¹ Nwə̃́ə̃́ y kɛ̀bɛ́ wɔ́ Dəvyidi nyǎ. Bə-zhɔ-zhe ! Zwẽ à nyí ni à zwə̀ bé yé né, bú ǹdə́ lyì bí byɛ̀bɛ́ bə̀ n’ê bwí ǹdə́ nɛ mɔ́ ń pɛ̃ ! ² Kwě ku w lò mə́ ń cə̀r ń cìn yé né búlə́ jàà w mɔ́, sə́ lyẽ ǹ búlə́ wẽ̀ ré ; zɛ̃̀ dɛ̃̌ ń sɛ̃ nɛ ! ³ Zə swé ré nánfɔ̀lɔ̀ w ǹdə́ rə̀ námpɔ́lɛ́ y ń mə́ dol lyì bí byɛ̀bɛ́ bə̀ n’ê nwɛ̀nɛ̀ nɛ mɔ́ ! Wál nɛ : Bə̀ wɔ́ àmyɛ́ Bə-zhɔ-zhe à wɔ́ ǹ zwẽ-nə mó ! ⁴ Sə cìzhìl ǹdə́ fuuli zə byɛ̀bɛ́ bə̀ n’ê pyà à myə̌l ré vǔr mó ; sə lyì bí byɛ̀bɛ́ bə̀ n’ê pyà zwini bə̀ la nɛ pɔ mɔ́, wun ní zɛ̃̀ bə kwɛ̃̀. ⁵ Bə yál ǹdə wɔ́ gɔ zho pwà ò m’ô la ta, sə Bə-zhɔ-zhe màlɛ́ka y jì bi ! ⁶ Bə-zhɔ-zhe màlɛ́ka y gə tú è pú bə̀ kùr è n’ê jì, Sə bə̀ sɔ́má y yə̀ sə̀wə̀rə́ sɔ́má nã́byṹ fúrí bə̀ yé né ! ⁷ Bə̀ wɔ́ nánfò yil bə̀ pàm pɔ̀mɔ́ gɔ́rɔ́ w nyí ní à yilə ; Bə̀ kù gɔ́rɔ́ w bə̀ la m’e vùr à myə̌l ré nánfò. ⁸ Bə̀ zwini jǎr jǎr rə zə bɛ ǹdə́ bə̀ yə̀l yé, bə tu pɔ̀mɔ̀ w bə̀ cìcì mú pàm mɔ́ wẽ́ o zə bɛ ! ⁹ èta, à wu b’a zɛ̃̀ o zə nyàn Bə-zhɔ-zhe wẽ́, a fùù ǹmyɛ́ gə́ vwǎrh nɛ mɔ́ yilə. ¹⁰ À gakó námpúm m’a zɛ̃̀ à n’â cèrhé mó à zhe : Ǎ Bə-zhɔ-zhe ! Wɔ́ mɔ̌ lò ń wɔ̌ ń mà n wɛ̀rhɛ́ ǹdə ǹ ta ? ń wɔ̌ ń mà n ŋwɛ̀nɛ́ n zwẽ zúzúnú cí lò mɔ̀bɔ́ ń jàn rɛ́ du mu mú jɔ̃̀ w mɔ́ ? wɔ́ mɔ̌ ń mà n zwẽ zúzúnú cí nã́-nə̀mɔ̀, lò mó mɔ̀bɔ́ ń jàn rɛ́ du mu, n zɔ mɔ n kɔkɔlɛ n zwẽ ń wẽ̀ ré ń jɔ̃̀ w mɔ́ ? ¹¹ Nyǐ zhə̀n-cínnə nã́-kɔ̀mrɛ zɛ̃̀ rə bə̀ à soso : Bə̀ n’ê bwə̀rh ne zɔ̀mà wẽ̀ tɛ̀bɛ́ à yə̀l nə̀ kùrə̀ mó yò. ¹² Bə̀ n’ê càrh nɛ lwɛlɛ cɛ̀nɛ̀ rɛ́ à wɛ̀rhɛ́ mɔ́ yilə : Bə̀ dùr bə yẽ̌ ne. ¹³ E jà, bə̀myɛ́ gə́ y’a bə jàn zhe yi ní, à y’à zù wu-zhùlù gàmə̀-zwǐ a kúrh be, a lyẽ à nyí, a lwəl à cìn tɛ̃́, à m’â lwə̀l Yi ni twéé twéé. ¹⁴ Ǹdə wɔ́ à dɔwa yil ta, ráá ǹdə wɔ́ à da-byǐ yil ta, à y’à n’â zhə̀l màmà ǹdə́ wu zhùlù ; ǹdə wɔ́ lò ná ń cù ń ŋwɛ́nɛ́ wu-zhùlù wẽ́ ta. ¹⁵ Sə è gə wɔ́ àmyɛ́ à mà à nà a tu mú, bə zɛ̃̀ bə vò bə̀ gùlí dwã bə̀ n’ê fùù, bə vò bə shèè bə gùlí dwã bə̀ n’ê mà bə̀ jɛ̀rh à yilə, bə̀ m’ê cɔ̀ à wu ni twéé twéé ; ¹⁶ bə̀myɛ́ ǹdə́ lyì byɛ̀bɛ́ bə̀ yə̀l Yi párá, myìnnə cìnə́ bé byɛ̀bɛ́ bə̀ n’ê mɔ̀n Yi, bə̀ m’ê dɔ̀m bə̀ yə́lə́ dwã nɛ à yilə. ¹⁷ Bə-zhɔ-zhe ! Wɔ́ dǒ dɛ̃ ǹ yírh la rə̀myɛ́ nɔ ? Yìlì ni bə̀ pǎm rɛ́ yé né, yìlì à myə̌l ré bwaarɛ́ yé né ! ¹⁸ Èta, à m’a zɛ̃̀ a cèrhé mó dwã-gùlú nánfɔ̀lɔ̀ w wẽ́, À m’a cèrhé mó dwí nánjə̀jóló cəcəl wə. ¹⁹ Bə̀ byɛ̀bɛ́ bə̀ wɔ́ à zwə̀, e jà rə̀ bə kùr zhe mó bə̀k’a fùù à yil yé, bə̀ byɛ̀bɛ́ bə̀ n’ê súl ne mó bə̀k’a zə bə̀ yírhə́ bə tùrh ne yé ! ²⁰ Bə̀ zɔ̀mà nɛ́ bə̀ n’ê zɔ̀m mɔ́ də̀ yə̀-zùlə́ zɔ̀mà yé, Bə̀ n’ê tɛ́rɛ́ jə́jɔ̀rɔ́ zɔ̀mà tənà y lyì bí byɛ̀bɛ́ bə̀ nyɛ̌ shɛ́shɛ́ mó yilə. ²¹ Bə̀ wə̌rh bə̀ nyə́ nə̃́wowə̀ə́rhe bə̀ m’ê bwí ǹdə́ nɛ bə̀ zhe : Ǎ yà, ǎ yà, nə́ yírhə́ nɔ mɔ ! ²² Bə-zhɔ-zhe ! Ǹ yírhə́ nə rɛ ! Ǹ bə̀ká zhì ǹ nyí cám yé ! Cǐnnə ! ǹ bə̀ká zə nyan ǹdə́ nɛ yé ! ²³ Zɛ̃̀ dɛ̃̌, zɛ̃̀ dɛ̃̌, ń byili bə̀ à bə dóó zhe yé ! Ǹmyɛ́ ǹ wɔ́ à Yi ǹdə́ à Cǐnnə, zwẽ à nyí ni ! ²⁴ Bə-zhɔ-zhe ! à Yi, nyǐ ni ǹdə ǹ càngá tumə né gə́ n’ê byili ní ! Mùnì à zwə̀ bé bə̀k’a fùù à yil yé ! ²⁵ Bə̀ zɛ̃̀ bə̀ n’ê zɔ̀m bə̀ zhe : Nyǐ wɔ́ èta nə́ y’ǎ n’é yǎl nɛ́ yé ! Bə̀ bə̀k’a zɛ̃̀ bə̀ zhe : Nə́ zɔ mɔ jɔ̃̀ w yé ! ²⁶ Ce byɛ̀bɛ́ bə̀ n’ê fùù à zwini rí yil mó gakó, jí cìzhìl bə̀ bɔbɔlɛ, ce byɛ̀bɛ́ bə̀ zɛ̃̀ bə̀ n’ê bwí ǹdə́ nɛ mɔ́ nə fuuli ǹdə́ cìzhìlə̀. ²⁷ Sə lyì bí byɛ̀bɛ́ bə̀ n’ê yǎl bə lwar bə̀ à bə dóó zhe mó, cìnə́ bé fùú ǹdə́ wu-nyɔ̃̀, sə bə j’â n’ê zɔ̀m twéé twéé bə̀ zhe : Wɔ́ Bə-zhɔ-zhe ń zhe zùwə́ yə́, ńmyɛ̌ mɔ̀bɔ́ ń nə́ ń yǎl sə ń tùntùnnə mó nə yə̀-zùlə́ mó. ²⁸ Sə àmyɛ́ b’a zə à mə̀jòlò w a cèrhé mó ǹ cángá tumə né yilə, à m’a zə w dɛ̃ gakó à m’a byili ǹ zùwə́ yə́.