¹ Dəvyidi nwə̃́ə̃́. Wẽ̀ lyǐrh yilə. ² Bə-zhɔ-zhe ! ǹ bə̀ká byili ni à yé ǹdə́ ǹ lyim yé, sə ǹ bə̀ká zɛ̃̀ ǹ nə́ ǹ pupuri tɛ̃́ ń mə́ pɛ̃ còrhò-tum yé. ³ Nyìwé : ǹ cama nɛ́ zɔ nɛ, ǹ zə ǹ jɛ̃̀ ń mà nɛ. ⁴ Ǹ lyim rí zɛ̃̀ à yó, ce à yala nɛ́ gakó n’ê yì, à yə̀-bəlɔ̀lɔ́ w ce à kúr rí gakó cùwə̀. ⁵ À dwə́ə́ ré já dɛ̃́dɛ̃́ du ni ; rə̀ nyɛ̌ ǹdə zhĩĩ tɛ̀bɛ́ rə̀ dùm dɛ̃́dɛ̃́ nɛ à yó wə. ⁶ À nyəla nɛ́ wə́r, sə wɔ́ à nyə̀nyàà rɛ́ yilə. ⁷ À wu zhìlì, à yó lwəl tɛ̃́, à yə̀l à gə́ b’a k’â tó né yé ; Dɛ̃ gakó à j’â n’â zhə̀l ǹdə́ wu-zhìlù. ⁸ Bə̀ lwɛlɛ bárhɛ́ ŋwɛ́nɛ́ à wẽ́ rə̀ n’ê jí myǐn à wẽ́, kɔn k’ê tɛ̀nɛ́ à yala nɛ rə̀ t’â yì yé. ⁹ À gakó j’a bɔ́bɔ̀rɛ́, à k’â bə̀ jàn zhe yé ; À wu w k’ô bə zhǐ ò jàà w yé, à n’â súl à lwé à wẽ́. ¹⁰ Cǐnnə ! kɔn tɛ̀bɛ́ à n’â yǎl mɔ́ gakó ŋwɛ́nɛ́ ǹmyɛ́ yé né, ǹ yě kɔn dɛ̀bɛ́ à n’â shǐrh à wẽ́ mó párá. ¹¹ A wu w n’ô zhízhǐ, à jàn rɛ́ zhɛ̀ rə yẽ̌ ne, à yírhə́ né cìcì mú myɛ k’ê bə nə́ nɛ yé. ¹² À nyəlɛ́ rɛ́ ce à dɔwabá, ǹdə́ lyì byɛ̀bɛ́ à yě bə̀ párá, ǹdə́ à jə̀-dwã bɛ́ gakó dùr bə̀ yẽ̌ ne. ¹³ Lyì bí byɛ̀bɛ́ bə̀ n’ê pyà à myə̌l vǔr mó, zɛ̃̀ bə̀ pə̃̀ bə̀ pǎm rɛ́ tɛ̃́ ; byɛ̀bɛ́ bə̀ n’ê pyà à gu mú, zɛ̃̀ bə̀ n’ê zɔ̀m zɔ̀m-bəywààlɛ à yilə, dɛ̃ gakó wɔ́ à myìnù zɔ̀mà bə̀ n’ê zɔ̀mà. ¹⁴ Sə è gə wɔ́ àmyɛ́ yilə, à nyɛ̌ ǹdə́ sə̀bɔ̀rhɔ̀ ta, à bə kaka nyɛ̌ yé ; à nyɛ̌ ǹdə nyì-bədɔ̃ɔ̃ cə́bal nɛ, à t’â púr à nyí à zɔ̀m yé. ¹⁵ Amyɛ́ nyɛ̌ ǹdə lò mɔ̀bɔ́ ń zwã̌ bə nyɛ̌ ta, ń tá ń lyár zɔ̀mà yé. ¹⁶ Bə-zhɔ-zhe ! wɔ́ ǹmyɛ́ yó w à n’â nyǐ ni ; Cǐnnə, à Yi ! Nyǐ wɔ́ ǹmyɛ́ ǹ m’a lyár nɛ ! ¹⁷ Bə-zhɔ-zhe ! à y’à lwə̀l mó a wɔ̀ : ǹdə́ à gə tú a mà nà y yi ní, sə bə̀ká yẽ̌ à zwə̀ bé zɛ̃̀ bə̀ n’ê fùù à tɛ̃́ twirí y yil yé ! ¹⁸ Bə̀ à tɛ̃́ tu rí y bwə́l, nyǐ à zúzúnú w ò zhǐ à yé né twéé twéé. ¹⁹ Bə̀ à lwar b’à dówə́, ce à yə̀-bəlɔ̀lɔ́ w n’ô nwɛ̀nɛ̀ nɛ. ²⁰ E jà à zwə̀ bé zhe bəsàzùlí, bə̀ jɛ̀ kẽkẽ ; byɛ̀bɛ́ bə̀ súl ne, e jà rə̀ bə kùr zhe mó já dɛ̃́dɛ̃́. ²¹ Bə̀ n’ê càrh nɛ lwɛlɛ, cɛ̀nɛ̀ rɛ́ à wɛ̀rhɛ́ a pə bɛ mɔ́ yilə ; Bə̀ wɔ́ à zwə̀, à gə́ n’â pyà cɛ̀nɛ̀ wɔ̀rhɔ́ mɔ́ yilə. ²² Bə-zhɔ-zhe, à Yi ! Ǹ bə̀ká vò kwã gaga ń yẽ̌ ne yé !