¹ Nwíísí yé né cə́bal mɔ́. Kore byǎ bɛ́ nwə̃́ə̃́. ² Ǎ Yi ! Nə́ nyɛ̀ɛ̀ ǹdə́ nə́ zhã̌, Nə́ dabá byili nə́ba ǹ tũ̀-fwààlɛ́ ǹ wɛ̀rhɛ́ shãã ga bə̀ yi ní mú, ³ ǹ jì tənèrh ǹdə́ ǹ jɛ̃̀ y jàn rɛ́, ń mə́ ń cĩ́ bi sə̀ jààsɛ́ wẽ́, ǹ mà dwə́ né dwã bɛ́, ń mə́ ce bə jòm bə twèlé bə vò gaga. ⁴ Nyǐ è də̀ bə̀ búlə́ shìmì bə̀ m’e zwẽ tənà y yé, è də̀ bə̀ jɛ̃̀ jàn è vwǎrh bɛ yé ; wɔ́ ǹmyɛ́ jə̀-jĩ́ yə́, wɔ́ ǹmyɛ́ jɛ̃̀ yá, wɔ́ ǹ yé-zhã̌ y pwẽ̀ ré, ǹ gə́ yà ǹ só be mó yilə. ⁵ Ǎ Yi ! ǹ wɔ́ à pyɔ̌ : Pə nyí, mùnì ga Zhakɔɔbɛ nə vwǎrh ! ⁶ Ǹmyɛ́ gə ŋwɛ́nɛ́ ǹdə́ nə́ba, nə́ m’a ji nə́ zwə̀ bé tɛ̃́, ǹmyɛ́ gə ŋwɛ́nɛ́ ǹdə́ nə́ba, nə́ m’a nɔ̀ lyì bí byɛ̀bɛ́ bə̀ n’ê bwí ǹdə́ nə́ba mɔ́ tɛ̃́ nə́ bɔbɔlɛ. ⁷ Bə̀ nyǐ è də̀ à twã y zhə̀n à zhe yé, è də̀ à búlə́ shù w ò m’a zwẽ né yé ; ⁸ Bə̀ nyǐ wɔ́ ǹmyɛ́ ǹ nə́ zwẽ nə́ba nə́ zwə̀ bé jɔ̃̀ wa, ǹ nə́ ń ce lyì bí byɛ̀bɛ́ bə̀ n’ê súl nə́ba mɔ́ yiyiri tɛ̃́. ⁹ Nə́ zhe zùwə́ Yi wẽ́ dɛ̃ gakó, nə́ n’é zǔl rə̀ yil ré byinə nə̀ bə zhɔ̌ zhe yilə. ¹⁰ E jà ndə́ rə̀myɛ́, ǹ nə́ ǹ cìrh nə́ba ǹ ce kwã nɛ́, ǹ nə́ ǹ pɛ nə́ba cìzhìlə̀, ǹ kə́ ǹ tá ǹ tó nə́ shə̀dɛ́ɛ́sɛ́ nɛ ǹ dwí yé ; ¹¹ ǹ nə́ ǹ ce nə́ kwɛ̃̀ nə́ kwã nə́ zwə̀ bé yé né nə́ vò kwã nɛ́, lyì bí byɛ̀bɛ́ bə̀ súl nə́ba mɔ́ zɛ̃̀ bə pwà nə́ cùù rí. ¹² Ǹ kwè nə́ba ń pə ǹdə pyììsi bə̀ la dɔ́m ta, ǹ ce nə́ dùr nə́ làà tənèsé wẽ́. ¹³ Ǹ nə́ ǹ yè ǹ dwí rí nánfò, ǹ tá ǹ kwè re ǹdə kò-twě ta yé. ¹⁴ Ǹ ce nə́ jǐrh cìzhìl kɔn nə́ jə-dwã bɛ́ sono, mɔ̀n kɔn lyì bí byɛ̀bɛ́ bə̀ jě bə kə́kɛ́lɛ́ nə́ba mɔ́ n’ê mɔ̀nà ; ¹⁵ ǹ ce nə́ jǐrh səswaálsɛ kɔn tənèsé lyì bí m’ê səswala, ǹdə́ ywẽ́ zhúzhú kɔn dwə́ né dwã bɛ́ wẽ́. ¹⁶ À cìzhìl ré j’â ŋwɛ́nɛ́ à yé né dɛ̃ gakó, yiyuru pyi à yé ne, ¹⁷ ǹdə́ à gə tú à nyɛ̌ lò mɔ̀bɔ́ ń nə́ ń tùrh ne, ń nə́ ń fuuli ni mú, ń nə́ ń pyà ń jim cṹ mú. ¹⁸ Rə̀myɛ́ gakó yú nə́ba, e jà nə́ yə̀ ǹ yò swě yé, nə́ yə̀ ǹ dɔbrɛ myɛ cɔ̀ yé : ¹⁹ Nə́ wu yə̀ pyìrhí gaga, nə́ nà yə̀ ǹ sɔ́má yó ywə̀r nə́ vò kwã nɛ́ gaga yé, ²⁰ e jà ń zɛ̃̀ ǹ nə́ ǹ nɔ̀m nə́ba tɛ̃́ ǹ bɔbɔlɛ gɔ-kǔlsi tənà wa, n zə cu ywə́l ń mə́ pyi nə́ba. ²¹ Nə́ gə y’a swě nə́ Yi rí yil ré yò, nə́ zhẽ̌ nə́ jɛ̀rh nə́ ce yi tɛ̀bɛ́ nə́ yə̀l rə̀ pár mɔ́ nɛ, ²² Yi nə y’à t’â la rɛ lwar, rə̀myɛ́ tɛ̀bɛ́ rə̀ yě kɔn tɛ̀bɛ́ rə̀ shèè numbyíní wu w wẽ́ pár mɔ́ ? ²³ Sə nyǐ wɔ́ ǹmyɛ́ yil bə̀ n’ê zal nə́ba bə̀ zwə́l dɛ̃ gakó, bə̀ n’ê nyǐ nə́ba ǹdə pyììsi shɛ̀bɛ́ bə zɔ bə̀ m’ê la sə̀ gu jàà w mɔ́ ta. ²⁴ Cǐnnə ! zɛ̃̀ jan rɛ́ wa, wɔ́ bə̀kɔ́n yil ǹ dɛ̌ ? Zɛ̃̀ jan rɛ́ wa ! ǹ bə̀ká cìrh nə́ba ń ce kwã nɛ́ twéé twéé gaga yé ! ²⁵ Wɔ́ bə̀kɔ́n yil ǹ nə́ ǹ shèè ǹ cìn nə́ yé né ? Wɔ́ bə̀kɔ́n yil ǹ swě nə́ nɔ̀nɔ̀ w ǹdə́ nə́ zúzúnú w yò mó ? ²⁶ Bə̀ nyǐ nə́ tu nə́ pyě sho w wẽ́, nə́ yala nɛ́ dɛ̃ cɛ y nɛ.