¹ Nwíísí yé né cə́bal mɔ́. Nwə̃́ə̃́ bə̀ nún ǹdə́ ku bə̀ n’ê dwí ǹdə́ nyínsi. Dəvyidi nwə̃́ə̃́. ² Ǎ Yi ! pyèrhè ǹ zhɛ̃̌ ń cili à lwə̌l mó, sə ǹ bə̀ká shèè à yé né à lwə̀lə́ y yil yé ! ³ Cili à zɔ̀mà nɛ́, sə́ lyár nɛ ! nyǐ à wu zhìlì, à n’â yiyiri tɛ̃́, à k’â yə̀l à gə n’â twĩ̀ ní yé, ⁴ à gə́ nyɛ̀ɛ̀ à zù-bal mɔ́ cəl ré, ǹdə́ nɔ̀nɔ̀ w lyì-bəlwɛ̀lɛ́ n’ê nwɛ̀nɛ̀ mɔ́ yilə ; bə̀ ce zwini pú ni, bə zə lyim bə pú à kùr bə̀ n’ê jì. ⁵ À shìshùrhú n’ô mà à wẽ́, cu wu-zɛ̃̀ɛ̃́sɛ n’ê gwi ni ; ⁶ ywẽ zhe ne, à púlə́púlə́ n’â pə́pǎ, à gakó n’â didi. ⁷ A zɛ̃̀ à zhe : À gə y’à zhe épwèné vwɛ̀mɛ̀ ! à y’à m’a zɛ̃̀ vwɛ̀mɛ̀ a vò a pyà jàà a shǐrh. ⁸ Nyìwé, à y’à m’a dùr a vò yé né gaga, gɔ-elũ èpòlò w a jòm gàà mɔ́ ; ⁹ a dùr làlà du zho nánfɔ̀lɔ̀ a lú a zwẽ à cìnə̀. ¹⁰ Cǐnnə, cɔ̌ bɛ, bə jé tɛ̃́, bə̀ bə̀k’a k’e nyɛ̀ɛ̀ dwã zɔ̀mà kùr yé ! Nyǐ wɔ́ jàn tumə ǹdə́ búlə́ à nə cɔ w wa ; ¹¹ bə̀ n’ê tó byílsí yó bə̀ zhə̀l bə̀ m’ê twĩ̀ nə̀nyɛ́nɛ́ ǹdə́ cəcɛ̃ ga, lwɛlɛ ǹdə́ surh-bəlwɛ̀lɛ́ ŋwɛ́nɛ́ cɔ w wẽ́ ; ¹² 1wu-bárhɛ́ tumə ŋwɛ́nɛ́ ò wẽ́, myùnù tumə ǹdə́ yǔyǔ tumə né j’â zhǐ nə̀ jàà w gaga. ¹³ Nyǐ è gə y’à wɔ́ zù-bal ń nə́ ń fulsi ni, à y’à m’a pyɛ́nɛ́, è gə y’à k’ê wɔ́ lò mɔ̀bɔ́ nə́ n’ê bwí dwã mɔ́, ń zɛ̃̀ búlə́ ǹdə́ nɛ, à y’à m’a pyà jàà a dùr a vò a shèè ń yé né, ¹⁴ sə nyǐ wɔ́, è gə́ wɔ́ ǹmyɛ́ mɔ̀bɔ́ à y’à n’â bùl bə̀ nə́ ga wɔ́ kɔn rə̀dù mú, ǹmyɛ́ mɔ̀bɔ́ ǹ yě à wu w mú, ǹ wɔ́ à dɔwa mɔ́ ! ¹⁵ nə́ y’ǎ n’é tó dwã, màlá y’à wàr nə́ bwə̌l w mó, nə̀ y’ǎ n’é tó lyì-zwǎ bɛ́ nɛ nə́ zhə̀l Yi ji y mú ! ¹⁶ bə̀ cu jǎr jǎr mə gu lyì bí bə̀myɛ̀ mɔ́, bə vò cùùrrí wẽ́ ǹdə́ bə̀ yírhə́ ga ! bə̀ bə̀ n’ê twĩ̀ wu-bárhɛ́ tumə bə̀ cəcəl w bə̀ sõ kǎlsɛ́ wẽ́. ¹⁷ Sə àmyɛ́, wɔ́ Yi ni à n’â búbwéé à ce, sə Cǐnnə mó mà n zwẽ ne. ¹⁸ È gə wɔ́ də̀dɛ̀nɛ́, è wɔ́ nəkɔkɔ́lɛ́, è wɔ́ yi yə́-pɛ̀lɛ́ e cəcl wə, ń shil zhe ne, à n’â wɔ́wɔ́lɛ́ à m’â byẽ̀ mo, sə ń mà n nyɛ̀ɛ̀ à cəl ré. ¹⁹ Bə̀ gə tú bə̀ n’ê bwəlse à nyí ni, ń mà n zwẽ ne n pɛ̃ yə̀-zùlə́, bə̀ à zwə̀ bé wɔ́ nánzhəzhɔ̌ bə̀ n’ê bwí ǹdə́ nɛ. ²⁰ Yi m’a nyɛ̀ɛ̀, sə̀ rə̀ m’a ce bə̀ ywẽ́ lwəl tɛ̃́, rə̀myɛ́ Yi rí tɛ̀bɛ́ rə̀ jě rə̀ pyɛ̀lɛ̀ də́gwã́ yó byinə nə̀ bə zhɔ̌ zhe mó ; bə̀ lyì bí bə̀myɛ́ mɔ́ wun ní də̀ lyə́r kɔn gaga yé, e jà bə̀ t’â nyàm Yi myɛ gaga yé. ²¹ Bal mɔ́ ǹmyɛ̌ mɔ́ nə́ ń bwí ǹdə́ lyì bí byɛ̀bɛ́ bə̀ zhe yə̀-zùlə́ ǹdə́ Yi mú, bal mɔ́ ńmyɛ̌ nə́ ń cɔ̀ Yi dɔbrɛ́. ²² Ń zɔ̀mà wɔ́ bwɛ̃̀bwɛ̃̀ du nwə̃̌, e jà wɔ́ búlə́ bú yò ò ŋwɛ́nɛ́ ń wẽ́ ; ń zɔ̀mà nɛ́ wɔ́ bwɛ̃̀bwɛ̃̀ du nwə̃̌, e jà wɔ́ búlə́ shìmì nə̀ shə̌rh nə̀ swə̀rh wẽ́. ²³ Yẽ̌ ǹ yò w ne ń ce Bə-zhɔ-zhe jɔ̃̀ wa, sə́ yẽ̌ bə̀ ń mà n sɛ̃ mɔ́, ń tá ń yẽ̌ wu-cángá cə́bal nɛ n mà ń nà n tu yé.