¹ Nwə̃́ə̃́ yé né cə́bal nwíísí. Kore byǎ bɛ́ nwə̃́ə̃́ bə̀ nún Alamɔtɛ yilə. ² Yi wɔ́ àmyɛ́ shòò jàà, zwini gə ne, rə̀ n’ê sɛ̃ à kúrhí. ³ Wɔ́ rə̀myɛ́ è ce cɛ y gə zɛ̃̀ n’ê zhízhǐ, pyàr n’ê lwé nə̀-fɔ̀lɔ̀ w w myɛ, ⁴ bá nə̀-fɔ̀lɔ̀ w nɛ̃̌ mɔ́ gə zɛ̃̀ mə̀ n’ê fùù mə̀ mà dwã nɛ ǹdə́ sɔ̀ pùnú n’ô dwi, mə ce pyàr n’ê zhízhǐ myɛ, ywẽ bə nə́ba zhe yé. Shìrhə́. ⁵ Bwǐ èdù è ŋwɛ́nɛ́ è bù-nèsé nɛ̃̌ mɔ́ n’ê pɛ wu-nyɔ̀ Yi cɔ w nɛ, Dɛ̃̌ cə́bal mɔ́ sə̀pwà jààsɛ́ ń ŋwɛ́nɛ́ sə̀ wẽ́ mó. ⁶ 6Yi ŋwɛ́nɛ́ cɔ w cəcəl wə : Ce ò də̀ zhízhǔ kɔn gaga yé ; cɛ gə n’ê lɛ́ gakó ǹdə́ Yi sɛ̃ ò kúrhí. ⁷ Tənerh zɛ̃̀ sə̀ n’ê vúvǔ tɛ̃́ ǹdə́ sɔ̀, pyə̀-tənerh zhízhǐ ; Yi zɛ̃̀ rə bya rə ce rə̀ cəl du bə nyɛ̀ɛ̀, cɛ y j’a yə̌l. ⁸ Nyǐ Bə-zhɔ-zhe mó ń cǐ jàn cìnə́ bé gakó mó ŋwɛ́nɛ́ ǹdə́ nə́ba, Zhakɔɔbɛ Yi rí wɔ́ nə́myɛ̌ Yi, rə̀myɛ́ rə̀ wɔ́ nə́ shòò jàà. ⁹ Bà-nà, nyǐ-nə Bə-zhɔ-zhe tũ̀-fwààlɛ́, à nyǐ ń gə́ cɔ̀ cɛ y nɛ́ mawé ! ¹⁰ Wɔ́ ńmyɛ̌ ń ce búlə́ né zhɛ̀ lũ cə-yala nɛ́ gakó wə ; ń kɔ́ twã yá, n kə́ swé ré dwã wa, ń ce búlə́ eshə̃-vwãtur rí jí myǐn. ¹¹ Zhǐ-nə, s’á lwar bə̀ à wɔ́ Yi : à cǐ tənèsé, à n’â jí pyɛ̀lɛ́ sə̀ yó, à cǐ cɛ y à n’â jí pyɛ̀lɛ̀ è yó.