¹ Nwíísí yé né cə́bal mɔ́. Kore byǎ bɛ́ nwə̃́ə̃́. ² À Yi, nyǐ à n’â pyà mɔ́ ǹdə ta gə́ y’a pyà nɛ̃̌ jààsɛ nɛ́ ta ! ³ Yi, ǹ nə̀nyɛ̀lɛ̀ zhe ne, Yi rí nã́nyì y nə̀nyɛ̀lɛ̀ è zhe ne : Wɔ́ dǒ dɛ̃ à m’a vò a zhì Yi yé né ? ⁴ Wɔ́ yə́-nàná nə́ wɔ́ kùjú à n’â jí cəcɛ̃ ǹdə́ nə̀nyɔ́nɔ́ ga, e jà lyì bí j’â n’ê wə̀l ne twéé twéé bə̀ zhe : Ǹ Yi rí ŋwɛ́nɛ́ yẽ̀ ? ⁵ Ce a zɛ̃̀ à n’â lyǐrh à wẽ́, à gə́ y’à ŋwɛ́nɛ́ lyì-zhǎ bɛ́ cəcəl wə, ǹdə́ wu-nyɔ̀ búbwéése, ǹdə́ Yi nə̀bán co, à wɔ bə̀ yé né a zə bɛ à m’â zhə̀l nə́ la Yi jì y w yi ní mú, è y’à wɔ́ címsi lyì-zhǎ bɛ́ y’à n’ê jí. ⁶ À shíshùrhú, è nə wɔ́ byè yil ǹ nə́ ǹ mà à wẽ́, ǹ mə́ ǹ wɔ́wɔ́lɛ́ mɔ́ ? Dɛ̃̌ kɔn Yi sono, bə̀ nyǐ à gwẽ̌ m’a zǔl re ; Rə̀ wɔ́ à Yi ǹdə́ vwǎrhna. ⁷ À wu zhìlì à wẽ́ : Sə wɔ́ ǹmyɛ́ yò à zhì Zhɔrdɛ̃ tənà y ǹdə́ Arəmɔ̃ tənà y ǹdə́ Məsəyaarɛ pyàr rɛ́ w à n’â bùlə̀. ⁸ Nɛ̃̌ n’ê byẽ̀ mə̀ dõ nɛ̃̌ bə bə̀ bə nə dwã, ǹdə́ ǹ dwà y tú è n’ê ce sɔ̀, è nɛ̃̌ n’ê lwé tɛ̃́ yi ní ; rə̀myɛ́ yó né ǹ nə̀-zha y já e tó à yó e lyɛ̃. ⁹ È gə wɔ́ nə̀nyɔ́nɔ́ nɛ, Bə-zhɔ-zhe nə́ ń pɛ ń pɛnɛ́ y nánfò yə́, è gə wɔ́ cəcɛ̃ nɛ, a zɛ̃̀ à n’â nún à zǔl mo, à n’â ce à Yi rí rə̀ n’ê pɛ nyǔ mú. ¹⁰ À n’â wə̀l à Yi rí, à pàtá y nɛ : à zhe : Wɔ́ bə̀kɔ́n yil ǹ swě à yò ? Sə Wɔ́ bə̀kɔ́n yil à mə̌ dwã sə à n’â zhə̀l wu-zhìlù wẽ́ mó ? À zù-bal mɔ́ ń nə́ ń nwɛ̀nɛ̀ mɔ́, nɔ̀nɔ̀ w wẽ́ mó ? ¹¹ Lyì bí byɛ̀bɛ́ bə̀ n’ê nwɛ̀nɛ̀ nɛ mɔ́, gə n’ê tùrh ne, à kúr ré n’ê kɛ́, Bə̀ n’ê wə̀l ne twéé twéé bə̀ zhe : Wɔ́ yẽ̀ ǹ Yi rí ŋwɛ́nɛ́ ?