¹ Nwíísí yé né cə́bal mɔ́. Dəvyidi nwə̃́ə̃́. ² Bə-zhɔ-zhe ! wɔ́ ǹmyɛ́ wẽ́ à n’â pyà à shòò jàà nɛ́ : Mùnì ga à bə̀k’a nə cìzhìl gaga yé ! Zwẽ ne ǹ cángá tumə yil ré yilə. ³ Pyèrhè ǹ zhɛ̃̌ ń cili à sono, bə̀ ń sɛ̃ nɛ làlà ! Yál àmyɛ́ yùlù pàtá nə́kulu, byílí kɛ̀bɛ́ è lù è zhǐ kẽkẽ, wɔ́ gàà mɔ́ à b’a nə à vwǎrh mɔ́ nɛ́ ! ⁴ Bə̀ wɔ́ ǹmyɛ́ ǹ wɔ́ à pàtá nə́kulu, à yùlù jàà ; sə wɔ́ ǹ yil ré jàn yil ǹ mà ń zə nɛ a tó sɔ́má kɛ̀bɛ́ à mə̌ s’a tó mó. ⁵ Ǹ b’ǎ vùr ne pɔ̀mɔ̀ w ò pàm à yil mó wẽ́ ; Bə̀ wɔ́ ǹmyɛ́ ǹ wɔ́ à yìlnə mó ; ⁶ Bə-zhɔ-zhe ! À n’â ce à éshìrhə́ y ǹ jɔ̃̀ wa ; Bə-zhɔ-zhe, Yi, zhə̀n cə́bal, ǹ b’a vwǎrh nɛ. ⁷ À n’â súl lyì bí byɛ̀bɛ́ bə̀ zhí wò-zwə́ə́lé rə̀ bə kùr zhe mó ne mó, wɔ́ Bə-zhɔ-zhe ne àmyɛ́ zhí. ⁸ Ǹ pɛnɛ́ y nánfò w jàn yil à m’a fùù ǹdə́ wu-nyɔ̃̀ ; bə̀ ǹ yírhə́ nə à nɔ̀nɔ̀ w ǹdə́ à zúzúnú wə́, ⁹ Ǹ tá ǹ la nɛ́ yõ̌ ń ce à zù-bal mɔ́ jɔ̃̀ w yé, ń mà ń vùr ne gɔ́rɔ́ w wẽ́ a zhì dɛ̃̌. ¹⁰ Bə-zhɔ-zhe, dǔr à nɔ̀nɔ̀ ! bə̀ nɔ̀nɔ̀ zhe ne ; wu-zhùlù ce à yé-zwã̌ y ǹdə́ à wu w ǹdə́ à yala nɛ́ gakó cɔ̀. ¹¹ Kɔn rɛ́ tɛ̀bɛ́ rə̀ n’ê yì ni mú n’ê jí à nyǔ mú myǐn, à byinə né wẽ́, wɔ́ kúrh à n’â kúrhə́ ; à dwə́ə́ ré ce à jàn rɛ́ zhɛ̀, à yala nɛ́ pyɛ̀nɛ̀. ¹² À zwə́ bé gakó zɛ̃̀ bə pɛ̃ cìzhìlə̀, è wɔ́ cìzhìl nánfɔ̀lɔ̀ à jə̀-dwã bɛ́ sono, à ywẽ zɛ̃̀ rə̀ zhe à dɔwabá ; Lyì bí byɛ̀bɛ́ bə̀ n’ê nɛ pwẽ̀ ne mó gakó n’ê dùr à nyí ni bə̀ zhə̀l kwã nɛ́ gaga. ¹³ Lyì bí swě à yò ǹdə cùù ta, à jǐrh ǹdə nə̀zhĩ̌ è lo ta. ¹⁴ À zwã̌ nyɛ̌ lyì nánzhəzhɔ̌ n’ê zɔ̀m zɔ̀mà