¹ Nwíísí yé né cə́bal mɔ́ nwə̃́ə̃́. È nún ǹdə wɔ́ Tərəbɛ̃́bá épwéné è cəl zhǐ yé né gaga rə n’ê dwi ta. Rə̀myɛ́ yi ní, ǹdə́ Shilisəti lyì bí zɔ Dəvyidi Gaatɛ nɛ. ² Ǎ Yi, dǔr à nɔ̀nɔ̀ ! bə̀ nyǐ dɛ̃ gakó, numbyínsi n’ê pyà búlə́ à nyí ni, sə̀ n’ê nwɛ̀nɛ̀ nɛ, sə̀ ce à n’â yiyiri. ³ Lyì bí byɛ̀bɛ́ bə̀ n’ê bwí ǹdə́ nɛ mɔ́, n’ê nwɛ̀nɛ̀ nɛ dɛ̃ gakó ; bə̀ wɔ́ lyì nánjə̀jòló bə̀ n’ê bwí ǹdə́ nɛ ǹdə wɔ́ lyì bə̀ ŋwɛ́nɛ́ dɛ̃̌ yi w ta. ⁴ Ywẽ gə tú rə zhe ne dɛ̃, wɔ́ ǹmyɛ́ nɛ à n’â zhí. ⁵ Wɔ́ Yi zɔ̀mɛ̀ rɛ́ wẽ́ à zhe zùwə́ né, à zhí Yi ni, ce kaka ywẽ bə nɛ zhe yé : Wɔ́ bə̀kɔ́n numbyínsí wɔ̌ sə̀ la nɛ wɔ̀rhɔ́ ? ⁶ Bə̀ n’ê nwɛ̀nɛ̀ nɛ dɛ̃ gakó, wɔ́ à lwɛlɛ wɔ̀rhɔ́ bùlə̀ dúdú bə̀ n’ê bùlə̀. ⁷ Bə̀ n’ê yǎl bə vùr à myə̌l, ce bə̀ n’ê shèè bə zɔ̀m bə ce dwã yó, bə̀ pyà à nèrh kú. ⁸ Wɔ́ lwɛlɛ rɛ́ rə̀myɛ́ yé né bə̀ zɛ̃̀ bə̀ n’ê yǎl bə lú ní : Ǎ Yi, zə ǹ lyim rí ń cìrh dwə́ né ń ji tɛ̃́ ! ⁹ À gə́ y’à n’â yiyiri dɛ̃̌ yó né, ǹ gàl à nə̀-yírhə́ né gakó yó wə́ ; ǹ kwɛ̃́ à yə́-nàná nɛ́ ń ló ǹ kwə̀lə̀ y wẽ́ : Nə̀ yə̀ ǹ sɛ́bɛ́ rɛ́ wẽ nà ? ¹⁰ Dɛ̃ tɛ̀bɛ́ à búbwéé a ce mó, à zwə̀ bé n’ê kwɛ̃̀ ; à yě bə̀ Yi, wɔ́ àmyɛ́ Yi. ¹¹ Yi zɔ̀mɛ̀ rɛ́ wẽ́ à só à cìn ní, Bə-zhɔ-zhe zɔ̀mɛ̀ rɛ́ wẽ́ à só à cìn ní ; ¹² À zhe Yi zhə̀na, ce kaka ywẽ bə nɛ zhe yé : Wɔ́ bə̀kɔ́n numbyínsí wɔ̌ sə̀ la nɛ wɔ̀rhɔ́ ? ¹³ Ǎ Yi ! à mə̌ s’a pyìrh kɔn rɛ́ tɛ̀bɛ́ à dwĩ̀ nyí bə̀ à la mɔ́ pɔ mɔ́ ; à m’a zwə́l Yi nə̀bán-co vwə̃̀ a pɔ̃́.