¹ nwíísí yé né cə́bal mɔ́. Dəvyidi nwə̃́ə̃́. ² Wɔ́ Yi nyì-zwennə Natã gə́ tú n nə Dəvyidi ǹdə́ Dəvyidi zù ǹdə́ Bashəba mɔ́ kwã nɛ́, Dəvyidi nún nwə̃́ə̃́ y kɛ̀bɛ́. ³ 3Ǎ Yi, dǔr à nɔ̀nɔ̀ ǹ wu-bɔ̀nɔ̀ w yilə ; kɔn tó ǹdə ǹ nɔ̀nɔ̀-dǔr mú nánfɔ̀lɔ̀ w ta, pɔ́pɔ̌ à yə̀-bəlwàálɛ́lɛ́ ; ⁴ shǎrh à lwɛlɛ rɛ́ gakó, sə́ vùr à yə̀-bəlɔ̀lɔ́ w a jǐrh wárhgáá. ⁵ Bə̀ à lwar à dwə́ə́ré párá, sə yə̀-bɔlɔ̀lɔ́ w j’â ŋwɛ́nɛ́ à yé né twéé gakó. ⁶ À gwar ǹmyɛ́ dúdú ni, à wɛ̀rhɛ́ kɔn tɛ̀bɛ́ rə̀ wɔ́ lwɛlɛ ǹ yé né, rə̀myɛ́ ce ǹ gə la zɔ̌m myɛ, ǹ zhe bùrì, dóó tɛ̀nɛ́ lò la byulu ǹ bùrsí wẽ́ yé. ⁷ Nyǐ, à ná zɔ à pwǐ yə̀-bəlɔ̀lɔ́ wẽ́, ǹ lù ni lwɛlɛ wẽ́. ⁸ E jà ǹmyɛ́ nə́ ǹ yǎl sə zhə̀n rɛ́ yə̀ numbyíní wu w wẽ́ wẽ́ : rə̀myɛ́ yilə, ce a zə lárma à wẽ́ ! ⁹ Shǎrh nɛ ǹdə́ Yəzɔpɛ, mùnì ga a jǐrh wárhgáá ; shǎrh nɛ mùnì a jǐrh námpwã̀ pwɛ̃́pwɛ̃́ a dwini bədũ̀kwələ pwẽ̀ ré. ¹⁰ Bwə̌l wu-nyɔ̀ ǹdə́ fùwə́ yò ń byili ni, mùnì ga à kúr rí ǹ kɔ́ mɔ́ zɛ̃̀ rə fùù. ¹¹ Pyìrhí à yírhə́ ń ce kwã nɛ́ ń yẽ̌ à yə̀-bəlwàálɛ́ nɛ, sə́ pɔ́pɔ̌ à lwɛlɛ rɛ́ gakó. ¹² Ǎ Yi, wɛ̀rhɛ́ wu kɔ̀bɔ́ ò bə jìmdi zhe wárgáá ń ce à wẽ́, ce eshìrhə́ nándwə̃̀ kɛ̀bɛ́ è ma zhì e cili ǹmyɛ́ náncə̀cɛ̀nɛ́ mɔ́ ń pɛ̃. ¹³ Ǹ bə̀ká jì ni a vò kwã nɛ́ gaga ǹ yé né yé, ǹ bə̀ká vùr ǹ sə̀pwà éshìrhə́ y à wẽ́ yé. ¹⁴ Pɛ̃ ǹ vwǎrh mɔ́ wu-nyɔ̀ wá, sə yẽ̌ yə̀wǎl éshìrhə́ y kwɛ̃́ nɛ ! ¹⁵ Rə̀myɛ́ yi ní, à m’a zɛ̃̀ a cèrhè ǹ sɔ́msɛ́ lyì bí byɛ̀bɛ́ bə̀ n’ê dwé ǹ nyə́ né ne mó ne, mùnì ga yə̀-bəlwàálɛ́ cìnə́ k’a kwɛ̃̀ bə bə̀ ǹ sono. ¹⁶ Ǎ Yi, À vwǎrh mɔ́ Yi ! Zwẽ ne jal mɔ́ mə̀ ló tɛ̃́ mɔ́ yò w wẽ́, sə a zɛ̃̀ a zə à mə̀jòlò a zǔl mó ǹ nɔ̀nɔ̀-dǔr mó yilə. ¹⁷ Bə-zhɔ-zhe, púr à nyí rí, mùnì ga a zə rɛ a bwə̀l ǹ zùwə́ y a byili. ¹⁸ Ǹ gə yà ǹ nə́ ǹ yǎl s’a zwə́l vwə̃̀ a pɔ̃́, à gə y’à zwə́l ne a pɔ̃́ ; s’e də̀ vwə̃̀ námpúmə́ cɛ̃́ɛ̃́ ǹ nə́ ǹ yǎl gaga yé. ¹⁹ Vwə̃̀ né nyɛ̀bɛ́ Yi n’ê yǎl mɔ́, wɔ́ wu kɔ̀bɔ́ ò lo ò cə́bal wẽ́ mó, Ǎ Yi, ǹ tá ǹ zhɛ̃̀ lò mɔ̀bɔ́ ń wu lowə, o cɔ̀ kókó mó yé ?