¹ Nwíísí yé né cə́bal mɔ́. Dəvyidi nwə̃́ə̃́. ² À y’à n’â dɛ̃̀ kɔn Bə-zhɔ-zhe sono ; sə ń lwəl tɛ̃́, n cili à búbwéé yə́. ³ N vùr ne gɔ́rɔ́ w ò n’ô cɔ̀ lò mó wẽ́, bɔ̀bɔ̀rɔ̀ w wẽ́ ; n kwɛrhɛ à nèsé n ce à zhǐ pàtá yó, n ce à n’â zhə̀l kẽkẽ. ⁴ N ce nwə̃́ə̃́ nándwə̃̀ à nyú wə́, à Yi rí còrhó yilə ; lyì nánzhəzhɔ̌ yírhə́ nɔwa, sə ywẽ zɔ bɛ́, bə kwè bə̀ cìn bə pə Bə-zhɔ-zhe ne. ⁵ Wu-nyɔ̃̀ cə́bal wɔ́ lò mɔ̀bɔ́ ń pɔ ń cìn Bə-zhɔ-zhe ne, n yẽ̌ cìn-byilu cìnə́ ǹdə́ kɔma cìné ne mó ! ⁶ Bə-zhɔ-zhe, à Yi, ǹ twĩ̀ ǹ tũ̀-fwààlɛ nánzhəzhɔ̌ nə́ yilə ; lò lò tɛ̀nɛ́ ń la ǹmyɛ́ nyɔrhɔ yé ; ce à n’â yǎl a bwə̀l ń tũ̀-fwààlɛ́ a byili, sə rə̀ já dɛ̃́dɛ̃́ ǹdə́ gál e byili. ⁷ Ǹ tá ǹ yǎl vwĩ̀, ǹ tá ǹ yǎl pɛnɛ́ myɛ yé, ǹ pul à zhã̌ nɛ́ : ǹ tá ǹ lwə̀l vwĩ̀ námpúm cɛ̃́ɛ̃́, ǹ tá ǹ lwə̀l yə̀-bə̀lɔ̀lɔ́ vǔr vwĩ̀ kɔn myɛ yé. ⁸ Rə̀myɛ́ ce, a zɛ̃̀ a wɔ̀ : Nyǐ, à zɔ sá-pyíl ré rə̀ kɛ̃ à yil mó à m’â bànà. ⁹ À Yi, à n’â yǎl a wɛ̀rhɛ́ ǹ pùbùlə̀ né ! ǹdə́ ǹ nyə́ né nə̀ ŋwɛ́nɛ́ à wẽ́ mó. ¹⁰ 1À n’â bwə̀l cángá tumə né à byili dwã gùlú nánfɔ̀lɔ̀ w wa ; Nyǐ, Bə-zhɔ-zhe, ǹ yě bə̀ à t’â pyi à nyí yé ! ¹¹ À tâ cə̀r cángá tumə a cĩ́ à wẽ́ yé, à n’â bwə̀l ǹ zhə̀n rɛ́ ǹdə́ vwǎrh mɔ́ à byili ; à t’â shèè ǹ wu-bɔ̀nɔ̀ w ǹdə́ ǹ cángá y dwã gùlú w nánfɔ̀lɔ̀ w wẽ́ yé. ¹² Ǹmyɛ́, Bə-zhɔ-zhe ! ǹ tá ǹ la nɔ̀nɔ̀-dǔr yò cõ yé ; ǹ wu-bɔ̀nɔ̀ w ǹdə́ ń cángá y m’a yìlì ni twéé gakó. ¹³ Bə̀ nyǐ címsi nánzhəzhɔ̌ sə̀ bə yó zhe, zhe ne ; à yə̀-bəlwǎlɛ́ còrhò-tum rí yiní ni ; ce à yírhə́ né k’ê wàr kaka nə̀ nɛ yé, címsí sə̀ zhe ne mó já dɛ̃́dɛ̃́ du ywésé à yó w mó, ¹⁴ 1Ǎ Bə-zhɔ-zhe, yál yi ni, sə́ bə̀ ń zwẽ ne, bə̀ là là ń sɛ̃ à kúrhí ! ¹⁵ Sə bə̀ gakó tó dwã bə nə cìzhìlə, bə̀ wun zhizhiri, bə̀myɛ́ byɛ̀bɛ́ bə̀ n’ê pyà à myəl ré vǔr mó ! bə̀ k’a kwɛ̃̀ ǹdə́ bə̀ yírhə́ shɛ̀l, bə̀myɛ́ byɛ̀bɛ́ bə̀ n’ê yǎl à yò zhùlù mú ! ¹⁶ Bə̀ bə̀ cìzhìl ré ce bə yiyiri tɛ̃́, bə̀myɛ́ byɛ̀bɛ́ bə̀ n’ê ywə̌rh ne bə̀ zhe bə̀ : yǒ yǒ ! yǒ mó ! ¹⁷ Bə̀ lyì bí bə̀ n’ê pyà mɔ́ mɔ́ gakó, fǔ ǹdə́ wu-nɔ̀ ǹmyɛ́ wẽ́ ! Bə̀ lyì bí byɛ̀bɛ́ bə̀ só ǹ vwǎrh mɔ́ mɔ́, j’â n’ê wə̀l twéé twéé bə̀ : Bə-zhɔ-zhe yil ré nə còrhó !