¹ Nwíísí núnnə bé yé né cə́bal mɔ́. Ǹ bə̀ká ǹ cɔ̀ yé. Wɔ́ Dəvyidi nwə̃́ə̃́. Ń nún ǹdə́ Səyuli twĩ̀ bə b’e kə́kɛ́lɛ́ jì y bə̀ la mɔ gu. ² À Yi ! zwẽ ne à zwə̀ bé jɔ̃̀ wa, yìlì ni byɛ̀bɛ́ bə̀ n’ê bwí ǹdə́ nɛ mɔ́ yé né ! ³ Vwǎrh nɛ lwɛlɛ wǎrhna bɛ́ jɔ̃̀ wa, sə́ zwẽ ne lyi-gurnə bé jɔ̃̀ wa ! ⁴ Bə̀ nyǐ, bə̀ shèè bə̀ n’ê pyà à myə̌l vǔr ; jàn wɔ̀rhɔ́ cìnə́ bé zɔ̀m bə ce dwã yó bə̀ la m’e bú ǹdə́ nɛ, à Yi ! e j’à yə̀ dwə́ yé, a j’à yə̀ yə̀-bəlɔ̀lɔ́ wɛ̀rhɛ́ yé. ⁵ Ǹdə́ à bə dóó zhe ga yírh wə, bə̀ n’ê dùrə̀, bə̀ n’ê tɛnɛ : Rə̀myɛ́ ce, zɛ̃̀ tɛ̃́ ǹ jan rɛ́ wa, bə̀ ń jəl ne, sə gwẽ ń nyì ! ⁶ Ǹmyɛ́, Bə-zhɔ-zhe, Yi tɛ̀bɛ́ rə̀ cǐ jàn cìnə́ gakó mó, Esərayɛl Yi, zɛ̃̀ tɛ̃́, sə́ pə còrhò-tum tənèsé gakó ne ! Ǹ bə̀ká dùr lyì-bəlwǎlsɛ́ sə̀ yə̀l ǹ pár mɔ́ èdù ga nɔ̀nɔ̀ yé ! ⁷ Nyǐ də̀dɛ̀nɛ́ gakó bə̀ k’â n’ê twí bə̀ wǔrh ǹdə kǔlsi ta, bə̀ m’ê kə́kɛ́lɛ́ cɔ w cã̌. ⁸ Nyìwé, bə̀ nyə́ né, wɔ́ lwɛlɛ rə́ n’ê shí nə̀ wẽ́ rə̀ dwi, bə̀ nyə́ né wɔ́ búlə́ shìmì nə̀ ŋwɛ́nɛ́ nə̀ wẽ́ ; Sə è nə wɔ́ mɔ̌ lò ń nyɛ̌ kɔn tɛ̀bɛ́ rə̀ zɔ̀m mɔ́ ? ⁹ Sə è gə wɔ́ ǹmyɛ́, Bə-zhɔ-zhe yilə, wɔ́ mɔ́n ǹ nə́ ǹ mɔ̀n bɛ, ǹ nə́ ǹ mɔ̀n tənèsé gakó. ¹⁰ Bə̀ jàn rɛ́ gə wɔ́ mámá myɛ, àmyɛ́ wɔ́ ǹmyɛ́ sono à n’â dɛ̃̀ kɔn nɛ́, bə̀ Yi wɔ́ à shìrhə́ jàà. ¹¹ À Yi, bə̀ ń yə̀ à yé né ǹdə́ ǹ wu-bɔ̀nɔ̀ wá, Yi ce à n’â nyǐ lyì bí byɛ̀bɛ́ bə̀ n’ê nwɛ̀nɛ̀ nɛ mɔ́ ǹdə́ wu-nyɔ̀. ¹² Ǹ bə̀ká gu bi yé, mùnì à dwí rí bə̀k’a swě re yé ; Cǐnnə, ǹ wɔ́ ku kɔ̀bɔ́ ò cə̀r nə́ yé né búlə́ jàà wa ! rə̀myɛ́ yilə, zə ǹ jàn rɛ́ ń ce bə yiyiri tɛ̃́, sə́ cìrh be ń ji tɛ̃́. ¹³ Bə̀ nyí gə púr gakó wɔ́ yə̀-bəlɔ̀lɔ́ zɔ̀mà nə̀ n’ê dwi : bə̀ bə̀ cìn-byilu mú cìcì mú k’a zə bɛ, bə̀ wɔ́ bwəə́lse námməlwǎlsɛ ǹdə́ kɔma zɔ̀mà dúdú bə̀ n’ê zɔ̀mà. ¹⁴ Gu bi ǹdə́ ǹ lyim rí nánfɔ̀lɔ̀ wá, bə̀ k’ê bə̀ lũ yó yàl yé ! mùnì ga bə̀ lwar bə̀ Yi n’ê jí pyɛ̀lɛ̀ Zhakɔɔbɛ yó kɔn m’e yí lũ cə-yala nɛ́ gakó wə ! ¹⁵ Nyǐ də̀dɛ̀nɛ́ gakó bə̀ k’â n’ê twí bə̀ wǔrh ǹdə kǔlsi ta, bə̀ m’ê kə́kɛ́lɛ́ cɔ w cã̌. ¹⁶ Bə̀ n’ê yiyiri tɛ̃́ jààsɛ́ gakó wẽ́ bə̀ m’ê pyà bə̀ nyí kùjú, bə mɛ̃ bə zɔ̃̀ ǹdə́ bə̀ yə̀ kùjú nɛ bə jí bə̀ sú yé. ¹⁷ Sə àmyɛ́ m’a j’â n’â nún ǹ jàn rɛ́ ; à gə dùlí a zɛ̃̀ nə́kɔkɔ́lɛ́ nɛ, à m’a zǔl ǹ yil ré, a zǔl mó ǹ wu-bɔ̀nɔ̀ w yilə. Bə̀ ǹ wɔ́ à shìrhə́ jàà, à shòò jàà à n’â shèè è wẽ́ zwini dɛ̃.