nyɛ̀bɛ́ nə̀ bə càn à yilə, wu-zɛ̃̀ɛ̃́ j’a làà jààsɛ́ gakó, bə̀ gə tú dwã yó gakó wɔ́ àmyɛ́ sõ zɔ̀mà nɛ́ ; bə̀ n’ê ce dwã yó bə̀ la pyà à myə̌l vǔr. ¹⁵ Sə Bə-zhɔ-zhe, wɔ́ ǹmyɛ́ nɛ à zhí ! À n’â wə̀lə̀ : Wɔ́ ǹmyɛ́ ǹ wɔ́ àmyɛ́ Yi rí ! ¹⁶ Tɛ̀bɛ́ gakó rə̀ ŋwɛ́nɛ́ rə̀ bàn à yil mó gakó ŋwɛ́nɛ́ ǹ jɔ̃̀ wa ; Vwǎrh nɛ à zwə̀ bé ǹdə́ byɛ̀bɛ́ bə̀ n’ê nwɛ̀nɛ̀ nɛ mɔ́ jɔ̃̀ wa ! ¹⁷ Ce ǹ pwẽ̀ ré yə̌r ǹ tùntùnnə̀ mó yó n lwar ǹ párá, vwǎrh nɛ ǹ sónó w yilə ! ¹⁸ Bə-zhɔ-zhe, à gə n’â byẽ̀ mó, sə bə̀k’a yẽ̌ cìzhìl jí ni yé. Ce lyì-bəlwǎlsɛ́ jí cìzhìlə̀, sə cì sə vò cùùrí wẽ́ shɛ́shɛ́ ! ¹⁹ Ce sə̀myɛ́ shɛ̀bɛ́ zhə̀n t’â dwi sə̀ nyú w wɔ́ kɔma dúdú, sə̀ n’ê zɔ̀m ǹ tùntùnnə mó yil námməlwɛ̀lé mɔ́ nyə́ né dɛ̃. ²⁰ Nyǐ ǹ wu-bɔ̀nɔ̀ w ǹ zhe lyì bí byɛ̀bɛ́ bə̀ n’ê nyàm mɔ́ mɔ́ yil mó já dɛ̃́dɛ̃́, wu-bɔ̀nɔ̀ kɔ̀bɔ́ ǹ nə́ ǹ byili byɛ̀bɛ́ bə̀ n’ê pyà bə̀ shòò jàà ǹ wẽ́ ; numbyínə́ bé gakó yírhə́ w mó ! ²¹ Ǹ nə́ ǹ yìlì bi ǹ yé né, byɛ̀bɛ́ bə̀ n’ê nwɛ̀nɛ̀ bɛ mɔ́ wàr bɛ kaka bə̀ wɛ̀rhɛ́ yé, ǹ nə́ ǹ yìlì bi ǹ kòrhó w wə, mə̀jə̀ə̀lé tɛ̀bɛ́ rə̀ n’ê gàrmɔ̀ bɛ mɔ́ yé né. ²² Bə-zhɔ-zhe yil ré nə còrhó ! Bə̀ ń byili ni ń sónó w wə́, ǹdə wɔ́ cɔ kɔ̀bɔ́ ò zhe jàn wẽ́ à y’à ŋwénɛ́ nɛ́ ta. ²³ : Bə̀ jì ni a vò yé né gaga ǹ yírhə́ gə́ bə nə nɛ mə̀gã̌ ! A zɛ̃̀ a bubwéé a ce mó, sə ǹ nyɛ̀ɛ̀ à lwə̌l mó. ²⁴ Ámyɛ̌ byɛ̀bɛ́ á zhe nɔ̀nɔ̀ dǔr mó, swéné-nə Bə-zhɔ-zhe ! Bə̀ Bə-zhɔ-zhe nə́ ǹ yìlì lyì bí byɛ̀bɛ́ bə̀ n’ê wɛ̀rhɛ́ ǹdə ń zɔ̀mɛ̀ rɛ́ gə́ n’ê byili ní mú, n zɛ̃̀ ń nə́ ń pɛ còrhò-tum cìn-byilu cìnə́ ne.