¹ Nwə̃́ə̃́ kɛ̀bɛ́ wɔ́ Dəvyidi nyǎ. Ń gə́ tú n wɛ̀rhɛ́ ǹdə nyə̀nyààrɛ tũ̀-twĩ̀ĩ̀ ta Abyəmyɛlɛkɛ yé né, Abyəmyɛlɛkɛ zɛ̃̀ n jì mù n dùr ń lyɛ̃ yi ni mú. ² À n’â ce Bə-zhɔ-zhe nə̀bán dɛ̃ gakó ; À m’a j’â n’â cèrhé mó à nyú w twéé twéé. ³ Wɔ́ Bə-zhɔ-zhe ń wɔ́ à wu-nyɔ̃̀ wá ! Zúzúnú cìnə́, cili-nə rə̀myɛ́, sə bə fùù ǹdə́ wu-nyɔ̃̀ ! ⁴ Tó-nə ne nə́ zǔl Bə-zhɔ-zhe ! Bà-nà nə́ gakó cèrhé ń yil ré ! ⁵ À pyà Bə-zhɔ-zhe, sə ń lyár nɛ ; ń vùr ne à wu-zɛ̃̀ɛ̃́ y gakó wẽ́. ⁶ Bə̀ lò gə pyìrhí ń yé n zǎ mɔ, wu-nyɔ̃̀ n’ô dwi ò jə́jɛ̀mɛ́ rə̀-ná-cí yé-zwǎ wa, cìzhìl k’ê t’â zal mɔ yé. ⁷ Zúzúnú cí gə búbwéé ń co Bə-zhɔ-zhe ne, ń nə́ ń cili ń sono, n vwǎrh mɔ ń zúzúnú w gakó wẽ́. ⁸ Bə-zhɔ-zhe màlɛ́ka y n’ê yìlì lyì byɛ̀bɛ́ bə̀ n’ê nyàm mɔ mɔ́, è n’ê vwǎrh bɛ zwini wẽ́. ⁹ Lə́lá-na, á nyǐ Bə-zhɔ-zhe gə́ wɔ́ wu-bɔ̀nɔ̀ cə́bal nɛ́ mawé ! Wu-nyɔ̃̀ ŋwɛ́nɛ́ ǹdə́ lò mɔ̀bɔ́ ń nə́ ń pyà ń shòò jàà Bə-zhɔ-zhe sono ! ¹⁰ Ámyɛ̌ Bə-zhɔ-zhe lyì bí, nyám-na mɔ́, Bə̀ kaka t’â mùrì lyì byɛ̀bɛ́ bə̀ n’ê nyàm mɔ mɔ́ yé. ¹¹ Bɔrɔ wɔ̌ ò pyà kɔn o lyɛ̃̀, nɔrh zə wa, sə kaka də́-byǐ t’â mùrì lyì byɛ̀bɛ́ bə̀ n’ê nyǐ Yi yó w mó yé. ¹² À byǎ, bà-nà á cili à zɔ̀mà nɛ́ ! À m’a cèrhè ába Bə-zhɔ-zhe nyɔ̀mɔ̀ wa. ¹³ Wɔ́ lò mɔ̌ ń nə́ só ń myə̌l ré, ń nə́ ń yǎl sə rə zə dwɛ̀lɛ̀, mùnì n wɛ̀rhɛ́ wu-nyɔ̃̀ ? ¹⁴ Dɛ̃̌ ǹ mə̀jòlò w ǹdə́ lwɛlɛ, myìnù zɔ̀mà bə̀k’a du ǹ nyú w yé ; ¹⁵ Ce lwɛlɛ zə nyan ǹdə́ mɔ́, sə̀ wɛ̀rhɛ́ cɛ̀nɛ̀ ; Pyǎ sə yə̀-zùlə́ jǒm yò zù mú. ¹⁶ Bə-zhɔ-zhe yírhə́ pyǎ wu-cángá cìnə́ yó, ń zhã̌ nyɛ̌ bə̀ búbwéé yə́. ¹⁷ Bə-zhɔ-zhe nə́ ń pyìrhí ń kwã ń zǎ lyì-bəlwǎlsɛ́, kɔn m’e yí n ce sə jé tɛ̃́ cɛ y yó, bə swě sə̀ yó. ¹⁸ Wu-cángá cìnə́ gə búbwéé bə̀ co Bə-zhɔ-zhe ne, ń nə́ ń cili, n zɛ̃̀ n vwǎrh bɛ bə̀ zúzúnú w gakó wẽ́ ; ¹⁹ Bə-zhɔ-zhe bwə́l lyì byɛ̀bɛ́ bə̀ wun ní zhìlì mú ni, ń nə́ ń vwǎrh byɛ̀bɛ́ bə̀ wun ní bə jàà èdù zhǐ mú. ²⁰ Dɛ̃ ŋwɛ́nɛ́ zwini y’a zə wu-cángá cə́bal, sə Bə-zhɔ-zhe nə́ ń zwẽ mo twéé twéé gakó. ²¹ Ń nə́ ń yìlì ń kúr rí, òdù ga t’â kɛ́ yé. ²² Zwini n’ê gwi lyì-bəlwɛ̀lɛ́, wu-cángá cə́bal zwə̀ bé n’ê nɛ còrhò-tum.