¹ Nwíísí núnnə bé yé né cə́bal mɔ́ nwə̃́ə̃́. Ǹdə́ Yədətuni gə́ byili ní. Dəvyidi nwə̃́ə̃́. ² zhə̀nà, nyǐ wɔ́ Yi jɔ̃̀ w à co à cìn ní ; wɔ́ rə̀myɛ́ sõ à vwǎrh mɔ́ n’ê shí ní. ³ Zhə̀nà, wɔ́ ńmyɛ̌ ǹ wɔ́ à pàtá nə́kulu ǹdə́ à vwǎrh mɔ́ ; À shìrhə́ nánfwɛ̀lɛ̀ jàà : Ce à t’â la à nà mǎ gaga yé. ⁴ Á nə m’ǎ j’á n’á twi numbyíní yó gaga kɔn la m’ê yí dǒ, á gakó n’á pyà y á la yǐrh á ji tɛ̃́, ǹdə wɔ́ byili kɛ̀bɛ́ è jìnì, ǹdə wɔ́ bɔ́ɔ́ bə̀ n’ê yìrh bə̀ la tɛ̃́ ju ta mɔ́ ? ⁵ Bə̀ shèè bə̀ n’ê zɔ̀m bə̀ ce dwã yó, mùnì ga bə ji y tɛ̃́ è jàà y è jě è yó dɛ̃̌dɛ̃̌ mɔ́ yó ; wɔ́ kɔma bə̀ só góm ; bə̀ n’ê cĩ́ bwəl, sə wɔ́ bə̀ nyú wə, bə̀ wun ní wẽ́, wɔ́ bwəl námməlwɛ̀lɛ́ bə̀ n’ê bwələ. ⁶ Zhə̀nà, à ywə́lə́, ce ǹ cìn Yi jɔ̃̀ wa ! Bə̀ wɔ́ rə̀myɛ́ sono à n’â dɛ̃̀ kɔn nɛ́. ⁷ Zhə̀nà, wɔ́ rə̀myɛ́ rə́ wɔ́ à pàtá nə́kulu w ǹdə́ à vwǎrh mɔ́ ; à shìrhə́ nánfwɛ̀lɛ̀ jàà : Ce à t’â la à nà mǎ a tu yé. ⁸ Wɔ́ Yi sono à vwǎrh mɔ́ ǹdə́ à cìn-nɛrɛ́ y ŋwɛ́nɛ́ ; à jàn rɛ́ pàtá nə́kulu wə́, à shòò jàà y ŋwɛ́nɛ́ Yi sono. ⁹ Dwí, ce-nə à cìn ń jɔ̃̀ w dɛ̃ wɔ́ dɛ̃ gakó, pul-nə á wun ní ń yé né, bə̀ Yi wɔ́ nə́ shòò jàà. ¹⁰ Zhə̀nà, numbyínsí wɔ́ kɔn nánfò ! numbyínsí wɔ́ kɔma sə̀ n’ê gòmà ! Bə̀ gə mù si dwã nɛ, bə kwè bə cĩ́ dùmì mɔrhɔ ku yó, sə̀ nyɛ̌ fúlə́ə́ du zho. ¹¹ Bə̀k’a zə jàn tũ̀-twĩ̀ĩ̀ rə yə̀ á tum yé, á bə̀k’á nyɛ́ɛ́ á dɛ̃̀ kɔn ŋwɔ̀lɛ̀ nə̀cɛ̀ndɛ́ yil yé ; bá nə̀cɛ̀ndɛ́ gə n’ê pùl myɛ, s’á bə̀k’á cĩ́ rə̀ yò á wẽ́ yé. ¹² Yi zɔ̀m kɔn twər rə̀dù ; sə à nyɛ̀ɛ̀ rɛ a k’a bwérhé twər rə̀lyè, rə wɔ̀ èta : Bə̀ nyǐ jàn rɛ́ wɔ Yi sono.