¹ Nwíísí yé né cə́bal mɔ́. Kore byǎ bɛ́ nwə̃́ə̃́. ² Ámyɛ̌ dwə́ né lyì bí gakó, cili-nə, ámyɛ̌ byɛ̀bɛ́ gakó á ŋwɛ́nɛ́ lũ w mú, pyèrhè-nə á zhã̌ á cili, ³ Bə̀sɔ́ná, ǹdə́ náncɛrh, nə̀cə̀nà ǹdə́ nə̀mwà gakó. ⁴ Nyǐ à la à púr a zɔ̀m surhə cìnə́ zɔ̀mà, zɔ̀mà nyɛ̀bɛ́ nə́ zhe kùr myɛ sú à wu wə́. ⁵ À n’â pyèrhè à zhɛ̃̌ à cili səswaálsɛ, a zɛ̃̀ a púr à nyí à n’â nún à nwə̃́ə̃́ ǹdə́ à bɔ̀rɔ́ w à m’a byili zɔ̃̀-eswaálsɛ kùrə̀. ⁶ Wɔ́ bə̀kɔ́n yil à m’a dùr dwã nyɛ̀bɛ́ nə̀ bàn mɔ́ zwini rí ywẽ, ǹdə́ è zwə̀ bé lwɛlɛ rɛ́ gə tú rə̀ kə́kɛ́lɛ́ nɛ rə ce cəcəl w yi ní mú ? ⁷ Bə̀myɛ́ wɔ́ bə̀ jɛ̃̀-kɔn rɛ́ zhə̀n bə̀ zhe, bə̀ n’ê zhẽ̌ bə̀ cìn dɛ̃̌ bə̀ nə̀cɛ̀ndɛ́ nánzhəzhɔ̌ w yilə. ⁸ Lò lò wàr ń mà n kwɛ̃̌ ń dõ myə̌l ye yé, lò lò myɛ wàr ń kwɛ̃̌ numbyíní myə̌l ye Yi ní yé. ⁹ Bə̀ myə̌l ré kwǎndɛ́ ye y cɛ̀ dɛ̃́dɛ̃́, dɛ̃ myɛ zɛ̃̀ rə̀ tɛ̀nɛ́ rə̀myɛ́ la ŋwɔ̀nɔ́ rə wɛ̀rhɛ́ gaga yé ; ¹⁰ Bə̀ t’â la cɛ yó mãɔ̃ yé, bə̀ t’â la lú ǹdə́ bə̀ yírh yə̀ gɔ́rɔ́ yó jòm yé. ¹¹ Bə̀ yírh m’a jòm ò yó : Bə̀ láma cìnə́ n’ê cì, bə-surhə zhe cə́bal ǹdə́ lyì-bəyuru n’ê cì bə̀ jé tɛ̃́, bə yẽ̌ bə̀ nə̀cɛ̀ndɛ́ nɛ bə pə lyì dwã nɛ. ¹² Bə̀ n’ê bùl bə̀ bə̀ jìsí m’a j’â ŋwɛ́nɛ́ gaga byinə nə̀ bə zhɔ̌ zhe yilə, bə̀ n’ê bùl myɛ bə̀ kǎlsɛ́ də̀ cɔ̌ kɔn gaga yé, bə̀myɛ́ byɛ̀bɛ́ bə̀ yilə né du cɛ yó mó. ¹³ Numbyíní kɛ̀bɛ́ lyì bí n’ê zǔl mó t’â dɛnɛ gaga yé : È nyɛ̌ ǹdə vwǎm bə̀ zɔ bə̀ n’ê gwi ta. ¹⁴ Wɔ́ èta è wɔ́ lyì bí bə̀myɛ́ mɔ́ nyə̀nyààrɛ́ sɔ́má yá, sə lyì bí byɛ̀bɛ́ bə̀ só bə̀ zɔ̀mà nɛ́ culu mú n’ê tó bə̀ kùrə̀. ¹⁵ Bə̀ cĩ́ bi cùùrí wẽ́, ǹdə vwàmá ta, cu mú n’ê kál bɛ ; kɔn k’ê t’â la dɔnɔ yé, wu-cángá cìnə́ m’a nɔ̀ bɛ tɛ̃́ ǹdə́ bə̀ nèrh, bə̀ cɛ̀nɛ̀ rɛ́ m’a jé, wɔ́ cùùrí jàà y è m’a yə̀ bə̀ jàà. ¹⁶ Sə Yi mà rə vwǎrh nɛ cùù rí wẽ́, rə kwè ne rə cĩ́ rə̀ sono rə̀ n’ê yìlì. ¹⁷ Bə̀k’á dùr ywẽ b’a nɔ numbyíní è zhe nə̀cɛ̀ndɛ nánzhəzhɔ̌ yil yé, bə̀ è nə̀cɛ̀ndɛ n’ê pùl è sõ kɛ̀lɛ́ w yil yé ; ¹⁸ Bə̀ ń gə la cú, ń tá ń zə kaka ń mə́ ń la yé, ń nə̀cɛ̀ndɛ́ t’â la mɔ́ tó rə zù gɔ́rɔ́ w gaga yé. ¹⁹ Bá ń wɔ̌ sə n wɛ̀rhɛ́ wu-nyɔ̀ cɛ yó má má myɛ, Bə̀ gə zǔl mo má má wu-nyɔ̀ w kɔ̀bɔ́ ǹ yà ǹ zhe mó yil myɛ, ²⁰ ǹ mà ń vò cùù rí wẽ́, ǹ nàmbala bɛ́ sono, ǹ kə́ ǹ tá ń la pwẽ̀ nɔ ń nyǐ gaga yé.