¹ Wɔ́ Dəvyidi nwə̃́ə̃́. Wu-nyɔ̃̀ ŋwɛ́nɛ́ ǹdə́ lò mɔ̀bɔ́ bə̀ vùr ń lwɛlɛ rɛ́, mɔ̀bɔ́ bə̀ pɔ mɔ ń yə̀-bəlɔ̀lɔ́ w sǔbri mú ! ² Wu-nyɔ̃̀ ŋwɛ́nɛ́ ǹdə́ lò mɔ̀bɔ́ Bə-zhɔ-zhe byili bə̀ ń bə lwɛlɛ zhe, dóó də́-byǐ tɛ̀nɛ́ ń wẽ́ gaga mɔ́ ! ³ À gə j’a pyi à nyí, à t’â byili à dóó wə́, à yala nɛ́ m’a n’ê jí myǐn, à m’a lyɛ̀ɛ̀ dɛ̃ námpúm wẽ́. ⁴ Bə̀ ǹ jɛ̃̀ y pyɛ̀lɛ́ à yó, cəcɛ̃ ǹdə́ nə̀nyɛ́nɛ́ gakó, à jàn rɛ́ zhɛ̀ rə yẽ̌ ne, ǹdə gɔ gə y’a kù nə̀nyã́-myǐn ni mú ta. –Pause. ⁵ À byili mú à yə̀-bəlɔ̀lɔ́ wá, à yə̀ mɔ́ lwɛlɛ rɛ́ shèè yé ; À zɔ̀m a wɔ̀ : À m’a byili à dwə́ə́ ré Bə-zhɔ-zhe yé né ! Sə ǹ yẽ̌ còrhò-tum rí à y’à la nɔ à yə̀-bəlɔ̀lɔ́ w yil mó ne. ⁶ Èta, lò mɔ̀bɔ́ gakó ń nə́ ń nyàm Yi mú, dɛ̃ rɛ́ tɛ̀bɛ́ Yi pɔ mɔ sɔ́má, n zɛ̃̀ n lwə̀l Yi ni, yi rí tɛ̀bɛ́ Yi n’ê yǎl mɔ́ yi ní ! Nɛ̃̌ gə zɛ̃̀ mə̀ sú cɛ mə bɔrh myɛ, mə̀ t’â yí rə̀-ná-cí ni gaga yé. ⁷ Bə-zhɔ-zhe, ǹ wɔ́ àmyɛ́ shòò jàà, ǹ nə́ ǹ yìlì ni zwini yi ní, ǹ ce vwǎrh nwíísi kə́kɛ́lɛ́ nɛ--Pause ⁸ Ǹ wòwə̀ : À m’a cèrhè mó, a byili mú sɔ́má kɛ̀bɛ́ ǹ mə̌ sə́ tó mó ; À m’a cící mu, à yírhə́ m’a pyǎ ǹ yó. ⁹ Sə ǹ bə̀ká yə̀ ǹdə shəshã ráá ǹdə́ bə̀na ta yé ; bə̀ n’ê lyẽ wẽ̀ rə̀ yala nɛ, bə ce cɔ̌brɛ rə̀ nyú wə, mùnì ga ń zɛ̃̀ ń ce rə̀ n’ê wɛ̀rhɛ́ ǹdə ǹ gə́ nə́ ǹ yǎl nɛ. Ǹmyɛ́ bə̀k’á yə̀ ǹdə rə̀myɛ́ ta yé. ¹⁰ Zwini nánzhəzhɔ̌ ŋwɛ́nɛ́ lyì-bəlwǎlsɛ́ yilə, sə Bə-zhɔ-zhe sónó kə́kɛ́lɛ́ lò mɔ̀bɔ́ ń zhí mu mú. ¹¹ Ámyɛ̌ byɛ̀bɛ́ á zhí Bə-zhɔ-zhe ne mó, fùú-nə, s’á wɛ̀rhɛ́ wu-nyɔ̃̀ Bə-zhɔ-zhe wẽ́ ! Ámyɛ̌ byɛ̀bɛ́ á zhí Bə-zhɔ-zhe ne mó, zɛ̃̀-nà dɛ̃̌, á búbwéé wu-nyɔ̃̀ búbwéése.