¹ Dəvyidi nwə̃́ə̃́. Bə-zhɔ-zhe ! Wɔ́ ǹmyɛ́ nɛ à n’â búbwéé à ce. À pàtá ! cili à cəl ré, ǹ bə̀ká shĩ ǹ zhã̌ yé. Ǹ gə shĩ ǹ zwã̌, ń vò kwã nɛ́ gaga, ǹ yə̀ nɛ lyár, à m’a yə̀ ǹdə byɛ̀bɛ́ bə̀ n’ê ce lú-bɔ̀là wẽ́ mó ta. ² À gə tú à zhẽ̌ à jɛ̀rh a ce ǹ jì y səta, a búbwéé à ce mó, sə́ zwẽ à lwə̌l mó. ³ Ǹ bə̀ká zə nɛ ń mù dwã nɛ ǹdə́ lwɛlɛ cìnə́ bé ne ń lyẽ yé, lwɛlɛ cìnə́ bé n’ê zɔ̀m yə̀-zùlə́ zɔ̀mà ǹdə́ bə̀ dwã bɛ́, e jà wɔ́ surhə námməlwɛ̀lɛ́ è ŋwɛ́nɛ́ bə̀ wẽ́. ⁴ Pə bɛ́ kɔn dɛ̀bɛ́ rə̀ mə̌ ǹdə́ bə̀ tumə né ǹdə́ bə̀ surhə námməlwɛ̀lɛ́ y mɔ́, Pə bɛ kɔn dɛ̀bɛ́ rə̀ mə̌ dwã ǹdə́ bə̀ jɛ̀rh tumə né mó ; pə bɛ kwǎndɛ́ tɛ̀bɛ́ rə̀ mə̌ ǹdə́ bɛ mɔ́. ⁵ Bə̀ bə̀ t’â pyà Bə-zhɔ-zhe tumə né yé-shò lwar yé, Bə̀ t’â pyà ń jɛ̃̀ tumə né yé-shò lwar yé. Bə̀ n’ê wǔr Bə-zhɔ-zhetumə né bə̀ lwé tɛ̃́, e jà bə̀ k’ê t’â zhẽ̌ ne bə̀ cĩ́ dɛ̃̌ gaga yé ! ⁶ Bə̀ Bə-zhɔ-zhe yil ré nə còrhó ! Ń nə́ ń zwẽ à lwə̌l mó. ⁷ Bə-zhɔ-zhe wɔ́ à jàn rɛ́, n jà ń wɔ́ ku kɔ̀bɔ́ ò n’ô cə̀r à yé ne búlə́ jàà wa ; Ńmyɛ̌ nɛ à zhí, ń sono à n’â nɛ sɛ̃ɛ̃́ nɛ́ ; à n’â fùù à wẽ́, à nún à m’a cèrhé mo. ⁸ Wɔ́ Bə-zhɔ-zhe ń wɔ́ ń dwí rí jàn rɛ́, Ńmyɛ̌ ń wɔ́ pàtá nə́kulu w ò n’ô zwẽ mɔ̀bɔ́ ń cír mó. ⁹ Vwǎrh ǹ dwí rí, sə́ cĩ́ bwəl ǹ cəl kɔn rɛ́ yó. Yál rə̀ vwǎ-ènɔ̀n, sə́ kwɛ̃́ rɛ twéé twéé.