¹ Ǎ Yi, pɛ̃ bùrì, ce nyí à kwã nɛ́ à m’a bú ǹdə́ tənèsé shɛ̀bɛ́ sə̀ lyì bí yə̀l ń pár mɔ́ ! Zwẽ né yǔyǔ cìnə́ bé ǹdə́ lwɛlɛ cìnə́ jɔ̃̀ wa. ² À Yi, ǹmyɛ́ ǹ wɔ́ zwennə, wɔ́ bə̀kɔ́n yil ǹ nə́ ǹ cìrh ne ǹ ce kwã nɛ́ mɔ́ ? Sə Wɔ́ bə̀kɔ́n yil à mə̌ dwã sə à n’â zhə̀l wu-zhìlù wẽ́ mó ? À zù-bal mɔ́ ń nə́ ń nwɛ̀nɛ̀ mɔ́, nɔ̀nɔ̀ w wẽ́ mó ? ³ Ce ǹ pwẽ̀ ré ǹdə́ ǹ cángá y bə̀ rə̀ zə nɛ à m’a vò, rə zə nɛ rə vò ǹ sə̀pwà pyɔ̀ w ǹdə́ ǹ jì y wə. ⁴ À m’a vò Yi vwĩ̀-jùlú w nyí ni, bə̀ wɔ́ Yi rə̀ wɔ́ à wu-nyɔ̀ ǹdə́ à fùwə́, Ǎ, À Yi, à Yi, à m’a dú bɔ̀rɔ́ a m’a zǔl mó ! ⁵ À shíshùrhú, è nə wɔ́ byè yil ǹ nə́ ǹ mà à wẽ́, ǹ mə́ ǹ wɔ́wɔ́lɛ́ mɔ́ ? Dɛ̃̌ kɔn Yi sono, bə̀ nyǐ à gwẽ̌ m’a zǔl re ; Rə̀ wɔ́ à Yi ǹdə́ à vwǎrhna.