¹ Nwə̃́ə̃́. Kore byǎ bɛ́ nwə̃́ə̃́. ² Bə-zhɔ-zhe wɔ́ nánfɔ̀lɔ̀, ńmyɛ̌ ń wɔ́ zǔl dwí gakó kɔna, nə́ Yi rí cɔ w ǹdə́ rə̀ sə̀pwà pyɔ̀ w yó. ³ Pyɔ̀ w càn, ò wɔ́ lũ w púlə́púlə́ wu-nyɔ̀ kɔna, wɔ́ Səyɔ̃ pyɔ̀ wá ; ò ŋwɛ́nɛ́ lũ jə̀-gwã̀ sõ mó, òmyɛ́ ò wɔ́ pyɔ̌ mɔ́ nánfɔ̀lɔ̀ w cɔ wá. ⁴ Bə̀ yě bə̀ Yi wɔ́ shòò jàà, rə̀ pyǎ bɛ́ kǎlsɛ́ wẽ́. ⁵ Nyǐ, pyǎ tú bə b’e jəl dwã bə zɔ̀m : Bə zɛ̃̀ bə tó dwã bə̀ n’ê zhə̀l bə̀ bànà. ⁶ Bə zɛ̃̀ bə̀ nyǐ, bə̀ wun lo kókó, ywẽ zə bɛ, bə k’a kwɛ̃̀ bə dùr. ⁷ Rə̀myɛ́ yó né, cɛ y j’a zhízhǐ bə̀ yó gàà mɔ́, ǹdə wɔ́ kɛ̃ pwǐ yin gə́ y’a zɛ̃̀ mɔ ń nə́ ń lùl ta. ⁸ Bə̀ j’a jì bi bə lyɛ̃ ǹdə wɔ́ yi-púrhí zho gə́ y’a ce Tərəshiisi bǔ-bwələ yó o cɔ̀ rə ta. ⁹ Kɔn rɛ́ tɛ̀bɛ́ nə́ y’ǎ nyɛ̀ɛ̀ bə̀ zɔ̀m mɔ́, nə́ yírhə́ nɔ rɛ Bə-zhɔ-zhe, mɔ̀bɔ́ ń cǐ jàn cìnə́ bé gakó mó cɔ w wa, nə́ Yi rí cɔ w wa : Yi mà rə ò j’â ŋwɛ́né twéé twéé gaga yilə. ¹⁰ Ǎ Bə-zhɔ-zhe, nyǐ nə́ gə tú nə́ ŋwɛ́nɛ́ ǹ jì y wẽ́, nə́ k’á n’é bùl ǹ wu-bɔ̀nɔ̀ w ń yà ǹ zhe ǹdə́ nə́ba è wẽ́ mó yò. ¹¹ Ǎ Bə-zhɔ-zhe, ǹdə ǹ yil ré gə́ zwẽ lũ w ní ! Wɔ́ èta ǹ còrhó w myɛ zwẽ lũ w cə-yala nɛ́ gakó né ; ǹ jə-jĩ́ jɛ̃̀ y sú ǹdə́ cángá tumə́ dúdú. ¹² Səyɔ̃ pyɔ̀ w n’ô fùù, Zhidə bə̀kwá bɛ́ n’ê wɛ̀rhɛ́ wu-nyɔ̀, bə̀ bùrsí kə́kɛ́rɛ́ yilə. ¹³ Zɛ̃̀-na á byɛ́lɛ́ Səyɔ̃, á tó ò wẽ́ á nyǐ, á gə̀ ò jìsí sə̀ lú sə vò dɛ̃̌dɛ̃̌ mɔ́. ¹⁴ Myə̀lɛ́-na ò byílsí lùlùrì rí ǹdə́ ò pyǎ bɛ́ kǎlsɛ́, mùnì ga á byili ri á byǎ bə̀ bàn mɔ́ nɛ́.