¹ Wɔ́ Dəvyidi nwə̃́ə̃́. Ǹ lyim bə̀k’a zɛ̃̀ ǹdə́ lyì-bəlwǎlsɛ́ yé, ǹ bə̀k’a dùr byɛ̀bɛ́ bə̀ n’ê wɛ̀rhɛ́ lwɛlɛ mɔ́ bwɛ̃̌ yé. ² Bə̀ bə̀ kùl làlà ǹdə gɔ ta, bə̀ b’a pyɛ̀nɛ̀ ǹdə gɔ-lyɔ̃̀ ta. ³ Ǹmyɛ́ wírí ń zhí Bə-zhɔ-zhe ne, sə́ wɛ̀rhɛ́ cɛ̀nɛ̀ ; Zə tənà y è yə̀ ǹ jòmə̀ jàà, sə́ vò cángá tumə né wẽ́ nə yìlì mú kaka bə̀k’a yí ní mú yé. ⁴ Yẽ̌ Bə-zhɔ-zhe yə̀ ǹ wu-nyɔ̃̀, sə́ yẽ̌ bə̀ ń mà n pɔ̃́ kɔn dɛ̀bɛ́ wu-bùlə̀ zhe mó. ⁵ Kwě ǹ kɔn dɛ̀bɛ́ rə̀ bàn mɔ́ ń ce Bə-zhɔ-zhe jɔ̃̀ wa, zhí ńmyɛ̌ nɛ, sə́ yẽ̌ bə̀ ń mà n wɛ̀rhɛ́ n pɔ̃́. ⁶ Ń mà n ce cángá tumə né du rə yə̌r ǹdə pwẽ̀ ta, n ce kɔn dɛ̀bɛ́ rə̀ mə̌ ǹdə́ mɔ́ mɔ́ yə̀ ǹdə wɔ́ nə̀nyɛ́nɛ́ è yú yi yə́-pɛ̀lɛ́ w ta. ⁷ Gu ǹ nyí ń zhì shɛ́shɛ́ Bə-zhɔ-zhe yé yé, ń dɛ̃̀ kɔn ń sono ; ǹ lyim bə̀k’a yì lò bə̀ ń tum zwẽ nyí yil yé, rə̀ bə̀k’a yì lò myɛ bə̀ ń tó sɔ́má kɛ̀bɛ́ è bə càn n mə n twĩ̀ ń tumə nə zwẽ nyí yil yé. ⁸ Yẽ̌ lyim ni, sə́ yẽ̌ tɛ̃́ pupuru ni, ǹ bə̀ká kwè lyim yé, rə̀myɛ́ wɔ́ lwɛlɛ wɔ̀rhɔ́. ⁹ Lwar bə̀ bə̀ b’a vùr lyi-bəlwǎlsɛ́ bə ce kwã nɛ́, sə byɛ̀bɛ́ bə̀ n’ê dɛ̃̀ kɔn Bə-zhɔ-zhe sono mó, b’a cìní tənà yá. ¹⁰ Kɔn b’a yə̀ námpɔ́lɛ́ y ǹdə́ lyì-bəlwɛ̀lɛ́ y k’ê tɛ̀nɛ́ yé ; ǹ mà ǹ la è gə́ y’à ŋwɛ́nɛ́ mə̀gã̌ nyǔ, ń pwírí è jé. ¹¹ Wɔ́ zúzúnú cìnə́ bə̀ b’a cìní tənà yá, bə jòm ǹdə́ yə̀-zùlə́. ¹² Lyi-bəlwɛ̀lɛ́ n’ê tɛnɛ è la wu-cángá cə́bal zhùlù, s’e zɛ̃̀ e dɔ̃̀ è yə́lə́ dwã nɛ e mɔ̀n mɔ. ¹³ Cǐnnə mó nə́ ń mɔ̀n lyì-bəlwɛ̀lɛ́ yá, bə̀ ń nə è dɛ̃ rɛ́ rə̀ n’ê yí. ¹⁴ Lyì-bəlwǎlsɛ́ n’ê fwə̌rh sə̀ búlə́ shú, sə pə̃̀ sə̀ twã, sə̀ la m’e gu zúzúnú cí ǹdə́ nə̀mɔ̀, sə̀ la m’e zwə́l lyì bí byɛ̀bɛ́ bə̀ n’ê zhə̀l sɔ́má cángá yó mó. ¹⁵ Sə sə̀ sə̀pwà búlə́ shù w k’a zò sə̀ shíshùrhú ni, sə̀ twesé kə́ dwã wa. ¹⁶ Wu-cángá cə́bal gə zhe kɔn námpɔ́lɛ́ cɔ̃̀ lyì-bəlwǎlsɛ zhe wẽ̀ rə̀ bɔrh nánzhəzhɔ̌ ; ¹⁷ Bə̀ lyì-bəlwǎlsɛ́ vɔ̀mɛ̀ nɛ́ b’a ká, sə Bə-zhɔ-zhe nə́ ń yìlì wu-cángá cìnə́ bé. ¹⁸ Bə-zhɔ-zhe yě wu-põ̀ cìnə́ bé dwã nɛ́, bə̀ cəl kɔn rɛ́ j’â ŋwɛ́nɛ́ twéé twéé ¹⁹ Bə̀ t’â jí cìzhìl zwini yi ní yé, nɔrh gə tu byin bə̀ n’ê nɛ kùjú bə̀ jí bə̀ swí ²⁰ Sə lyì-bəlwǎlsɛ́ n’ê cì, Bə-zhɔ-zhe zwə̀ bé nyɛ̌ ǹdə wɔ́ gɔ pùnə́ nã́-ècɛ̌nsɛ dɛ̃́dɛ̃́ ta, bə̀ n’ê jé tɛ̃́ ǹdə nyɛ̀rh ta, bə̀ yérh jé. ²¹ Lyì-bəlwɛ̀lɛ́ n’ê jìmì kɔn lò sono, s’e k’ê t’â càrh mɔ́ rɛ yé, wu-cángá cə́bal wɔ́ nɔ̀nɔ̀ dǔr cə́bal, ń nə́ ń pɛ ń kɔna. ²² Lyì bí byɛ̀bɛ́ Bə-zhɔ-zhe nə́ ń cĩ́ bwəl bə̀ yó mó, bə̀ n’ê cìní tənà yá, sə bə̀ n’ê vùr byɛ̀bɛ́ Bə-zhɔ-zhe nə́ ń bwəl lwɛlɛ ń pɛ bɛ mɔ́ tənà y wa. ²³ Lò mɔ̀bɔ́ ń nə́ ń wɛ̀rhɛ́ Bə-zhɔ-zhe pùbùlə̀, ń nə́ ń sɛ̃ mɔ n zhì kẽkẽ ń sɔ́má y yó ; ²⁴ Ń gə mà ń nà ń tá ń twi tɛ̃́ yé, Bə-zhɔ-zhe nə́ ń zal ń jɛ̃̀ nɛ. ²⁵ À yàl bə̀sɔ́bwɛ̀lɛ́, sə èlǎsɛ́ à cɛ ; sə à gwẽ̌ yə̀ wu-cángá cə́bal nɛ bə̀ dùr bə yẽ̌ yé, à yə̀ ń nɛ̀mɛ́ nɛ́ myɛ nɛ bə̀ wɔ́ lwə̀lnə yé. ²⁶ ń wɔ́ nɔ̀nɔ̀ dǔr cə́bal twéé gakó, e jà ń nə́ ń jìmì lyì dwã nɛ ; ń nɛ̀mɛ́ nɛ́ yó cĩ́ bwəl. ²⁷ Yẽ̌ lwɛlɛ wɔ̀rhɔ́ nɛ, sə́ wɛ̀rhɛ́ cɛ̀nɛ́, èta, ǹ jòmə́ jàà b’a yə̀ nɛ́ byinə nə̀ bə zhɔ̌ zhe