¹ Nwíísí núnnə bé yé né cə́bal mɔ́. Dəvyidi nwə̃́ə̃́. ² È nə wɔ́ á nyə́ né pú dɛnnɛ á m’ǎ tó né á bùr bùrsí cángá ? Numbyínsi byǎ, è nə́ wɔ́ èta à m’a tó né à bùr kɔn tɛ̀bɛ́ rə̀ mə̌ mɔ́ á byili ? ³ Nyǐ è də̀ èta gaga, á yẽ̌ lwɛlɛ nɛ rə̀ ŋwɛ́nɛ́ á wẽ́ ; wɔ́ jɔ́ɔ́rɛ tumə né nə̀ ŋwɛ́nɛ́ á jɛ̃̀sɛ́ nɛ mɔ́, á m’á zal mɔrhɔ ku w ni, á m’a mɛrhɛ tənà y wa. ⁴ Lyì-bəlwǎlsɛ́ lwɛlɛ rɛ́ wɔ́ bə̀ nábá wẽ́ yi ní ga, sə kɔ̀mrɛ́ j’a zə kɔma bɛ́ rə du rə̀ nábá wẽ́. ⁵ Bə̀ zhe swã̀ ǹdə́ dɔm swã̀ ta, ǹdə kùwə̀ kɛ̀bɛ́ è shĩ è zhɛ̃̌ ta, ⁶ è t’â cili núnnə zɔ̀mà yé, è t’â nyǐ cə́m cə́bal mɔ̀bɔ́ ń yě shulu páá sõ yé. ⁷ Ǎ Yi, kə́ bə̀ yə́lə́ né bə̀ nyú w mú ! Bə-zhɔ-zhe, war bwaarɛ nyə̀-pǎr rɛ́ ! ⁸ Bə jé tɛ̃́ ǹdə nɛ̃̌ mə̀ n’ê dùr mə lyɛ̃ ta ! bə̀ gə zɛ̃̀ bə̀ la bə̀ cama nɛ́ tɔ, s’e yə̀ kɔn nánfò ! ⁹ Bə yə̌l bə jé tɛ̃́ ǹdə pù-vùrə̀ ta ; bə̀ yírh yə̀ nə̀nyɛ́nɛ́ y yó jòm ǹdə pù-vùrə̀ ta ! ¹⁰ Á nə́kwánsɛ́ la m’e lwar bə̀ sɔr nánlyàr kwɛ̃́ myǐn sə̀ kùr w mó, ǹdə́ zho nánfɔ̀lɔ̀ zə rɛ o m’ô lyɛ̃. ¹¹ Sə wu-cángá cə́bal gə tú ń nɔ jim rí rə̀ n’ê cĩ́ mú, ń wu m’a zə nyàn ; n nɔ̀ lyì-bəlwǎlsɛ́ jal tɛ̃́ ǹdə́ ń nèrh.