¹ Àmyɛ̌ byɛ̀bɛ́ á zhí Bə-zhɔ-zhe ne mó, fùú-nə ǹdə́ wu-nyɔ̃̀ bə-zhɔ-zhe wẽ́ ! Wu-cángá cìnə́ bə̀ mə̌ ǹdə́ Bə-zhɔ-zhe còrhó. ² Dú-nə bɔ̀rɔ́ á m’á cèrhé mo, dú-nə zɔ̃̀ ǹdə́ ò nyínsi shíyə́ á m’á cèrhé mocèrhé-nə mo. ³ Nún-nə nwə̃́ə̃́ nándwə̃̀ á pɔ̃ ! Dú-nə á dɛ̀lɛ̀ wẽ̀ ré ǹdə́ nwíísi ! ⁴ Bə̀ Bə-zhɔ-zhe zɔ̀mɛ̀ rɛ́ wɔ́ cángá, sə ń tumə né gakó n’ê pyìrh ǹdə ń gə́ byili ní ; ⁵ Ń só zhə̀n tumə né ǹdə́ cángá tumə né ; Bə̀-zhɔ-zhe wu-bɔ̀nɔ̀ w sú cɛ y yó. ⁶ Wɔ́ Bə-zhɔ-zhe zɔ̀mɛ̀ rɛ́ dɛnnɛ ń tó né n wɛ̀rhɛ́ dɛ̃̌ mó, n zə ń nyì-zho n mə n wɛ̀rhɛ́ wẽ̀ ré tɛ̀bɛ́ rə̀ ŋwɛ́nɛ́ dɛ̃̌ mó gakó. ⁷ N pə́ nə̀-fɔ̀lɔ̀ w nɛ̃̌ mɔ́ gakó ń cĩ́ dwã yó, n kwè jààsɛ n cĩ́ gwáárɛ́ nánlyilyǐmrí ní. ⁸ Bə̀ cɛ y púlə́púlə́ nyám Bə-zhɔ-zhe ! Bə̀ cɛ yó numbyínsí gakó kəkə Bə-zhɔ-zhe yé né ! ⁹ Bə̀ wɔ́ ń nyí ń púr kɔn j’a bà, wɔ́ nyí ń pɔwa, kɔn j’a ŋwɛ́nɛ́. ¹⁰ Bə-zhɔ-zhe ń nə́ ń ce wẽ̀ ré tɛ̀bɛ́ tənèsé n’ê yǎl sə wɛ̀rhɛ́ mɔ́ t’â zwẽ nyí yé, ńmyɛ̌ ń nə́ ń cɔ̀ tɛ̀bɛ́ gakó dwə́ né lyì bí gu bə̀ wẽ́ bə tɛnɛ bə̀ la wɔ̀rhɔ́ mɔ́ ; ¹¹ Kɔn tɛ̀bɛ́ Bə-zhɔ-zhe gu ń wẽ́ n tɛnɛ ń la wɔ̀rhɔ́ mɔ́ n’ê pyìrh twéé twéé, tɛ̀bɛ́ rə̀ wɔ ń wẽ́ ń tɛnɛ ń la wɔ̀rhɔ́ mɔ́, wɔ́ numbyínsi nɛ̀mɛ́ nɛ̀mɛ́ gakó yilə. ¹² Wu-nyɔ̃̀ ŋwɛ́nɛ́ ǹdə́ tənà kɛ̀bɛ́ Bə-zhe-zhe wɔ́ è Yi ! Wu-nyɔ̃̀ ŋwɛ́nɛ́ dwí tɛ̀bɛ́ Bə-zhɔ-zhe cír rə̀ la ń sə̀pwà lyì yál mɔ́ ! ¹³ Bə-zhɔ-zhe zhǐ dɛ̃̌ dɛ̃̌ gaga ń nə́ ń nyǐ numbyínsí. ¹⁴ Ń jě ń jàà y w ń nə́ ń myə̀lɛ́ lyì bí byɛ̀bɛ́ bə̀ ŋwɛ́nɛ́ cɛ yó mó gakó, ¹⁵ Ńmyɛ̌ mɔ̀bɔ́ ń wɛ̀rhɛ́ bə̀ gakó wun ní mú, zhìlì ń yala nɛ ń nə́ nyǐ bə̀ tũ̀-twə̃̀ə̃̀ né. ¹⁶ E də̀ shə̀dɛ́ɛ́sɛ nánjə̀jóló sə̀ n’ê zwẽ pyɔ́ yé, è k’ê də̀ jàn nánfɔ̀lɔ̀ myɛ ò n’ô zwẽ kã̀dɔ yé ; ¹⁷ Eshã ǹdə́ è jàn rɛ́ wɔ́ nánfò, ǹdə́ è jàn rɛ́ gakó yírh wə, rə̀ wàr rə̀ la ce n lú yé. ¹⁸ Zhə̀nà, Bə-zhɔ-zhe yírhə́ pyǎ lyì bí byɛ̀bɛ́ bə̀ n’ê nyàm mɔ mɔ́ yó, byɛ̀bɛ́ bə̀ n’ê dɛ̃̀ kɔn ń sono, ń wu-bɔ̀nɔ̀ w yil mó, ¹⁹ ń mà n vwǎrh bɛ cu jɔ̃̀ wa, n yìlì bə̀ nyǔ mú ǹdə́ nɔrh nánfɔ̀lɔ̀ gə tú mə̀ tuwə. ²⁰ Wɔ́ Bə-zhɔ-zhe sono nə́ n’ê dɛ̃̀ kɔn nɛ́ ; Ńmyɛ̌ ń wɔ́ nə́ sɛ̃ɛ̃́ ǹdə́ ku kɔ̀bɔ́ ò n’ô cə̀r nə́ yé né búlə́ jàà wa. ²¹ Bə̀ wɔ́ ńmyɛ̌ wẽ́ nə́ wu w zhe wu-nyɔ̃̀ nɛ́, wɔ́ ńmyɛ̌ yil ré ne nə́ zhí. ²² Bə-zhɔ-zhe ! Bə̀ ǹ pɛnɛ́ y nánfò w yál nɛ́ ǹdə́ nə́ba, bə̀ wɔ́ ǹmyɛ́ yó w nə́ n’é nyǐ ní.