyǐ ǹ wu-bɔ̀ɔ̀ cɔ̃̀ numbyíní nyǔ mú : Ǹ còrhó w ŋwɛ́nɛ́ à nyú wə. ⁵ À m’à n’â ce ǹ bán à lũ w yó yál mɔ́ púlə́púlə́, à m’a zhẽ̌ à jɛ̀rh a ce dɛ̃̌ ǹ yil ré yilə. ⁶ À m’a jí a sú, ǹdə wɔ́ nàmá ǹdə́ bə̀ nwə̃̌ bə̀ də̀ nyàn dwí à dɔ̀m ta, sə wɔ́ wu-nyɔ̀ búbwéése sə̀ m’a yə̀ à nyú wə, ǹ còrhó w m’e yə̀ à nyú wə, ⁷ À gə tú à n’â bùl ǹ bùlə̀ à kò-pyònò yi ní, à j’â n’â tɛ́rɛ́ ǹ yò cəcɛ̃ y gakó. ⁸ Bə̀ wɔ́ ǹmyɛ́ ǹ wɔ́ à sanna, ce à y’a zɛ̃̀ à n’â fùù ǹ vɔ̀mɛ̀ nɛ́ ywə́l mó kùr wə. ⁹ À zhí ǹmyɛ́ nɛ ; ǹ jə̀-jĩ́ y kwɛ̃́ nɛ. ¹⁰ Sə lyì bí byɛ̀bɛ́ bə̀ n’ê pyà à myə̌l ré vǔr mó, cìnə́ m’a vò tɛ̃́ cɛ y gwáárɛ́ nánlyilyǔmrí wə ; ¹¹ Bə̀ m’a zə búlə́ shú gə̀ gu bi, bə yə̀ gɔ-kǔlsi nyí kùjú.