¹ Nwíísí yé né cə́bal. Yədətɛ̃ nwə̃́ə̃́. Dəvyidi nwə̃́ə̃́. ² À y’à n’â zɔ̀m à wẽ́ à zhe : À m’a dɛ̃̀ à cìnə̀, mùnì ga à bə̀k’a zə à mə̀jòlò w à wɛ̀rhɛ́ yə̀-bəlɔ̀lɔ́ yé, ǹdə́ lyì-bəlwɛ̀lɛ́ y gə j’â la à yé né yál gaga, à m’a zə ku a lyẽ à nyí rí. ³ À zhǐ à pyi à nyí, à zhǐ shɛ́shɛ́ ; ǹdə́ à wɔ́ zúzúnú cə́bal ga ; e jà kɔn tɛ̀bɛ́ rə̀ n’ê yì ní mú də̀ námpɔ́lɛ́ yé. ⁴ À wu w y’à n’ê kwɛ̃́ myǐn à wẽ́, myǐn y’à n’ê jí à wẽ́, zɔ̀mɛ̀ zɛ̃̀ rə bə̀ à mə̀jòlò w yó a wɔ́ : ⁵ Bə-zhɔ-zhe ! byili ni à yó gurə́ y gə́ la nɛ́ yál, ǹdə́ à dwã nɛ́ yó gə́ la nɛ́ mɔrhɔ ; mùnì a lwar bə̀ à bə nɛ́ zhe yé. ⁶ Nyǐ ǹ dwã nɛ́ ǹ pɔ́ nɛ́ mɔ́ wàn rɛ́ wɔ́ jə̀-pyìlì wàn, à nyǔ mú wɔ́ nánfò ǹ yé né. Zhə̀nà, numbyíní kɛ̀bɛ́ è n’ê zhì dɛ̃̌ è zhə̀l mó gakó wɔ́ zho. ⁷ Zhə̀nà, numbyíní n’ê zhə̀l è yə́yɛ́lɛ́ ǹdə́ ywə́l ta, è n’ê zhizhiri dɛ̃̌ zhə̀n zhə̀nà ; è n’ê pyà jɛ̃-kɔn è cĩ́ dwã yó, e jà è yə̀l lò ná-dwí yil ń la rɛ́ pwǎ yé. ⁸ Cǐnnə, èlǎsɛ̃́, wɔ́ bə̀kɔ́n à wɔ̌ à m’a dɛ̃̀ ? Wɔ́ ǹmyɛ́ sono à n’â dɛ̃̀ kɔn nɛ́. ⁹ Zwẽ ne à yə̀-bəlwǎlɛ́ gakó wẽ́ ! Ǹ bə̀ká yẽ̌ bə surhə-zhe cìnə́ pɛ̃ cìzhìl yé. ¹⁰ À pyi à nyí, à t’â púr à nyí yé, bə̀ wɔ́ ǹmyɛ́ ǹ nə́ ǹ twĩ̀. ¹¹ Yẽ̌ ne, ǹ bə̀ká mà nɛ yé ! mùnì ga à bə̀k’a tu ǹ jɔ̃̀ w ń mà yé. ¹² Ǹ nə́ ń pɛ còrhò-tum numbyíní ni, ń mə́ zwə́r y è dwə́ə́ ré yilə. Ǹ nə́ ǹ cɔ̀ kɔn tɛ̀bɛ́ ǹ só dɛ̃́dɛ̃́ du mú, ǹdə́ səlɔ̀wa gə́ y’a jí kɔn nɛ́. Zhə̀nà, numbyíní gakó wɔ́ zho. ¹³ Bə-zhɔ-zhe, cili à yi-co wə, sə́ pyèrhè ǹ zhɛ̃̌ ń cili à búwéé yə́ ! Tə̀ à yə́-nàná yilə, sə́ nyǐ à sono ! Bə̀ nyǐ à wɔ́ zhə-bal ǹ sono, à jě tənà y w ǹdə à dabá gakó ta.