¹ Nwíísí yé né cə́bal mɔ́. Bə-zhɔ-zhe tùntùnnə Dəvyidi nwíísi. ² Lyì-bəlwɛlɛ lwɛlɛ zɔ̀mà nɛ́ ŋwɛ́nɛ́ è wu w wẽ́ ; Bə-zhɔ-zhe nyɔ̀mɔ̀ w tɛ̀nɛ́ è yírhə́ w yé. ³ È n’ê jə́jɛ̀rɛ́ è cìn è yírhə́ wə, è t’â yǎl e zwẽ nyí bə̀ è wɔ́ lwɛlɛ cí yé, sə e yẽ̌ è dõ súl mó ne yé. ⁴ È zɔ̀mà nɛ́ nə̀ n’ê dwi è nyú w mú wɔ́ kɔma ǹdə́ myìnù zɔ̀mà ; è bə̀ shɛ̀ tũ̌ ǹdə́ surhə, s’e wɛ̀rhɛ́ cɛ̀nɛ̀ yé. ⁵ Bə-zhɔ-zhe ! ǹ wu-bɔ̀nɔ̀ w zhə̀l o yí dɛ̃̌ yi wə, ǹ zhə̀n tumə né zhə̀l nə yí dɛ̃̌ bəban nɛ́ wa. ⁶ Bə-zhɔ-zhe ! ǹ wu-bɔ̀nɔ̀ w zhə̀l o yí dɛ̃̌ yi wə, ǹ zhə̀n tumə né zhə̀l nə yí dɛ̃̌ bəban nɛ́ wa. ⁷ Ǹ càngá tumə né nyɛ̌ ǹdə Yi pyàr rɛ́ ta, ǹ bùrsí nyɛ̌ ǹdə gɔ́rɔ́ w nánlyilyùmú w ta, Bə-zhɔ-zhe ! ǹmyɛ́ ǹ nə́ ǹ sɛ̃ numbyínsí ǹdə́ vwàmá nɛ ga nɛ. ⁸ Ǎ Yi ! ǹ wu-bɔ̀nɔ̀ w j’â já dɛ̃́dɛ̃́. Wɔ́ ǹmyɛ́ vɔ̀mɛ̀ kùr w numbyínsí n’ê pyà sə̀ shòò jàà nɛ́. ⁹ Wɔ́ ǹ kɛ̀lɛ́ y wẽ́ kùjú pyě né o bɔrh numbyínsí n’ê nɛ sə̀ jí ní sə̀ swí, wɔ́ bwǐsí nɛ̃̌ mɔ́ mə̀ nyɛ̀, ǹ nə́ ǹ pɛ sɛ sə̀ nywɛ̀. ¹⁰ Bə̀ wɔ́ ǹmyɛ́ sono nyǔ mú kùr shí ní, wɔ́ ǹmyɛ́ pwẽ̀ ré wẽ́ nə́ nə pwẽ̀ ré né. ¹¹ Ce ǹ wu-bɔ̀nɔ̀ w yə̀ nɛ́ ǹdə́ lyì bí byɛ̀bɛ́ bə̀ yě ǹ pár mɔ́, sə́ yẽ̌ ǹ cángá tumə né yə̀ wu-cángá cìnə́ wun ní wẽ́ ! ¹² Bə̀ká yẽ̌ cìn-byilu cə́bal cĩ́ jɛ̃̀ à yò yé, sə lyì-bəlwɛlɛ bə̀k’a ŋwɛ̀nɛ́ nɛ e jì yé !