¹ Nwíísí yé né cə́bal mɔ́ nwíísí. Ǹ bə̀ká cɔ̀ yé. Dəvyidi nwə̃́ə̃́. Ń nún ǹdə́ ń dùr n vò shèè Səyuli yé né myèlé ré wẽ́ mó yó né. ² Ǎ Yi, dǔr à nɔ̀nɔ̀, dǔr à nɔ̀nɔ̀ ! Bə̀ wɔ́ ǹmyɛ́ sono à n’â à pyà shòò jàà nɛ́ ; ǹmyɛ́ vɔ̀mɛ̀ nɛ́ ywə́l mó w à n’â pyà shòò jàà nɛ́, kɔn m’e yí lũ w zhízhǔ mú m’e lyɛ̃. ³ À n’â búbwéé à ce Yi rí rə̀ wɔ dɛ̃̌dɛ̃̌ yi w gaga mɔ́ nɛ, Yi rí tɛ̀bɛ́ rə̀ n’ê twĩ̀ àmyɛ́ yil mó ne. ⁴ Rə̀ m’a zhì dɛ̃̌ yi w rə vwǎrh nɛ, ǹdə́ lò mó mɔ̀bɔ́ ń nə́ ń nwɛ̀nɛ̀ nɛ mɔ́ zhe à fuuli ni ń nə́ ń fuuli ; Yi m’a byili rə̀ wu-bɔ̀nɔ̀ w ǹdə́ rə̀ zhə̀n rɛ́ à yilə. ⁵ À ŋwɛ́nɛ́ bwaarɛ cəcəl wə, à pyě numbyínsi shɛ̀bɛ́ sə̀ n’ê tɔlɛ myǐn-zhù cəcəl wə, lyì byɛ̀bɛ́ bə̀ zhe swə́ ǹdə́ cama bə̀ nyú bə̀ wɔ́ bə̀ yə́lə́ mó, bə̀ mə̀jòlò w wɔ́ búlə́ shù, nyí dúdú. ⁶ Ǎ Yi ! zɛ̃̀ ń zhì dɛ̃̌ yi ri wə, ń ce ǹ zùwə́ y jòm lũ w púlə́púlə́ wẽ́ ! ⁷ Bə̀ y’à pàm pɔ̀mɔ̀ à gə́ n’â tó mə̀gã̌ : À kó tɛ̃́ ; bə̀ kù gɔ́rɔ́ à yé né : Sə bə̀ tu ò wẽ́. ⁸ Ǎ Yi ! à wu w jě kẽkẽ, à wu w jě kẽkẽ ; à m’a nún, à m’a ce à dɛ̀lɛ̀ wẽ́ cəl du. ⁹ À Yi còrhó wə́, bùrhì ń zɛ̃̀ dɛ̃̌, à zɔ̃̀ ǹdə́ à bɔ̀rɔ́, zɛ̃̀-na dɛ̃̌, nyǐ à la cə-lár rɛ́ tɛ̃́ zhǎrh. ¹⁰ Cǐnnə ! à la mɔ́ zǔl dwə́ né cəcəl wə ! À la mɔ́ nún tənèsé cəcəl wə. ¹¹ Bə̀ ǹ wu-bɔ̀nɔ̀ lyɛ̃ o yí dɛ̃̌ yə né wə, ǹ zhə̀n rɛ́ myɛ lyɛ̃ rə yí bə́ban rɛ́ wa.