¹ Nwíísí yé né cə́bal mɔ́. Dəvyidi nwə̃́ə̃́ ń nún. ² Edɔm lyì bal Dɔwɛɛgɛ gə́ tú n bə̀ n byili Səyuli ni : bə̀ Dəvyidi zù Ayəməlɛɛkɛ sõ kɛ̀lɛ́ w mɔ́ yó né mó. ³ Jàn wɔ̀rhɔ́ cə́bal, wɔ́ bə̀kɔ́n yil ǹ tə̀ ǹ wu-bárhɛ́ tumə né yil ǹ nə́ ǹ zhẽ̌ ǹ cìn dɛ̃̌ mɔ́ ? Nyǐ Yi wu-bɔ̀nɔ̀ w j’â ŋwɛ́nɛ́ twéé twéé gakó. ⁴ Ǹ mə̀jòlò w j’â wɔ́ surhə námməlwɛ̀lɛ́ ku, ò nyɛ̌ ǹdə fɔ̀nɛ̀ kɛ̀bɛ́ è dwɛ̀lɛ̀ è nyí du ta, ǹ wɔ́ myùnù cə́bal. ⁵ Ǹ só lwɛlɛ du cɛ̀nɛ̀, ǹ só kɔma du zhə̀nà, ⁶ ǹ só zɔ̀mà nyɛ̀bɛ́ gakó nə̀ n’ê cɔ̀ mɔ́, myùnù mə̀jòlò ! ⁷ Rə̀myɛ́ ce, Yi m’a mà mɔ́ rə cɔ̀ twéé twéé byinə nə̀ bə zhɔ̌ zhe, rə̀ m’a zə mɔ́, rə̀ vùr mó ǹ kòrhó w wə ; rə mǔr mó cɛ yó numbyínsí nã́-nyìsí wẽ́. ⁸ Wu-cángá cìnə́ m’a nə mɔ, sə ywẽ b’a zə bɛ, bə zɛ̃̀ bə̀ n’ê mɔ̀n mɔ bə̀ zhe : ⁹ Nyǐ-nə bɔlɔ́ w kɔ̀bɔ́ ò t’â kwè Yi ǹdə ò yìlnə ta mɔ́, k’â wɔ́ ò nə̀cɛ̀ndɛ́ nánzhəzhɔ̌ w zhə̀n ò zhe mó, ò n’ô zal ò surhə námməlwɛ̀lɛ́ y ò m’ô jí bɛlɛ mɔ́ !