¹ Nwíísí núnnə bé yé né cə́bal mɔ́ nwə̃́ə̃́. «lyiisi gar gu» nṹ-nwíírí. Dəvyidi nwə̃́ə̃́ ń nún ń mə́ ń pɛ còrhò. ² Wɔ́ ń gə́ bú búlə́ né ǹdə́ Siri lyì bí Məzopotəmyi ni ǹdə́ bə̀ dwã bɛ́ Səba nɛ́ mɔ́, ǹdə́ Zhɔwabɛ myɛ gə́ y’ǎ kwɛ̃̀ n bə̀ nə̀kwə̃̌ nə̀-fɔ̀lɔ̀ w wẽ́, n bú ǹdə́ Edɔm lyì bí n ŋwɛ̀nɛ́ nunə mɔ̀ɔ̀rhɛ shí ǹdə́ rə̀lyè ³ Ǎ Yi, ǹ zhɔ̃̀ nǝ́ba, ǹ làà nǝ́ba tɛ̃́, ǹ lyim zɛ̃̀ nǝ́ yó: Ká zhẽ̌ nǝ́ba dɛ̃̌! ⁴ Ǹ zhízhǐ cɛ yá, ń kǎr ya : sə ká kwɛrhɛ è kə̀kɛ̀rɛ́ rɛ́ jàà ń ce né, nyǐ è n’ê zhízhǐ ! ⁵ Ǹ ce ǹ dwí rí nə ywẽ̀ nyɛ̀bɛ́ nə̀ jɛ̀, ǹ ce nə́ nyɔ̀ də̀vɛ̃́ kɛ̀bɛ́ è jɛ̀ n’ê zala ⁶ Ǹ zhẽ̌ bɛlɛ jú ku ń ce dɛ̃̌ ń byili lyì bí byɛ̀bɛ́ bə̀n’ê nyàm mɔ́ mɔ́ nɛ, mùnì ga bə zɛ̃̀ bə zhì dɛ̃̌ zhə̀n rɛ́ yil ⁷ Mùnì ga ǹ lyì bí ǹ só mó lú, Zə ǹ jə̀-jĩ́ y ń vwǎrhnə́ba, sə́ zwẽ nə́ lwə̌l mó ! ⁸ Yi zhì rə̀ jì y w rə zɔ̀m rə wɔ̀ : À m’a jí bɛlɛ, à m’a zwẽ Shəshɛm a tà, a zwẽ Səkɔtɛ vɔlɔ w a mɛrhɛ a tà ; ⁹ Galadɛ wɔ́ àmyɛ́ à cǐ ; Manasɛ wɔ́ àmyɛ́ à cǐ ; Efərayim wɔ́ à yə́-pú à pú à yó wə, Zhidə wɔ́ à pyɛ̀lɛ̀ də̀-dɔ̀lɔ̀ ; ¹⁰ Mɔwabɛ wɔ́ à póló à n'â shɛ nɛ̃̌ ò wẽ́ ; Edɔm wɔ́ à nə̀cìl à n’â dul ń yó ; Shilisəti tənà lyì, búbwéé-nə wu-nyɔ̃̀ búbwéése à yilə ! ¹¹ Wɔ́ mɔ̌ lò ń mà n zə nɛ a vò cɔ kɔ̀bɔ́ ò zhe jàn nánfɔ̀lɔ̀ du mú wẽ́ ? Mɔ̌ lò ń mà n zə nɛ à vò Edɔm ? ¹² Ǎ Yi, è nə də̀ ǹmyɛ́ mɔ̀bɔ́ ǹ cìrh nə́ba ń ce kwã nɛ́ mɔ́, ǹ kə́ ǹ tá ǹ tó nə́ shə̀dɛ́ɛ́sɛ́ nɛ ǹ dwi mú nà ?