¹ Yi byǎ, pə-na còrhó Bə-zhɔ-zhe ne, Pə-na zùwə́ ǹdə́ nyɔ̀mɔ̀ Bə-zhɔ-zhe ne ! ² Pə-na còrhó Bə-zhɔ-zhe ne ń yil ré yilə ! wùlì-nə Bə-zhe-zhe yé né ǹd’á wu põ̀ ³ Bə-zhɔ-zhe dome n’ê dom nɛ̃̌ mɔ́ yó, Yi rí rə̀ zhe zùwə́ mó ce dwà y n’ê bya ; Bə-zhɔ-zhe ŋwɛ́nɛ́ nɛ̃̌ mɔ́ nánfɔ̀lɔ̀ w yó. ⁴ Bə-zhɔ-zhe cəl ré dweme ré já dɛ̃́dɛ̃́, Bə-zhɔ-zhe cəl ré bə dõ zhe yé. ⁵ Bə-zhɔ-zhe cəl ré n’ê kɛ́ sɛ́ɛ́dərɛbá bá ; Bə-zhɔ-zhe nə́ ń kɛ́ Lyəbã sɛ́ɛ́dərɛbá, ⁶ Ń nə́ ń ce rə̀ zɛ̃̀ rə̀ fwɛ̃́ ǹdə bə̀cùúli ta, n ce Libã ǹdə́ Sərənyɔ̃ yə̀ ǹdə gɔ-nɛ̃ nã́-bwàálɛ ta. ⁷ Bə-zhɔ-zhe cəl ré n’ê ce myìn-zhù zɛ̃̀ ò zhe byìbyì. ⁸ Bə-zhɔ-zhe cəl ré n’ê ce gɔ-elũ w zhízhǐ ; ń nə́ ń ce Kadɛɛsɛ gɔ-elũ w zhízhǐ. ⁹ Bə-zhɔ-zhe cəl ré jàn rɛ́ n’ê ce nàmsɛ lù byǎ, rə̀ n’ê ce swààlɛ cèmé vɔr shìl tɛ̃́. Kɔn gakó n’ê búbwéé ń pyə̀-kɛ̀lɛ́ y w rə̀ zhe : Bə-zhɔ-zhe nə còrhó ! ¹⁰ Dwà nánfwɛ̀lɛ̀ y gə́ nyɔ̀ e gu lũ w lyì bí mú yi ní, ǹdə́ Bə-zhɔ-zhe yà ń jě ń pyɛ̀lɛ̀ də̀gwã́ y yó ; Bə-zhɔ-zhe jě ń pyɛ̀lɛ̀ də̀gwã́ yó ń nə́ ń jí pyɛ̀lɛ̀ byinə nə̀ bə zhɔ̌ zhe yilə. ¹¹ Bə-zhɔ-zhe ń nə́ ń pɛ jàn ń dwí rí ni ; Ń nə́ ń cĩ́ bwəl ń dwi rí yó, n ce rə zə wu-nyɔ̀.