¹ Nwíísi yé né cə́bal mɔ́. Dəvyidi nwə̃́ə̃́. ² Wu-nyɔ̀ cə́bal wɔ́ lò mɔ̀bɔ́ ń nə́ cili nə̀mɔ̀ sono ! Zwini dɛ̃, Bə-zhɔ-zhe mà n vwǎrh rə̀-ná-cí ; ³ Bə-zhɔ-zhe mà n yìlì mú n zə myə̌l, ń mà n swéné ń cìn cɛ yó, ń tá ǹ la mɔ ń zwə́ bé nɛ pɔ bə wɛ̀rhɛ́ ǹdə bə̀ gə́ só né yé. ⁴ Ń gə tu címí, Bə-zhɔ-zhe nə́ ń sɛ̃ mɔ́ ń kò-pyènè y wə, ǹ nə́ ǹ zal ń wu ni ń címsí gakó wẽ́. ⁵ À n’â wə̀lə̀ : Bə-zhɔ-zhe, dǔr à nɔ̀nɔ̀ ! Wárh nɛ à wu w wẽ́ ! bə̀ à dó ǹmyɛ́ nɛ. ⁶ À zwə̀ bé n’ê zɔ̀m ǹdə́ nɛ́ ǹdə́ wu-bárhɛ́ zɔ̀mà bə̀ zhe : Wɔ́ dǒ dɛ̃ ń la cú ? Wɔ́ dǒ dɛ̃ ń yil ré la tɛ̃́ jó ? ⁷ Lò gə tú ń nɔ nɛ, wɔ́ kɔma zɔ̀mà ń mə́ ń twí, n pyà à yil zhùlù zɔ̀mà, n mə n kwɛ̃̀ n vò ń nə́ ń zɔ̀m kwã nɛ́. ⁸ À zwə̀ bé gakó j’â n’ê sɔ́sɔ́mɛ́ ǹdə́ dwã bə̀ m’ê bwí ǹdə́ nɛ ; bə̀ n’ê bùl bə̀ à zwini rí m’a ce a jé tɛ̃́ ; bə̀ n’ê wə̀lə̀ : ⁹ Kɔn zù mu dɛ̃́dɛ̃́, nyǐ mú ń pyě, ń wàr ń kə́ ń la zã̀ɔ̃̀ yé ! ¹⁰ Bá lò mó mɔ̀bɔ́ yə̀-zùlə́ y’à ŋwɛ́nɛ́ nə́ bwəl wə, ǹ yà ń nə́ ń jí à kùjú w mú, cìcì mú zɛ̃̀ n zə ń nə̀kúl n tə́ nɛ. ¹¹ Sə ǹmyɛ́, Bə̀-zhɔ-zhe, dǔr à nɔ̀nɔ̀, sə́ ká ń kwɛrhɛ nɛ ń cĩ́ à jàà wa ! À m’a zɛ̃̀ a càrh bɛ kɔn tɛ̀bɛ́ rə̀ mə̌ ǹdə́ bɛ mɔ́. ¹² À m’a zɛ̃̀ a lwar bə̀ ǹ só ne, èta, à zù-bal mɔ́ tá ń la bɛlɛ jú à yó yé. ¹³ Ǹ sɛ̃ nɛ à gə́ wɔ́ wu-põ̀ cə́bal mɔ́ yilə, sə ǹ kwè ne ń cĩ́ ǹ yé né twéé twéé gakó yilə. 14 Bə̀ Bə-zhɔ-zhe, Esərayɛl Yi rí nə còrhó, byinə byinə nə̀ bə zhɔ̌ zhe yilə ! Amɛn ! Àmɛn