¹ Asaafɛ nwə̃́ə̃́. Yi, Yi, Bə-zhɔ-zhe, byẽ̌ lũ w púlə́púlə́, kɔn zhì yi-púrhí e m’e vò yi-zùr, o bə̀ dwã yó. ² Yi zhǐ Səyɔ̃ cɔ w ò càn námpúm mú wẽ́ rə̀ n’ê jə́jɛ̀mɛ́. ³ Nə́ Yi rí bànà, rə̀ t’â la zhǔ shɛ́shɛ́ yé ; myǐn mɔ̀bɔ́ mə̀ n’ê jí dɔ́dɔ́ ŋwɛ́nɛ́ rə̀ yé né, zho nánfɔ̀lɔ̀ ò kə́kɛ́lɛ́ rɛ. ⁴ Rə n’ê bya rə̀ ce dɛ̃̌ yi rí dɛ̃̌dɛ̃̌ gaga mɔ́ wa, ǹdə́ tɛ̃́ cɛ yó, rə̀ la rə dwí rí bùrsi kɔ́ ; rə̀ zhe : ⁵ cĩ́-na à lyì bí bə̀ tó vwĩ̀ dɛnnɛ bə zɔ dɔbrɛ ǹdə́ nɛ mɔ́ dwã yó ! ¬ ⁶ Dɛ̃̌ Yi rí n’ê bwə̀l Yi cángá tumə né rə̀ byili, bə̀ wɔ́ Yi rə̀ wɔ́ bùr-kárna mɔ́. ⁷ À dwí, cili ! Nyǐ à la zɔ̌m ; Esərayɛl, à la mɔ́ zɔ̀mɛ̀ byilu. ⁸ Nyǐ è də̀ ǹ vwə̃̀ né yil, à n’â ji mú búlə́ yé ; ǹ vwə̃̀ námpúmə́ cɛ̃́ɛ̃́ nɛ́ j’â ŋwɛ́nɛ́ à yé né twéé twéé. ⁹ Lwar bə̀ à t’â la ǹ kɛ̀lɛ́ y nə̀-bya zõ yé, à t’â la ǹ vwàmá jilə né bə̀-cǐlsi myɛ zõ yé. ¹⁰ Bə̀ gɔ-vwẽ̀ ré gakó wɔ́ àmyɛ́ nyǎn, rə̀myɛ́ ǹdə́ vwàmá nɛ́ mɔ̀ɔ̀rhɛ mɔ̀ɔ̀rhɛ nánzhəzhɔ̌ w nyɛ̀bɛ́ gakó nə̀ ŋwɛ́nɛ́ pyàr rɛ́ w mɔ́ ; ¹¹ à yě pyàr rɛ́ kúmsí gakó párá, gɔ-wẽ̀ ré gakó wɔ́ àmyɛ́ à cǐ rí. ¹² È gə y’à wɔ́ nɔrh mə̀ y’à zhe ne, à y’à t’â la mɔ́ rɛ wál yé, bə̀ lú w ǹdə́ kɔn tɛ̀bɛ́ gakó rə̀ ŋwɛ́nɛ́ ò wẽ́ mó wɔ́ àmyɛ́ à cǐ ri ¹³ Ǹ nə́ ǹ bùl b’à n’â dɔ̀m nə̀-byerh nàmá nà ? Ǹ nə́ ǹ bùl b’à n’â nywɛ̀ bə̀-cǐlsi jal nà ? ¹⁴ Zə Yi nə̀bán-co mó è yə̀ vwĩ̀ kɔn ń pə rɛ, sə ǹ gə bwəl kɔn nyí ǹ la Dɛ̃̌Dɛ̃̌ Cə́bal mɔ́ nɛ pɔ sə́ pɛ rɛ. ¹⁵ Zwini yí ni, sə́ zɛ̃̀ ń byẽ̀ ne ; à m’a zwẽ mó, ń zɛ̃̀ ń zǔl né. ¹⁶ Yi zɛ̃̀ rə̀ n’ê zɔ̀m ǹdə́ lyì-bəlwɛlɛ y rə̀ zhe : Tɛ̀bɛ́ wɔ́ bə̀kɔ́n tùntwĩ̀ĩ̀ ǹdə́ tɛ̀bɛ́ ! Ǹ nə́ ǹ gàl à nyə́ né, à dɔbrɛ́ myɛ ŋwɛ́nɛ́ ǹ nyú wə, ¹⁷ e jà ǹdə́ rə̀myɛ́ ga ǹ bə shɛ̀ byilu zõ, ǹ nə́ ǹ dwĩ̀ à zɔ̀mà nɛ́ ǹ kwã nɛ́ ! ¹⁸ Ǹ gə nɔ ŋwɔ̀l-bal, ǹ só mo ǹ nə́ ǹ zhə̀l ǹdə́ mɔ́, ǹ kɔn rɛ́ tɛ̀bɛ́ ǹ cìr mó wɔ́ nə̀fwə̀ə́le ne tó. ¹⁹ Ǹ nyí rí wɔ́ lwɛlɛ rə̀ n’ê púrə́, ǹ mə̀jòlò myɛ wɔ́ lyì yǔr mə̀jòlò. ²⁰ Ǹ gə jě tɛ̃́ gakó, wɔ́ ǹ da-byǐ sõ ǹ nə́ ǹ zɔ̀m nɛ́, ǹ nə́ ǹ zhìlì ń ná-byǐ yil ré. ²¹ Nyǐ kɔn rɛ́ tɛ̀bɛ́ ǹ wɛ̀rhɛ́ mɔ́, a j’a pyi à nyí. Ǹ bùl ǹ wẽ́ b’à nyɛ̌ ǹdə ǹ ta ; sə à m’a ji mú búlə́, a ce ń nə rə̀myɛ́ gakó ǹdə́ ǹ yə́-byǐ. ²² Dɛ̃̌-na á cìnə̀, ámyɛ̌ byɛ̀bɛ́ á n’á swě Yi yò mó, mùnì ga à bə̀k’á kǎr a zhəzhɛrɛ, ǹdə́ lò yə̀ nɛ yàl n zwẽ yé. ²³ Lò mɔ̀bɔ́ ń nə́ ń zal Yi nə̀bán-co ń yàl vwĩ́ kɔn ń pɛ Yi ni mú, rə̀-ná-cí nə́ ń zǔl ne, kɔn súlí, ǹdə́ lò mɔ̀bɔ́ ń nə́ ń cili ń zhə̀zhèèlé sõ mó, à m’a ce ǹ nə Yi vwǎrh mɔ́.