yilə. ²⁸ Bə̀ Bə-zhɔ-zhe só wu-cángá tumə né, ń tá ń yẽ̌ ń lyì bí byɛ̀bɛ́ bə̀ zhí mu mú ni yé ; ń nə́ ń yìlì bi twéé twéé, sə bə̀ n’ê vùr lyì-bəlwǎlsɛ́ nɛ̀mɛ́ nɛ́ bə̀ ce kwã nɛ́. ²⁹ Wɔ́ wu-cángá cìnə́ bé bə̀ la tənà y cìnú, bə jòm è wẽ́ twéé twéé gaga yilə. ³⁰ Wu-cángá cə́bal nyí rí n’ê bwə̀l surhə zɔ̀mà rə̀ byili, ń mə̀jòlò w wɔ́ cángá tumə zɔ̀mà nə̀ n’ê dwi ò wẽ́. ³¹ Wɔ́ ń Yi rí nyə́ né ń zhe ń wẽ́ ; ce ń tá ń mà ń nà yé. ³² Lyì-bəlwɛ̀lɛ́ n’ê dùr wu-cángá cə́bal bwɛ̃̌, e zɛ̃̀ è n’ê pyà ń gu. ³³ Bə-zhɔ-zhe tá ń yẽ̌ wu-cángá cí ni lyì-bəlwɛ̀lɛ́ jɔ̃̀ w yé, ń tá ń yẽ̌ mo bùrsi jàà w bə kə́ ń bùrsi bə pɔ̃ còrhò-tum yé. ³⁴ Nyǐ Bə-zhɔ-zhe yó wə, sə́ tó sɔ́má y kɛ̀bɛ́ ń byili bə̀ ǹ tó mó, èta, ń mà n zhẽ̌ ǹ yó dɛ̃̌ ń cìní tə̀nà yá ; ń zɛ̃̀ ń pwírí lyì-bəlwǎlsɛ́ bə̀ vùr bə ce kwã nɛ́. ³⁵ À nɔ lyì-bəlwɛ̀lɛ́ ǹdə́ è jàn rɛ́ nánfɔ̀lɔ̀ w gakó, rə̀ j’â n’ê byìl ǹdə wɔ́ cǒ ò n’ô púrh vɔr nándùn ta. ³⁶ A zɛ̃̀ à la nyǔ, a pwírí ń lyɛ̃, è k’ê tɛ̀nɛ́ yé, a pyà pyà y a ga, è tɛ̀nɛ́ yé. ³⁷ Nyǐ wu-põ̀ ǹdə́ wu-cángá cə́bal gə́ nə́ ń zhə̀l né ; zɛ̃̀ ń lwar bə̀ lò mɔ̀bɔ́ ń nə́ ń pyà yə̀-zùlə́ mó, nə́ ń nɛ nɛ̀mɛ́. ³⁸ Sə bə̀ shɛ̀ nyí zõ cìnə́ bé gakó n’ê jé tɛ̃́, bə̀ n’ê vùr lyì-bəlwǎlsɛ́ nɛ̀mɛ́ nɛ́ bə̀ ce kwã nɛ́. ³⁹ Wu-cángá cìnə́ bé vwǎrh mɔ́ n’ê shí Bə-zhɔ-zhe sono ; wɔ́ ńmyɛ̌ ń nə́ ń yìlì bi zwini yi ní. ⁴⁰ Bə-zhɔ-zhe nə́ ń sɛ̃ bɛ n vwǎrh bɛ ; ń nə́ ń zwẽ be, n vwǎrh bɛ lyi-bəlwǎlsɛ́ jɔ̃̀ wa, bə̀ wɔ́ ńmyɛ̌ sono bə̀ n’ê pyà bə̀ shòò jàà y nɛ́.