¹ Nwíísí yé né cə́bal mɔ́. Lyiisibá nún yilə. Kore byǎ bɛ́. Nwə̃́ə̃́. Sónó nwə̃́ə̃́. ² Sónó zɔ̀mà sú à wu à n’â núnə. À zhe : À tum rí ŋwɛ́nɛ́ pyɔ̌ mɔ́ yilə ! Bə̀ à mə̀jòlò yál ǹdə sá-kanna mɔ̀bɔ́ ń yě kãɔ̃ zhə̀n zhə̀n ga mɔ́, kãɔ̃ ku kɔ̀bɔ́ ń mə́ ń kɛ̃ mɔ́ ta ! ³ Nyǐ wɔ́ ǹmyɛ́ ǹ wɔ́ ébɔ́ du numbyínsí gakó, Yi co rə̀ pɛnɛ́ y nánfò w ǹ nyú wə : Wɔ́ rə̀myɛ́ yil Yi cĩ́ bwəl ǹ yó twéé twéé gaga yilə. ⁴ Búlə́ kã̀dɔ, zɛ̃̀ ń lyẽ ǹ búlə́ shù wə́, ǹdə́ búlə́ wẽ̀ ré ǹdə́ ǹ zùwə́ y è n’ê jə́jɛ̀mɛ́ mɔ́, ⁵ Zhə̀nà, ǹ zùwə́ y n’ê jə́jɛ̀mɛ́ ! zɛ̃̀ ń jòm ǹ eshə-vwɛ̃tu wə́, ń vò ń bú ń jí bɛlɛ, ń zwẽ zhə̀n rɛ́ ǹdə́ wu-bɔ̀nɔ̀ w ǹdə́ cángá tumə e nyí ni, sə ǹ jə-jĩ́ ń twĩ̀ tũ̀-fwààlɛ́ tɛ̀bɛ́ rə̀ n’ê zɛ̃̀ wu ni mú ! ⁶ Ǹ cama nɛ́ nyə́ wɔ́ námmyɛ̀ɛ́sɛ ; ǹ m’a jì dwə́ nə tu tɛ̃́ ǹ kùr wə ; Ǹ cama nɛ́ m’a zò pyɔ̌ mɔ́ zwə̀ bé shíshùúri ni. ⁷ Ǎ Yi, ǹ pyɛ̀lɛ̀ də̀gwã́ y ŋwɛ́nɛ́ twéé twéé gaga yilə ; Ǹ pyɛ̀lɛ̀ də̀-dɔ̀lɔ̀ wɔ́ cángá pyɛ̀lɛ̀ də̀-dɔ̀lɔ̀. ⁸ Ǹ só cángá tumə né, sə ǹ súl wu-bárhɛ́ tumə né : Ǎ Yi, wɔ́ rə̀myɛ́ yilə, ǹ Yi rí ló wu-nyɔ̀ nwə̃̌ ǹ yó, n yẽ̌ ń tó-dwã bɛ́ nɛ. ⁹ Ń gàndɛ́ j’â wɔ́ myiiri ǹdə́ alɔwɛ́ɛ́sɛ́ ǹdə́ kanɛ́ɛ́lɛ lwẽ́ nã́nyə̀nyɛ̀lɛ́ dúdú sá ; pyɔ̌ kǎlsɛ bə̀ lù bə zə nàntúr yə́lə́ bə m’ê wɛ̀rhɛ́ sɛ mɔ́, wò-dúúrí rə̀ n’ê dwí ǹdə́ nyínsí mú j’â n’ê pɛ mɔ́ wu-nyɔ̀. ¹⁰ Pyǎ bə̀kwá tú bə̀ ŋwɛ́nɛ́ byɛ̀bɛ́ ǹ só mó wẽ́ ; pyə̀-kɛ̃ mɔ́ zɛ̃̀ ń zhǐ ǹ jə̀-jĩ́ ni ǹdə́ Ofyiiri sánə́má. ¹¹ À bə̀kɔ́, pyèrhè ǹ zhɛ̃̌ ń cili ; swě ǹ dwí rí ǹdə́ ǹ da kɛ̀lɛ́ y yò. ¹² Bə̀ nyǐ pyɔ̌ mɔ́ nə́ ń yǎl mɔ́ ǹ cɛ̀nɛ̀ rɛ́ yilə ; bə̀ wɔ́ ńmyɛ̌ ń wɔ́ ǹ yó-cə́bal mɔ́, lwəl ǹ cìn tɛ̃́ ń yé né. ¹³ Tiiri lyì bə̀kɔ́, nyǐ dwí rí nə́cɛ̀nà bɛ́ nánfwààlɛ́ m’a zə jɛ̃̀-kɔn bə m’e jə́jɛ̀rɛ́ mɔ́ bə pyà. ¹⁴ Pyɔ̌ mɔ́ bə̀kɔ́ mɔ́ zù sánə́má kàmmə̀-jɛ̃̀ kàmə̀zwǐ, ń ŋwɛ́nɛ́ pyɔ̌-kɛ̀lɛ́ w ń gakó nə́ ń jə́jɛ̀mɛ́ ; ¹⁵ bə zɔ mɔ bə bə̀ ń zhǐ pyɔ̌ mɔ́ yé né, ǹdə́ ń kàmə̀zǔrh sə̀ sɔ̀ wa, ǹdə́ ń tó-dwã kana-byǎ, bə̀ zɔ bə bə̀ bə tó mo bə̀ zhǐ ; ¹⁶ Bə̀ zɔ bɛ bə̀ b’e n’ê zwì pyɔ̌ kɛ̀lɛ́ w ǹdə́ bə̀ n’ê fùù ǹdə́ wu-nyɔ̀. ¹⁷ Ǹ byǎ bɛ́ m’a zwẽ ń dabá jààsɛ́ bə jòm ; ń ce bə yə pyǎ bə jòm tənà y nyí rí gakó w bə̀ cìní yə́.